ପୁରୀ ୧୨।୦୧ : ପୁରୀରେ ବାଗେଶ୍ୱର ବାବା । ଶ୍ରୀକ୍ଷେତ୍ରରେ ବାଗେଶ୍ୱର ଧାମ୍ ବାବା ଧୀରେନ୍ଦ୍ର କ୍ରୀଷ୍ଣ ଶାସ୍ତ୍ରୀ । ବଡ଼ଦେଉଳକୁ ଯାଇ ମହାପ୍ରଭୁଙ୍କ ଦର୍ଶନ ସହ ଆଶିଷ ଲାଭ କରିଛନ୍ତି । ଏହାପରେ ମା ବିମଳା ଓ ମହାଲକ୍ଷ୍ମୀଙ୍କୁ ଦର୍ଶନ କରିବା ସହ ବିଶେଷ ପୂଜା ମଧ୍ୟ କରିଥିଲେ । ଏହାବ୍ୟତୀତ ଶ୍ରୀମନ୍ଦିର ଭିତରେ ଥିବା ସାକ୍ଷୀଗୋପାଳ ମନ୍ଦିରରେ ପ୍ରସାଦ ସେବନ କରିଥିଲେ ।
ଏହି ସମୟରେ ସେ କହିଛନ୍ତି ଯେ, ହିନ୍ଦୁ ରାଷ୍ଟ୍ର ଗଠନକୁ ଶସକ୍ତ କରିବା ସହ ବିଶ୍ୱର ମଙ୍ଗଳ କାମନା ନେଇ ମହାବାହୁଙ୍କ ନିକଟରେ ପ୍ରାର୍ଥନା କରିଛି । ଭାଗ୍ୟରେ ଥିଲେ ମିଳେ ମହାପ୍ରଭୁଙ୍କ ପ୍ରସାଦ । ଗତ କିଛି ଦିନ ହେବ ଗୋମାତାଙ୍କ ହତ୍ୟା ବଢିବାରେ ଲାଗିଛି । ତେଣୁ ସେମାନଙ୍କ ସୁରକ୍ଷା ପାଇଁ ଆହ୍ୱାନ୍ ଦେଇଛନ୍ତି ବାବା ବାଗେଶ୍ୱର। ଏହି ସମୟରେ ଶ୍ରୀମନ୍ଦିରରେ ବାବାଙ୍କୁ ଦେଖିବାକୁ ପ୍ରବଳ ଭିଡ ଜମିଥିଲା ।
ଶନିବାର ପୁରୀ ଗସ୍ତରେ ଆସିଥିବା ବେଳେ ବଳିଆପଣ୍ଡା ସ୍ଥିତ ଏକ ହୋଟେଲରେ ଅବସ୍ଥାନ କରିଛନ୍ତି। ଉକ୍ତ ହୋଟେଲକୁ ସମ୍ପୂର୍ଣ୍ଣ କଡା ସୁରକ୍ଷା ବଳୟ ମଧ୍ୟରେ ବାବାଙ୍କ ସୁରକ୍ଷାକର୍ମୀ ରଖିଛନ୍ତି। ବାଗେଶ୍ବର ବାବାଙ୍କୁ ଦେଖିବା ପାଇଁ ହୋଟେଲ ସମ୍ମୁଖରେ ପ୍ରବଳ ଲୋକଙ୍କ ଭିଡ଼ ଦେଖିବାକୁ ମିଳିଥିବା ବେଳେ ବାବାଙ୍କ ସହ ସାକ୍ଷାତ କରିବାକୁ କାହାକୁ ସୁଯୋଗ ମିଳୁନାହିଁ ବୋଲି ଜଣାପଡିଛି।
