ଚଣ୍ଡିଗଡ଼ ୧୦।୧୦: ହରିୟାଣାରେ ବିଜେପିର ଇଛା ନୂଆ ସରକାରର ଶପଥ ଗ୍ରହଣ ସମାରୋହ ଅକ୍ଟୋବର ୧୨ ତାରିଖ ଦିନ ପଞ୍ଚକୁଲାରେ ହେଉ। ତେବେ ନୂଆ ସରକାରର ଶପଥଗ୍ରହଣ ପାଇଁ ଏବେବି ତାରିଖ ଓ ସ୍ଥାନ ଚୂଡାନ୍ତ ହୋଇ ନାହିଁ । ସେହି ଦିନ ଦଶହରା ହୋଇଥିବାରୁ ସମୟ ଆଗକୁ ଗଡ଼ାଯାଇ ପାରେ, କାରଣ ଦଶହରା ଲାଗି ଅଧିକାଂଶ ନେତା ସେଦିନ ବ୍ୟସ୍ତ ରହିବେ। ତେବେ ସୂତ୍ରରୁ ମିଳୁଥିବା ସୂଚନା ଅନୁସାରେ ହରିୟାଣାର ନୂଆ ମୁଖ୍ୟମନ୍ତ୍ରୀଙ୍କ ସହିତ ୪ କ୍ୟାବିନେଟ ଓ ୩ ରାଷ୍ଟ୍ରମନ୍ତ୍ରୀ ଶପଥ ନେଇ ପାରନ୍ତି।
ରାଜ୍ୟରେ ମନ୍ତ୍ରୀ ହେବାକୁ ଥିବା ନେତାଙ୍କ ଦୌଡରେ ମୁଲଚନ୍ଦ ଶର୍ମା, ମହିପାଲ ଢାଂଡା, ଅନିଲ ଭିଜ, କୃଷ୍ଣ କୁମାର, ରାଓ ନରବୀର ସିଂହ, ଆରତୀ ରାଓ, ଡା. ଅରବିନ୍ଦ ଶର୍ମା, ଶ୍ରୁତି ଚୌଧୁରୀ, ହରବିନ୍ଦ୍ର କଲ୍ୟାଣ ଓ ଜଗମୋହନ ଆନନ୍ଦ ଆଦିଙ୍କ ନାମ ଶୁଣାଯାଉଛି। ଏଥିରେ ୪ ଜଣ କ୍ୟାବିନେଟ ମନ୍ତ୍ରୀ ପଦ ଦୌଡରେ ଥିବା ବେଳେ ୩ ଜଣ ରାଷ୍ଟ୍ରମନ୍ତ୍ରୀ ଭାବେ ଶପଥ ଗ୍ରହଣ କରିପାରନ୍ତି। ୨୦୨୪ ବିଧାନସଭା ନିର୍ବାଚନରେ ବିଜେପି ୯୦ରୁ ୪୮ଟି ଆସନ ଜିତିଛି। ତେବେ ମୁଖ୍ୟମନ୍ତ୍ରୀ ଓ ମନ୍ତ୍ରୀଙ୍କ ଶପଥ ଗ୍ରହଣ ପୂର୍ବରୁ ବିଜେପିର ଶକ୍ତି ବଢିଯାଇଛି ଓ ବିଜେପିର ମୋଟ ବିଧାୟକଙ୍କ ସଂଖ୍ୟା ୫୧ ହୋଇଛି।
ବିଜେପିକୁ ୩ ସ୍ୱାଧୀନ ନିର୍ବାଚିତ ବିଧାୟକଙ୍କ ସମର୍ଥନ ମିଳିଛି। ହିସାରରେ ସାବିତ୍ରୀ ଜିନ୍ଦଲ, ବାହାଦୁର ଗଡରୁ ରାଜେଶ ଜୁନ ଓ ଗନୌରରେ ଦେବେନ୍ଦ୍ର କାଦିୟାନ ବିଜେପିକୁ ସେମାନଙ୍କ ସମର୍ଥନ ଦେଇଛନ୍ତି। ଗତ ବିଧାନସଭା ନିର୍ବାଚନରେ ସାବିତ୍ରୀ ଜିନ୍ଦଲ ବିଜେପିର ବିଦ୍ରୋହୀ ବିଧାୟକ ପ୍ରାର୍ଥୀ ଥିଲେ। ସେହିପରି ଦେବେନ୍ଦ୍ର କାଦିୟାନ ମଧ୍ୟ ବିଜେପି ପ୍ରାର୍ଥୀଙ୍କ ବିରୋଧରେ ଲଢି ବିଜୟୀ ହୋଇଛନ୍ତି। ହେଲେ ରାଜେଶ ଜୁନ କଂଗ୍ରେସର ବିଦ୍ରୋହୀ ବିଧାୟକ ପ୍ରାର୍ଥୀ ଥିଲେ।