୨ୟ ଟି-୨୦ ପୂର୍ବରୁ ଭାରତର ମନୋବଳ ଦୃଢ, ହେଲେ ବର୍ଷା ସାଜିପାରେ ବାଧକ

ନୂଆଦିଲ୍ଲୀ: କାନବେରାରେ ଖେଳା ଯାଇଥିବା ପ୍ରଥମ ଟି-୨୦ ବର୍ଷାରେ ଧୋଇଯିବା ପରେ ଆସନ୍ତାକାଲି ଭାରତ ଓ ଅଷ୍ଟ୍ରେଲିଆ ମଧ୍ୟରେ ଖେଳାଯିବ ୨ୟ ଟି-୨୦ ମ୍ୟାଚ୍। ଏହି ମ୍ୟାଚ୍‌ ପୂର୍ବରୁ ବଡ଼ ଆଶ୍ଵସ୍ତିକର ବିଷୟ ଟିମ୍ ଇଣ୍ଡିଆର ଅଧିନାୟକ ସୂର୍ଯ୍ୟକୁମାର ଯାଦବ ଫର୍ମକୁ ଫେରିଛନ୍ତି। ତେଣୁ ଦୃଢ ମନୋବଳ ସହ ଟିମ୍ ଇଣ୍ଡିଆ ମେଲବର୍ଣ୍ଣ ଟି-୨୦ ପାଇଁ ମଇଦାନକୁ ଓହ୍ଲାଇବ। ଅଭିଷେକ ଶର୍ମା, ତିଳକ ବର୍ମା ଓ ଶିବମ ଦୁବେ ନିଜର ଆକ୍ରମଣାତ୍ମକ ଖେଳ ଜରିଆରେ ଟି-୨୦ କ୍ରିକେଟ୍ ବ୍ୟାଟିଂରେ ନୂଆ ପରିଭାଷା ସୃଷ୍ଟି କରିଛନ୍ତି।

ହେଲେ ଗତ କିଛି ସମୟରୁ ଅଧିନାୟକ ସୂର୍ଯ୍ୟଙ୍କ ବ୍ୟାଟ୍ ନିରବ ରହିବା ଚିନ୍ତାର କାରଣ ପାଲଟିଥିଲା। ତେବେ ପ୍ରଥମ ଟି-୨୦ରେ ସୂର୍ଯ୍ୟକୁମାର ଯାଦବ ୨୪ ବଲରୁ ୩୯ ରନ କରି ଫର୍ମକୁ ଫେରିବାର ସଙ୍କେତ ଦେଇଛନ୍ତି। ସେ ଜୋଶ ହେଜେଲଉଡଙ୍କୁ ୧୨୫ ମିଟର ଉଚ୍ଚ ଲମ୍ବା ଛକା ମାରିଥିଲେ ଯାହା ଦୀର୍ଘ ସମୟ ଯାଏ ମନେ ରହିବ।

ବର୍ଷା କାରଣରୁ କାନବେରାରେ ଖେଳା ଯାଇଥିବା ପ୍ରଥମ ଟି-୨୦ ମୁକାବିଲାରେ ମାତ୍ର ୯.୪ ଓଭର ଖେଳ ହୋଇ ପାରିଥିଲା। ଭାରତ ଗୋଟିଏ ଓ୍ଵିକେଟ୍ ହରାଇ ୯୭ ରନ କରିଥିଲା। ସୂର୍ଯ୍ୟକୁମାର ଯାଦବ ଓ ଶୁଭମନ ଗିଲ୍ କଙ୍ଗାରୁ ବୋଲରଙ୍କୁ ପ୍ରହାର କରିବାକୁ ପୂରା ମୁଡରେ ଥିଲେ। ତେବେ ମେଲବର୍ଣ୍ଣରେ ଶୁକ୍ରବାର ବର୍ଷା ହେବାର ଅନୁମାନ କରାଯାଉଛି। ହେଲେ ଭାରତୀୟ ଦଳ ନିଜର ଲୟ ବଜାୟ ରଖିବାକୁ ପୂରା ଉଦ୍ୟମ କରିବ।

ଗମ୍ଭୀର ଚାହାନ୍ତି ତାଙ୍କ ଦଳ ମିୟମିତ ଭାବେ ୨୫୦, ୨୬୦ ରନ କିମ୍ବା ସେଥିରୁ ଅଧିକ ରନ କରୁ। ନିକଟରେ ଭାରତୀୟ ବ୍ୟାଟର ଆରମ୍ଭରୁ ଆକ୍ରମଣାତ୍ମକ କ୍ରିକେଟ୍ ଖେଳି ଟି-୨୦ ଫର୍ମାଟର ସ୍ଵରୂପକୁ ଆହୁରି ବଦଳାଇ ଦେଇଛନ୍ତି। ଭାରତର ନଜର ୨୦୨୬ ଟି-୨୦ ବିଶ୍ଵକପ୍ ଟାଇଟଲ ବଜାୟ ରଖିବା ଉପରେ ରହିବ। ଭାରତ ଗତ ଥର ରୋହିତ ଶର୍ମାଙ୍କ ନେତୃତ୍ଵରେ ଓ୍ଵେଷ୍ଟଇଣ୍ଡିଜ ଓ ଆମେରିକାରେ ଖେଳା ଯାଇଥିବା ଟି-୨୦ ବିଶ୍ଵକପ୍ ଜିତିଥିଲା।

ଭାରତକୁ କାନବେରାରେ ବୋଲିଂ କରିବାର ସୁଯୋଗ ମିଳିନାହିଁ। ତଥାପି ଯଶପ୍ରୀତ ବୁମରା, ବରୁଣ ଚକ୍ରବର୍ତ୍ତୀ, କୁଲଦୀପ ଯାଦବ ଓ ଅକ୍ଷର ପଟେଲଙ୍କ ଉପସ୍ଥିତିରେ ଭାରତର ବୋଲିଂ ଆକ୍ରମଣ ମଜବୁତ ଲାଗୁଛି। କିନ୍ତୁ ଟିମ୍ ଇଣ୍ଡିଆକୁ ମିଚେଲ୍ ମାର୍ଶ ଓ ଟ୍ରେଭିସ ହେଡଙ୍କ ବ୍ୟାଟ୍ ଉପରେ ଅଙ୍କୁଶ ଲଗାଇବାକୁ ପଡ଼ିବ।

ଅଷ୍ଟ୍ରେଲିଆ ଦଳ ମଧ୍ୟ ବହୁତ ଆକ୍ରମଣାତ୍ମକ କ୍ରିକେଟ୍ ଖେଳିଥାଏ। ହେଡ, ମାର୍ଶ, ମାର୍କସ ଷ୍ଟୋଇନିସ, ଟିମ ଡେଭିଡ ଓ ଜୋଶ ଇଂଲିଶ ବଡ଼ ସ୍କୋର କରିବାକୁ ସିଦ୍ଧହସ୍ତ। ମିଚେଲ୍ ଷ୍ଟାର୍କ ଟି-୨୦ରୁ ସନ୍ନ୍ୟାସ ଓ ପାଟ୍ କମିନ୍ସଙ୍କ ଅନୁପସ୍ଥିତି କଙ୍ଗାରୁ ଦଳର ବୋଲିଂ ଆକ୍ରମଣକୁ ସାମାନ୍ୟ ଅନୁଭବହୀନ ଲାଗୁଛି। ତେଣୁ ହେଜେଲଉଡଙ୍କ ଉପରେ ବୋଲିଂର ଦାୟିତ୍ଵ ରହିଛି।