ଗମ୍ଭୀର-ଅଗରକରଙ୍କ ପାଇଁ ହାରିଲା ଟିମ୍, ଦକ୍ଷିଣ ଆଫ୍ରିକାଠୁ ପରାସ୍ତ ପରେ ଟାର୍ଗେଟରେ କୋଚ୍

କୋଲକାତା, ୧୭|୧୧: କୋଲାକାତାରେ ଦକ୍ଷିଣ ଆଫ୍ରିକା ବିପକ୍ଷରେ ଖେଳାଯାଇଥିବା ପ୍ରଥମ ଟେଷ୍ଟରେ ଲଜ୍ଜାଜନକ ପରାସ୍ତ ହୋଇଛି ଟିମ୍ ଇଣ୍ଡିଆ । ଦଳ ମାତ୍ର ୧୨୪ ରନର ବିଜୟ ଲକ୍ଷ୍ୟକୁ ହାସଲ କରିପାରିନଥିଲା । ଦ୍ୱିତୀୟ ଇନିଂସରେ ଟିମ୍ ତିନି ଅଙ୍କ ଛୁଇଁ ନପାରି ଅଲଆଉଟ୍ ହୋଇଯାଇଥିଲା । ଯାହାକୁ ନେଇ କୋଚ୍ ଏବଂ ସିଲେକ୍ଟରଙ୍କ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ଅନେକ ପୂର୍ବତନ ଖେଳାଳି କୋଚ ଗୌତମ ଗମ୍ଭୀରଙ୍କ ସହ ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କୁ ଟାର୍ଦେଟ୍ କରିଛନ୍ତି ।

ଇଡେନଗାର୍ଡନରେ ଖେଳାଯାଇଥିବା ମୁକାବିଲାରେ ପ୍ରଥମେ ବ୍ୟାଟିଂ କରିଥିଲା ଦକ୍ଷିଣ ଆଫ୍ରିକା । ଦଳ ଭାରତୀୟ ବୋଲରଙ୍କ ମୁକାବିଲା କରିପାରିନଥିଲା । ପ୍ରଥମ ଇନିଂସରେ ମାତ୍ର ୧୫୯ ରନରେ ଅଲଆଉଟ୍ ହୋଇଯାଇଥିଲା । ଜବାବରେ ଭାରତ ୧୮୯ କରି ପାରିଥିଲା । ସେହିପରି ଦ୍ୱିତୀୟ ଇନିଂସରେ ଦକ୍ଷିଣ ଆଫ୍ରିକା ବ୍ୟାଟର ଫେଲ୍ ମାରିଥିଲେ । ମାତ୍ର ୧୫୩ ରନ୍ କରିପାରିଥିଲେ । ଫଳରେ ଭାରତକୁ ବିଜୟ ପାଇଁ ୧୨୪ ରନ୍ ଦରକାର ଥିଲା ।

କିନ୍ତୁ ୧୨୪ ରନ୍ କରିପାରିନଥିଲା ଟିମ୍ ଇଣ୍ଡିଆ । ଓ୍ୱାସିଂଟନ ସୁନ୍ଦରଙ୍କୁ ଛାଡିଦେଲେ କାହା ବ୍ୟାଟରୁ ରନ୍ ବାହାରିନଥିଲା । ଏପରିକି ଦଳ ୯୩ ରନରେ ଅଲଆଉଟ୍ ହୋଇଯାଇ ୩୦ ରନରେ ମାତ୍ ଖାଇଥିଲା । ତେବେ ଦଳର ଏପରି ଅବସ୍ଥା ପାଇଁ କୋଚଙ୍କୁ ଦାୟୀ କରିଛନ୍ତି ପୂର୍ବତନ କ୍ରିକେଟର ଭେଙ୍କଟେଶ ପ୍ରସାଦ ।

ସେ କହିଛନ୍ତି ଯେ, ପ୍ରଥମ ଦୁଇ ଦିନରେ ଭାରତୀୟ ଖେଳାଳି ଦବଦବା ହାସଲ କରିଥିଲେ । କିନ୍ତୁ ବ୍ୟାଟରମାନଙ୍କ ବ୍ୟାଟ୍ ଚାଲିନଥିଲା । ଏଥିପାଇଁ କୋଚ୍ ଏବଂ ଚୟନକର୍ତ୍ତା ଦାୟୀ । ଦଳରେ ଚୟନ ସଠିକ ଭାବେ ହୋଇ ନାହିଁ । ଗମ୍ଭୀର କୋଚ୍ ଭାର ଗ୍ରହଣ କରିବା ପରେ ଟେଷ୍ଟରେ ଭାରତର ରେକର୍ଡ ଖରାପ ହେବାରେ ଲାଗିଛି । ଦଳରେ କାହାକୁ ନିଆଯିବା ଉଚିତ ତାହା ସେ ଜାଣନ୍ତି ନାହିଁ ।

ସେ ଆହୁରି କହିଛନ୍ତି ଯେ, ଭାରତ ସୀମିତ ଓଭରରେ ଭଲ ପ୍ରଦର୍ଶନ କରୁଛି । କିନ୍ତୁ ଭଲ ଟେଷ୍ଟ ଦଳ ଭାବେ ଫେଲ୍ ହୋଇଛି । ଗମ୍ଭୀର ଆସିବା ପରଠୁ ସ୍ଥିତି ଆହୁରି ସଙ୍ଗୀନ ହେବାକୁ ଲାଗିଲାଣି । ବିନା କୌଣସି ପ୍ଲାନରେ ଖେଳାଳିଙ୍କୁ ଚୟନ କରାଯାଉଛି ବୋଲି ସେ କହିଛନ୍ତି ।