ଜମ୍ମୁରେ ବିବାହ ଉତ୍ସବରେ ଗୁଳିମାଡ଼, ଅଳ୍ପକେ ବର୍ତ୍ତିଲେ ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା

ନୂଆଦିଲ୍ଲୀ: ନ୍ୟାସନାଲ କନଫରେନ୍ସ ସଭାପତି ଏବଂ ପୂର୍ବତନ ଜମ୍ମୁ-କାଶ୍ମୀର ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲାଙ୍କ ଉପରକୁ ଗୁଳିମାଡ଼। ଜମ୍ମୁର ଗ୍ରେଟର କୈଳାସ ଅଞ୍ଚଳକୁ ଏକ ବିବାହ ସମାରୋହକୁ ଯାଇଥିବା ସମୟରେ ଏହି ଗୁଳିକାଣ୍ଡ ହୋଇଥିବା ଜଣାପଡ଼ିଛି। ତେବେ ଡାକ୍ତର ଫାରୁକ ଅବଦୁଲ୍ଲା ଅଳ୍ପକେ ବର୍ତ୍ତିଯାଇଛନ୍ତି। ଏହି ଘଟଣା ପରେ ଅଞ୍ଚଳରେ ଆତଙ୍କ ଖେଳିଯାଇଛି।

ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ସମଗ୍ର ଅଞ୍ଚଳକୁ ଘେରାବନ୍ଦୀ କରିଦେଇଛି। ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ପୋଲିସ ଗୁଳି ଚଳାଇଥିବା ସନ୍ଦିଗ୍ଧ ବ୍ୟକ୍ତିଙ୍କୁ ଗିରଫ କରିଛି। ଫାରୁକ ଗ୍ରେଟର କୈଳାସ ଅଞ୍ଚଳରେ ଜଣେ ଓକିଲଙ୍କ ବିବାହରେ ଯୋଗ ଦେବାକୁ ଯାଇଥିଲେ। ଆକ୍ରମଣର କାରଣ ଏବଂ ଉଦ୍ଦେଶ୍ୟ ଏପର୍ଯ୍ୟନ୍ତ ଜଣାପଡ଼ିନାହିଁ। ଅଭିଯୁକ୍ତଙ୍କୁ ପଚରାଉଚରା କରାଯାଉଛି।

ଫାରୁକଙ୍କ ସହ ଥିଲେ ଉପମୁଖ୍ୟମନ୍ତ୍ରୀ ସୁରିନ୍ଦର ଚୌଧୁରୀ

ଜମ୍ମୁ- କାଶ୍ମୀରର ଉପମୁଖ୍ୟମନ୍ତ୍ରୀ ସୁରିନ୍ଦର ଚୌଧୁରୀ ମଧ୍ୟ ଫାରୁକଙ୍କ ସହ ଏହି ସମାରୋହରେ ଥିଲେ। ଅଧିକାରୀଙ୍କ ସୂଚନା ଅନୁସାରେ, ଅଭିଯୁକ୍ତର ପରିଚୟ କମଲ ସିଂହ ଜାମୱାଲ ଭାବରେ ଚିହ୍ନଟ ହୋଇଛି। ଘଟଣା ପରେ ତୁରନ୍ତ ସୁରକ୍ଷା ବାହିନୀ ତାଙ୍କୁ ଗିରଫ କରିଛନ୍ତି। ଗଣମାଧ୍ୟମର ରିପୋର୍ଟ ଅନୁସାରେ, ବିବାହ ସମାରୋହରୁ ଫେରୁଥିବା ସମୟରେ ଜଣେ ବନ୍ଧୁକଧାରୀ ଅବଦୁଲାଙ୍କ ଗାଡ଼ି ଉପରକୁ ଗୁଳି ଚଳାଇଥିଲେ।

କ’ଣ କହିଲେ ଉପମୁଖ୍ୟମନ୍ତ୍ରୀ ?

ସେପଟେ ଗ୍ରେଟର କୈଳାଶ ସ୍ଥିତ ରୟାଲ ପାର୍କରେ ହୋଇଥିବା ଘଟଣାକୁ ନେଇ ଜମ୍ମୁ-କାଶ୍ମୀର ଉପମୁଖ୍ୟମନ୍ତ୍ରୀ ସୁରିନ୍ଦର ଚୌଧୁରୀ କଡ଼ା ଅସନ୍ତୋଷ ପ୍ରକାଶ କରିଛନ୍ତି। ସେ କହିଛନ୍ତି ଘଟଣା ସମୟରେ ସେ ନ୍ୟାସନାଲ କନଫରେନ୍ସର ବରିଷ୍ଠ ନେତା ଫାରୁକ ଅବଦୁଲ୍ଲା ଏବଂ ନାସିରଙ୍କ ସହ ଥିଲେ। ପୋଲିସକୁ ପଚାରିବା ଦରକାର ଯେ, ଏତେ ବଡ଼ ତ୍ରୁଟି କିଭଳି ହେଲା। ସ୍ଥାନୀୟ ପୋଲିସର କୌଣସି ଯବାନ ଘଟଣାସ୍ଥଳରେ ନଥିଲେ। ଯାହା ସୁରକ୍ଷା ବ୍ୟବସ୍ଥାରେ ବଡ଼ ଅବହେଳାକୁ ଦର୍ଶାଉଛି।