ନୂଆଦିଲ୍ଲୀ: ଭରତନାଟ୍ୟମର ଅନ୍ୟତମ ମହାନ ନୃଶ୍ୟଶିଳ୍ପୀ/ନୃତ୍ୟ ଗୁରୁ ୟାମିନୀ କୃଷ୍ଣମୂର୍ତ୍ତିଙ୍କ ପରଲୋକ ହୋଇଛି । ୮୪ ବର୍ଷ ବୟସରେ ଶନିବାର ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ବାର୍ଦ୍ଧକ୍ୟଜନିତ ସମସ୍ୟା ଯୋଗୁଁ ଗତ ୭ ମାସ ଧରି ସେ ଆଇସିୟୁରେ ଭର୍ତ୍ତି ଥିଲେ । ଏହି ଦୁଃଖଦ ଖବରରେ ୟାମିନୀଙ୍କ ଅଗଣତି ପ୍ରଶଂସକଙ୍କ ମଧ୍ୟରେ ଶୋକ ଛାୟା ଖେଳିଯାଇଛି ।
ମିଳିଥିବା ସୂଚନା ଅନୁସାରେ କୃଷ୍ଣାମୂର୍ତ୍ତିଙ୍କ ପାର୍ଥୀବ ଶରୀରକୁ ରବିବାର ସକାଳ ୯ଟାରେ ତାଙ୍କ ସଂସ୍ଥା ୟାମିନୀ ସ୍କୁଲ୍ ଅଫ୍ ଡ୍ୟାନ୍ସକୁ ଅଣାଯିବ । ଯେଉଁଥିରେ ତାଙ୍କ ଶେଷ ଦର୍ଶନ ପାଇଁ ବ୍ୟବସ୍ଥା କରାଯିବ । ତେବେ ବର୍ତ୍ତମାନ ସୁଦ୍ଧା ତାଙ୍କ ଅନ୍ତିମ ସଂସ୍କାର ପାଇଁ ଚୂଡ଼ାନ୍ତ ବିବରଣୀ ଦିଆଯାଇ ନାହିଁ ।
ୟାମିନୀ କୃଷ୍ଣାମୂର୍ତ୍ତିଙ୍କ ଜନ୍ମ ଅବିଭକ୍ତ ଆନ୍ଧ୍ର ପ୍ରଦେଶର ଚିତ୍ତୁର ଜିଲ୍ଲାର ମଦନପଲ୍ଲୀରେ ହୋଇଥିଲା । ତେବେ ତାମିଲନାଡ଼ୁର ଚିଦାମ୍ୱରମରେ ତାଙ୍କ ପାଳନ-ପୋଷଣ ହୋଇଥିଲା । ୟାମିନୀଙ୍କୁ ତିରୁମାଲା ତିରୁପତି ଦେବସ୍ଥାନମର ନିବାସୀ ନର୍ତ୍ତକୀର ସମ୍ମାନ ପ୍ରାପ୍ତ ଥିଲା । କୁଚିପୁଡ଼ି ନୃତ୍ୟ ଶୈଳୀର ମଶାଲ ବାହାକ ଭାବେ ସେ ପରିଚିତ । ତାଙ୍କ ସଂସ୍ଥା ୟାମିନୀ ସ୍କୁଲ୍ ଅଫ୍ ଡ୍ୟାନ୍ସ, ହୋଜ ଖାସ୍ ନୂଆଦିଲ୍ଲୀରେ ଯୁବ ନର୍ତ୍ତକୀଙ୍କୁ ନୃତ୍ୟ ଶିକ୍ଷା ଦେଉଛି । ୟାମିନୀ କୃଷ୍ଣମୂର୍ତ୍ତି ଅନେକ ସମ୍ମାନରେ ସମ୍ମାନିତ । ୧୯୬୮ ମସିହାରେ ପଦ୍ମଶ୍ରୀ, ୨୦୦୧ରେ ପଦ୍ମ ଭୂଷଣ ଏବଂ ୨୦୧୬ରେ ପଦ୍ମ ବିଭୂଷଣରେ ସମ୍ମାନିତ ହୋଇଥିଲେ ।
