ନୂଆଦିଲ୍ଲୀ: ଚଳିତ ବର୍ଷ ଅଗଷ୍ଟରେ ଗତ ବର୍ଷ ତୁଳନାରେ ଅତ୍ୟଧିକ ବର୍ଷା ହୋଇଛି । ଅର୍ଥାତ୍ ଚରମ ସ୍ତରର ବର୍ଷା । ଗତ ବର୍ଷ ଅଗଷ୍ଟର ୩୧ ଦିନ ମଧ୍ୟରୁ ୧୭ ଦିନ ଅତ୍ୟଧିକ ବର୍ଷା ହୋଇଥିବା ବେଳେ ଚଳିତ ବର୍ଷ ଏହା ୨୨ ଦିନ ରହିଛି । ଅର୍ଥାତ୍ ବର୍ଷା ହୋଇଥିବା ଦିନ ସଂଖ୍ୟାରେ ୩୦ ପ୍ରତିଶତ ବୃଦ୍ଧି ହୋଇଛି । ଭାରତୀୟ ପାଣିପାଗ ବିଜ୍ଞାନର ସୂଚନାରୁ ଏହା ସାମନାକୁ ଆସିଛି ।
୨୦୨୪ ଅଗଷ୍ଟ ୧ରୁ ୩୧ ମଧ୍ୟରେ ତିନି ଦିନ ଗୁଜରାଟ, ତ୍ରିପୁରା ଏବଂ ରାଜସ୍ଥାନର ତିନି ଷ୍ଟେସନରେ ଅସାଧାରଣ ବର୍ଷା ହୋଇଛି ।
- ଅଗଷ୍ଟ ୧୦ରେ ରାଜସ୍ଥାନରେ ୨୪ ଘଣ୍ଟାରେ ୩୮୦ ମିଲିମିଟର ବର୍ଷା ହୋଇଛି । ହାରାହାରି ବର୍ଷା ୩୨୯ ମିଲିମିଟର ରହିଛି ।
- ଅଗଷ୍ଟ ୨୧ରେ ଦକ୍ଷିଣ ତ୍ରିପୁରାର ବାଗାଫା ଷ୍ଟେସନରେ ୪୯୦ ମିଲିମିଟର ବର୍ଷା ରେକର୍ଡ ହୋଇଛି ।
- ଅଗଷ୍ଟ ୨୭ରେ ଗୁଜରାଟର ଦ୍ୱାରକା ଖମ୍ଭଲିଆ ଷ୍ଟେସନରେ ୪୩୦ ମିଲିମିଟର ଏବଂ ଜାମନଗର ଷ୍ଟେସନରେ ୩୮୦ ମିଲିମିଟର ବର୍ଷା ରେକର୍ଡ ହୋଇଛି ।
ପାଣିପାଗ ବିଭାଗ ଅନୁସାରେ, ଯଦି କୌଣସି କ୍ଷେତ୍ରରେ ୨୪ ଘଣ୍ଟାରେ ୨୦୪.୫ ମିଲିମିଟର କିମ୍ୱା ତା’ଠାରୁ ଅଧିକ ବର୍ଷ ହୁଏ, ତେବେ ତାହାକୁ ଅତ୍ୟଧିକ ବର୍ଷା ବୋଲି ଧରାଯାଏ । ସେହିପରି ଯଦି କୌଣସି ଷ୍ଟେସନରେ ଦୈନିକ ବର୍ଷା ସେହି ମାସ କିମ୍ୱା ମୌସୁମୀ ପାଇଁ ସବୁଠୁ ଅଧିକ ରେକର୍ଡ କରାଯାଏ, ତେବେ ତାହାକୁ ଅସାଧାରଣ ରୂପେ ବଡ଼ ବର୍ଷା କୁହାଯାଏ ।
ଆଜ୍ତକ୍ ରିପୋର୍ଟ ଅନୁସାରେ ଅତ୍ୟଧିକ ବର୍ଷାକୁ ତିନୋଟି ସ୍ତରରେ ଭାଗ କରାଯାଇଛି । ୨୪ ଘଣ୍ଟାରେ ୨୧୦ରୁ ୩୦୦ ମିଲିମିଟର, ୩୦୧ରୁ ୪୦୦ ମିଲିମିଟର ଏବଂ ୪୦୦ ମିଲିମିଟରରୁ ଅଧିକ । ଦେଶର ୧୪ ରାଜ୍ୟ ଏବଂ କେନ୍ଦ୍ର ଶାସିତ ପ୍ରଦେଶରେ ୧୧୭ ୱେଦର ଷ୍ଟେସନ ରହିଛି, ଯେଉଁଠି ୨୪ ଘଣ୍ଟାରେ ୨୧୦ରୁ ୩୦୦ ମିଲିମିଟର ଯାଏ ବର୍ଷା ହୋଇଛି । ଗୁଜରାଟ, ମେଘାଳୟ, ରାଜସ୍ଥାନ, ତେଲଙ୍ଗାନା ଏବଂ ତ୍ରିପୁରାରେ ୩୪ ୱେଦର ଷ୍ଟେସନ ଏପରି ରହିଛି ଯେଉଁଠି ୩୧୦ରୁ ୪୦୦ ମିଲିମିଟର ଯାଏ ବର୍ଷା ରେକର୍ଡ ହୋଇଛି ।
