ବୈଷ୍ଣୋଦେବୀ ମେଡିକାଲ କଲେଜରେ ମୁସଲିମ ଛାତ୍ରଙ୍କ ଆଡମିଶନ ନେଇ ବିବାଦ, ହିନ୍ଦୁଙ୍କୁ ମିଳିଛି ମାତ୍ର ୧୦% ସିଟ୍

ନୂଆଦିଲ୍ଲୀ, ୨୧|୧୧: ମେଡିକାଲ କଲେଜରେ ଆଡମିଶନ କରିଥିବା ୯୦ ପ୍ରତିଶତ ଛାତ୍ର ହେଲେ ମୁସଲିମ । ଯାହାକୁ ନେଇ ବିବାଦ ଆରମ୍ଭ ହୋଇଛି । ଶ୍ରୀ ମାତା ବୈଷ୍ଣୋଦେବୀ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ଏକ୍ସଲେନ୍ସରେ ନାଁ ଲେଖାକୁ ନେଇ ଏପରି ଘଟଣା ସାମ୍ନାକୁ ଆସିଛି । ଯାହାକୁ କିଛି ସଙ୍ଗଠନ ବିରୋଧ କରି ରାସ୍ତାକୁ ଓହ୍ଲାଇଛନ୍ତି । କେବଳ ଏତିକି ନୁହେଁ ନାଁ ଲେଖାଇଥିବା ଛାତ୍ରଙ୍କ ଆଡମିଶନ ବାତିଲ କରିବାକୁ ସେମାନେ ଦାବି କରିଛନ୍ତି ।

ଇଣ୍ଡିଆନ୍ ଏକ୍ସପ୍ରେସର ଖବର ଅନୁସାରେ, ଜମ୍ମୁର କତ୍ରାରେ ରହିଛି ଶ୍ରୀ ମାତା ବୈଷ୍ଣୋଦେବୀ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ଏକ୍ସଲେନ୍ସ । ଯେଉଁଥିରେ ପ୍ରତମ ବ୍ୟାଚ୍ ଆଡମିଶନ ତାଲିକା ପ୍ରକାଶ ପରେ ବିବାଦ ସୃଷ୍ଟି ହୋଇଥିଲା । କାରଣ କଲେଜର ଏଣ୍ଟ୍ରାନ୍ସରେ ୫୦ ଜଣ କୃତକାର୍ଯ୍ୟ କରିଥିଲେ । ୩୬ ଜଣ କାଶ୍ମୀର ଏବଂ ୩ ଜଣ ଜମ୍ମୁର ଛାତ୍ର ଆଡମିଶନ କରିସାରିଛନ୍ତି । ଆଡମିଶନ ନେଇଥିବା ଛାଚ୍ରଙ୍କ ମଧ୍ୟରୁ ମୁସଲିମ ଛାତ୍ରଙ୍କ ସଂଖ୍ୟ ଅଧିକ ଥିବା ଜଣାପଡିଛି ।

ଖବର ସାମ୍ନାକୁ ଆସିବା ପରେ ହିନ୍ଦୁ ସଙ୍ଗଠନର ଅନେକ କର୍ମୀ କଲେଜ ବାହାରେ ବିରୋଧ ପ୍ରଦର୍ଶନ କରିଥିଲେ । ସେମାନେ କଲେଜ କର୍ତ୍ତୃପକ୍ଷଙ୍କ କୁଶ ପୁତଳିକା ମଧ୍ୟ ଦାହ କରିଥିବା ଦେଖିବାକୁ ମିଳିଥିଲା । ତେବେ ଘଟଣାକୁ ନେଇ ଉଧମପୁରର ବିଜେପି ବିଧାୟକ ଆରଏସ ପଠାନିଆ କହିଛନ୍ତି ଯେ, କଲେଜର ବିକାଶ ପାଇଁ ବୈଷ୍ଣୋଦେବୀ ମନ୍ଦିରରୁ ଅର୍ଥ ଆସୁଛି । ଏହାକୁ ମୁସଲିମ ଛାତ୍ରଙ୍କ ପାଇଁ ବ୍ୟବହାର କରାଯାଇ ପାରିବ ନାହିଁ । କଲେଜର ସିଟ୍ ହିନ୍ଦୁଙ୍କ ପାଇଁ ସଂରକ୍ଷିତ ରହିବା ଉଚିତ । ବୈଷ୍ଣୋଦେବୀ ମେଡିକାଲ କଲେଜ ଅଳ୍ପସଂଖ୍ୟକଙ୍କ କଲେଜ ନୁହେଁ ବୋଲି ସେ କହିଛନ୍ତି ।

