ରାଞ୍ଚୀ ୧୫।୨: ଦିଲ୍ଲୀ ବିଧାନସଭା ନିର୍ବାଚନରେ ପରାସ୍ତ ହୋଇଥିବା ଆମ ଆଦମୀ ପାର୍ଟି (ଆପ)କୁ ବିଜେପି ଶାସିତ ଛତିଶଗଡ଼ ରୁ ବଡ଼ ଖୁସି ଖବର ମିଳିଛି। ବିଜେପି ଶାସିତ ରାଜ୍ୟରେ ହୋଇଥିବା ପୌର ନିର୍ବାଚନରେ ଅରବିନ୍ଦ କେଜରିୱାଲଙ୍କ ପାର୍ଟି ଖାତା ଖୋଲିଛି। ଆପ ବିଳାଶପୁରରେ ଏକ ନଗର ପାଳିକା ଆସନରେ ବିଜୟୀ ହୋଇଛି। ବୋଦରୀ ନଗରପାଳିକା ଅଧ୍ୟକ୍ଷ ଆସନରେ ଆପ ପ୍ରାର୍ଥୀ ନିଲମ ବିଜୟ ବର୍ମା ବିଜୟୀ ହୋଇଛନ୍ତି।
ଖାସ କଥା ଯାହା ତାହା ହେଉଛି ବୋଦରୀ ବିଳାଶପୁରର ସବୁଠୁ ବଡ଼ ନଗର ପାଳିକା। ଏହା ବିଧାନସଭା ବାଚସ୍ପତି ଧର୍ମରାଜ କୌଶିକଙ୍କ ନିର୍ବାଚନମଣ୍ଡଳି। ଏଠାରୁ ଆପ୍ ପ୍ରାର୍ଥୀ ବିଜୟ ବର୍ମା କଡ଼ା ପ୍ରତିଦ୍ୱନ୍ଦ୍ୱୀତାରେ ବିଜେପି ପ୍ରାର୍ଥୀଙ୍କୁ ପରାସ୍ତ କରିଛନ୍ତି। ବିଜୟଙ୍କୁ ୨୯୦ ଭୋଟରେ ବିଜେତା ଘୋଷଣା କରାଯାଇଛି। ବୋଦରୀ ନଗରପାଳିକାର ୩ଟି କାଉନସିଲର ପଦବୀ ଆପ୍ ଖାତାକୁ ଯାଇଥିବା ବେଳେ କୁସମୀର ଗୋଟିଏ ୱାର୍ଡରେ ଝାଡୁ ଜିତିଛି। ଆପ ର ଏହି ବିଜୟ ଏଥି ପାଇଁ ବି ଗୁରୁତ୍ୱପୂର୍ଣ୍ଣ ଯେ ପାର୍ଟି ଆଉ ଏକ ରାଜ୍ୟରେ ନିଜର ଉପସ୍ଥିତି ଜାହିର କରିଛି।
ଏହା ପୂର୍ବରୁ ମଧ୍ୟପ୍ରଦେଶ ପୌର ନିର୍ବାଚନରେ ଆମ ଆଦମୀ ପାର୍ଟିକୁ ସଫଳତା ମିଳିଥିଲା। ସିଙ୍ଗରୌଲୀରେ ଆପର ମେୟର ପ୍ରାର୍ଥୀ ବିଜୟୀ ହୋଇଥିଲେ। ଦିଲ୍ଲୀରେ ୧୦ ବର୍ଷ ପରେ ସଂଖ୍ୟାଗରିଷ୍ଠତା ହରାଇଥିବା ଆପର ପଞ୍ଜାବରେ ପୂର୍ଣ୍ଣ ବହୁମତର ସରକାର ରହିଛି। ଏହା ଛଡା ଗୁଜରାଟ, ଗୋଆ, ଜମ୍ମୁ-କାଶ୍ମୀର ବିଧାନସଭାରେ ମଧ୍ୟ ଆପ ବିଧାୟକ ଅଛନ୍ତି। ଆପ ଛତିଶଗଡ଼ରେ ଏପରି ଏକ ସମୟରେ ଖାତା ଖୋଲିଛି ଯେତେବେଳେ ଦିଲ୍ଲୀ ପରାଜୟ ପରେ ଦଳର ଭବିଷ୍ୟକୁ ନେଇ ଏବେ ପ୍ରଶ୍ନ ଉଠୁଛି।
ଛତିଶଗଡରେ ଏହି ବିଜୟ ଦିଲ୍ଲୀ ପର୍ଯ୍ୟନ୍ତ ଆପ ନେତା ଓ କାର୍ଯ୍ୟକର୍ତ୍ତାଙ୍କୁ ଉତ୍ସାହିତ କରିଛି। ଆପର ପୂର୍ବତନ ବିଧାୟକ ଏ ନେଇ ଏକ୍ସ ରେ ଏକ ପୋଷ୍ଟ କରିଛନ୍ତି। ଏଥିରେ ଆପକୁ କେଉଁ ପର୍ଯ୍ୟନ୍ତ ରୋକି ପାରିବେ ବୋଲି ସେ ପ୍ରଶ୍ନ ଉଠାଇଛନ୍ତି। ତେବେ ଛତିଶଗଡ ପୌର ନିର୍ବାଚନରେ ବିଜେପି ଉଲ୍ଲେଖନୀୟ ପ୍ରଦର୍ଶନ କରିଛି। ବିଜେପି ସମସ୍ତ ୧୦ଟି ଯାକ ନଗର ନିଗମରେ ବିଜୟୀ ହୋଇଛି। ତେବେ କିଛି ଆସନରେ ସ୍ୱାଧୀନ ଓ କଂଗ୍ରେସ ପ୍ରାର୍ଥୀ ମଧ୍ୟ ବିଜୟୀ ହୋଇଛନ୍ତି।
