ମୁମ୍ଵାଇ ୧୨।୦୧; ୨୦୧୨ରେ କରନ୍ ଜୋହରଙ୍କ ବ୍ୟାନରରେ ନିର୍ମିତ ହୋଇଥିବା ‘ଷ୍ଟୁଡେଣ୍ଟ ଅଫ୍ ଦ ଇୟର’ ଫିଲ୍ମ ଜରିଆରେ ଆଲିଆ ଭଟ୍ଟ, ବରୁଣ ଧୱନ ଓ ସିଦ୍ଧାର୍ଥ ମଲହୋତ୍ରା ବଲିଉଡ୍ରେ ପାଦ ରଖିଥିଲେ । ଫିଲ୍ମର ଦ୍ୱିତୀୟ ଭାଗରେ ଟାଇଗର ଶ୍ରଫ୍ଙ୍କ ସହିତ ଅନନ୍ୟା ପାଣ୍ଡେ ଓ ତାରା ସୁତାରିଆ ନଜର ଆସିଥିଲେ । ଏବେ ନିର୍ମାତାମାନେ ଏହାର ତୃତୀୟ ଭାଗ ‘ଷ୍ଟୁଡେଣ୍ଟ ଅଫ୍ ଦ ଇୟର-୩’ ବନାଇବାକୁ ପ୍ରସ୍ତୁତି ଚଳାଇଛନ୍ତି । ତେବେ ଏହା ଫିଲ୍ମ ନୁହେଁ, ବରଂ ଏକ ୱେବସିରିଜ୍ ହେବ।
ଧର୍ମା ପ୍ରଡକ୍ସନ୍ର ଡିଜିଟାଲ ଶାଖା ଧର୍ମାଟିକ୍ ଏଣ୍ଟରଟେନମେଣ୍ଟ ଏହାର ନିର୍ମାଣ କରିବାକୁ ଥିବାବେଳେ ରିମା ମାୟା ନିର୍ଦ୍ଦେଶନା ଦେବେ । ସେଥିରେ ପୂଜା ବେଦୀଙ୍କର ଝିଅ ଅଲାୟା ଏଫ୍ଙ୍କୁ ଦେଖିବାକୁ ମିଳିପାରେ ବୋଲି ଚର୍ଚ୍ଚା ଚାଲିଛି । ସିରିଜ୍ରେ ଅଲାୟାଙ୍କର ଚରିତ୍ର ଅତ୍ୟନ୍ତ ପ୍ରଭାବଶାଳୀ ହୋଇଥିବାବେଳେ ଏହା ତାଙ୍କ କ୍ୟାରିୟର ଲାଗି ଟର୍ଣ୍ଣିଂପଏଣ୍ଟ ସାଜିପାରେ ବୋଲି ତାଙ୍କ ସହ ଘନିଷ୍ଠ ଜଣେ ବ୍ୟକ୍ତି ପ୍ରକାଶ କରିଛନ୍ତି । ଅଲାୟାଙ୍କ ସହିତ ଶନାୟା କପୁର ବି ଏଥିରେ ନଜର ଆସିପାରନ୍ତି।
ତେବେ ଧର୍ମା ପ୍ରଡକନ୍ସ ପକ୍ଷରୁ ଏ ସଂପର୍କରେ ଆନୁଷ୍ଠାନିକ ଭାବେ ଘୋଷଣା ହୋଇନାହିଁ । ଅଲାୟାଙ୍କୁ ଗତବର୍ଷ ଦୁଇଟି ବଡ଼ ପ୍ରୋଜେକ୍ଟରେ ଦେଖିବାକୁ ମିଳିଥିଲା। ‘ବଡ଼େ ମିୟାଁ ଛୋଟେ ମିୟାଁ’ରେ ସେ ଜଣେ ହ୍ୟାକରଙ୍କ ଭୂମିକାରେ ନଜର ଆସିଥିଲେ। ‘ଶ୍ରୀକାନ୍ତ’ରେ ରାଜକୁମାର ରାଓଙ୍କ ସହିତ ଯୋଡ଼ି ବାନ୍ଧିଥିଲେ ସେ ।