ଜମ୍ମୁ-କାଶ୍ମୀରର ଏକ ହିନ୍ଦୁବାଦୀ ସଙ୍ଗଠନର ସଭାପତି କହିଛନ୍ତି ଯେ, ଆଡମିଶନ ଉପରେ ରୋକ୍ ଲଗାଯାଉ । ଯାହା ଭୁଲ କଲେଜ କରିଛି ତାହା ସୁଧାରିବା ଦରକାର । ଅଧିକରୁ ଅଧିକ ହିନ୍ଦୁ ଛାତ୍ରଙ୍କୁ ସୁଯୋଗ ମିଳିବା ଆବଶ୍ୟକ । ଯେଉଁ ମୁସଲିମ ଆଡମିଶନ କରିଛନ୍ତି ସେମାନଙ୍କୁ ବାଦ୍ ଦିଆଯାଉ ବୋଲି ସେ ଦାବି କରିଛନ୍ତି ।

ସେ ଆହୁରି କହିଛନ୍ତି ଯେ, କାଶ୍ମୀର ଛାତ୍ର ଆଡମିଶନ ନେଲେ ତାଙ୍କର ଅସୁବିଧା ନାହିଁ । କିନ୍ତୁ ହିନ୍ଦୁଙ୍କୁ ଅଗ୍ରାଧିକାର ମିଳିବା ଉଚିତ । ସେହିପରି ବିଧାୟକ ପଠାନିଆ କହିଛନ୍ତି ଯେ, ଅଳ୍ପସଂଖ୍ୟକଙ୍କ ପଇଁ ଉଦିଷ୍ଟ ମେଡିକାଲ କଲେଜରେ ସରକାରଙ୍କ ତରଫରୁ ସାହାଯ୍ୟ ମିଳିଥାଏ । କିନ୍ତୁ ବୈଷ୍ଣୋଦେବୀ କଲେଜ ମନ୍ଦିର ପାଣ୍ଠିରେ ଚାଲୁଛି । ତେଣୁ ଏଥିରେ ଧର୍ମୀୟ ଭାବନା କଥା ଆସୁଛି ।

ତେବେ କଲେଜ କର୍ତ୍ତୃପକ୍ଷ କହିଛନ୍ତି ଯେ, ନ୍ୟାସନାଲ ମେଡିକାଲ କାଉନସିଲର ମାର୍ଗଦର୍ଶିକା ଅନୁସାରେ ନାଁ ଲେଖା ହୋଇଛି । ନିଟ୍ ରେଜଲ୍ଟ ତାଲିକାକୁ ଭିତ୍ତି କରି ଆଡମିଶନ କରିବାକୁ ନିର୍ଦ୍ଦେଶ ରହିଥିଲା । ଜମ୍ମୁ ଅଂଚଳର ବିଭିନ୍ନ ମେଡିକାଲ କଲେଜରେ ୯୦୦ଟି ସିଟ୍ ରହିଥିବା ବେଳେ କାଶ୍ମୀର ଅଂଚଳରେ ୬୭୫ଟି ସିଟ୍ ରହିଛି । ତେଣୁ ଅଧିକ ସିଟରେ କାଶ୍ମୀରର ଛାତ୍ର ଆଡମିଶନ କରିଥିବା ସେ ପ୍ରକାଶ କରିଛନ୍ତି ।