ବେଙ୍ଗାଲୁରୁ: ଜନ ଅସନ୍ତୋଷ ଆଗରେ ନରମିଲେ କର୍ଣ୍ଣାଟକ ସରକାର। କମିବ ମେଟ୍ରୋ ଟ୍ରେନ୍ ଭଡ଼ା। ଏଥିରେ ୩୦ ପ୍ରତିଶତ ଭଡ଼ା କାଟ ତୁରନ୍ତ ଲାଗୁ ହୋଇପାରେ। ଏନେଇ ବେଙ୍ଗାଲୁରୁ ମେଟ୍ରୋ ରେଳ ନିଗମ ଲିମିଟେଡ୍ (ବିଏମଆରସିଏଲ୍) ପରିଚାଳନା ନିର୍ଦ୍ଦେଶକ ମହେଶ୍ୱର ରାଓ ସୂଚନା ଦେଇଛନ୍ତି। ସେ କହିଛନ୍ତି ଯେ ବୋର୍ଡ ଜନସାଧାରଣଙ୍କ ମତାମତକୁ ସମୀକ୍ଷା କରିଛି ଏବଂ କିଛି ନିର୍ଦ୍ଦିଷ୍ଟ ସ୍ଥାନରେ ଅସ୍ୱାଭାବିକ ଭଡା ବୃଦ୍ଧିକୁ ହ୍ରାସ କରିବାକୁ ନିଷ୍ପତ୍ତି ନିଆଯାଇଛି।
କିଛି କିଛି ରୁଟ୍ରେ ରେଳ ଭଡ଼ା କମ କରାଯିବ। ଫଳରେ ଅଭିଯୋଗ କରୁଥିବା ୩୦-୪୦ ପ୍ରତିଶତ ଯାତ୍ରୀ ଏଥିରେ ଲାଭବାନ ହେବେ। ଲୋକଙ୍କ ସ୍ୱାର୍ଥକୁ ହିତରେ ରଖି ଦରବୃଦ୍ଧି କମିଟି ଏହି ନିଷ୍ପତ୍ତି ନେଇଛି। ନିକଟରେ ବେଙ୍ଗାଲୁରୁ ମେଟ୍ରୋ ଟ୍ରେନ୍ ଭଡ଼ା ବୃଦ୍ଧି ହେବା ପରେ ରାଜ୍ୟବାସୀ ସରକାରଙ୍କୁ କଡ଼ା ନିନ୍ଦା କରିଥିଲେ। ଏମିତିକ ସୋସିଆଲ୍ ମିଡିଆରେ ବୟକଟ ମେଟ୍ରୋ ଟ୍ରେଣ୍ଡ କରିଥିଲା।
ଭଡ଼ା ବୃଦ୍ଧି ପୂର୍ବରୁ ବେଙ୍ଗାଲୁରୁ ମେଟ୍ରୋ ଦୈନିକ ପ୍ରାୟ ୨ କୋଟି ଟଙ୍କା ଆୟ କରିଥିଲା। ହେଲେ ଦର ବୃଦ୍ଧିର ତିନି ଦିନ ମଧ୍ୟରେ ରୋଜଗାର ବଢ଼ି ଫେବୃଆରୀ ୯ ତାରିଖ ସୁଦ୍ଧା ଦୈନିକ ୩ କୋଟି ଟଙ୍କା ରାଜସ୍ୱ ଛୁଇଁଛି। ଏଥିରେ ୧.୫ ପ୍ରତିଶତ ବୃଦ୍ଧି ହୋଇଛି।
ବେଙ୍ଗାଲୁରୁ ମେଟ୍ରୋରେ ପ୍ରତିଦିନ ପାଖାପାଖି ୮.୫ ରୁ ୯ ଲକ୍ଷ ଯାତ୍ରୀ ଯାତ୍ରା କରନ୍ତି। ହେଲେ ଦର ବୃଦ୍ଧି ପରେ ଏଥିରେ ଦୈନିକ ୨୦ରୁ ୩୦ ହଜାର ଯାତ୍ରୀଙ୍କ ସଂଖ୍ୟା କମି ଯାଇଥିଲା।
