ନୂଆଦିଲ୍ଲୀ: ପାକିସ୍ତାନରେ ବଡ଼ ଆତଙ୍କବାଦୀ ହମଲା । ରବିବାର ସେନା କାଫିଲା ଉପରେ ଆତ୍ମଘାତୀ ଆକ୍ରମଣ ହୋଇଛି । ଏଥିରେ ୭ ପାକ୍ ଯବାନଙ୍କ ମୃତ୍ୟୁ ହୋଇଥିବା ବେଳେ ୨୧ଜଣ ଗୁରୁତର ଭାବେ ଆହତ ହୋଇଛନ୍ତି । ମାତ୍ର ବେଲୁଚି ଲିବରେସନ ଆର୍ମି, ୯୦ ପାକିସ୍ତାନୀ ସୈନିକଙ୍କ ମୃତ୍ୟୁ ହୋଇଥିବା ଦାବି କରିଛି ।
ସୂଚନା ଅନୁଯାୟୀ, ଶନିବାର ପାକିସ୍ତାନୀ ଆର୍ମି କାଫିଲା ଉପରେ ହୋଇଥିବା ଆତ୍ମଘାତୀ ଆକ୍ରମଣକୁ ନେଇ ନିଜକୁ ଦାୟି କରିଛି ବିଏଲଏ । ଏହି ଆତଙ୍କବାଦୀ ଆକ୍ରମଣ କ୍ବେଟା ଠାରୁ ୧୫୦ କିଲୋମିଟର ଦୂର ନୋଶିକିରେ ହୋଇଛି । ହମଲା ପରେ ପାକ୍ ସେନା ପକ୍ଷରୁ ସ୍ଥାନୀୟ ଅଞ୍ଚଳରେ ଯୁଦ୍ଧ ହେଲିକପ୍ଟର ଓ ଡ୍ରୋନ୍ ମୁତୟନ କରିଛି ।
ଶନିବାର ସେନା କାଫିଲା ତାଫ୍ତାନ ଯାଉଥିଲା । ଏଥିରେ ପାକ୍ ସେନାର ୭ଟି ବସ୍ ଏବଂ ଦୁଇଟି ଅନ୍ୟ ଗାଡ଼ି ମଧ୍ୟ ଥିଲା । ଏହି ସମୟରେ ଏକ ଆଇଇଡି ଭର୍ତ୍ତି ଗାଡ଼ି ସେନା ବସ୍କୁ ଧକ୍କା ଦେଇଥିଲା । ଏହାପରେ ଭୟଙ୍କର ବିସ୍ଫୋରଣ ହୋଇଥିଲା । ଏଥିରେ ୭ ଯବାନ ପ୍ରାଣ ହରାଇଥିବା ବେଳେ ୨୧ଜଣ ଗୁରୁତର ଭାବେ ଆହତ ହୋଇଛନ୍ତି । ହେଲେ ବେଲୁଚି ଲିବରେସନ ଆର୍ମି ଏହି ହମଲାକୁ ନେଇ ବଡ଼ ଦାବି କରିଛି । ନୋଶକିର ଆରସିଡି ହାଇଓ୍ବେରେ ପାକିସ୍ତାନ ସେନା ଉପରେ ଯେଉଁ ଆତ୍ମଘାତୀ ହମଲା ହୋଇଛି, ତା’କୁ ବିଏଲଏର ଫିଦାୟିନ୍ ୟୁନିଟ୍ କରିଛି । ଏହି କାଫିଲାରେ ପାକ୍ ସେନାର ୮ ବସ୍ ଥିଲା । ଏଥିରୁ ଗୋଟିଏ ବସ୍ ବିସ୍ଫୋରଣରେ ଭୟଙ୍କର ଭାବେ କ୍ଷତିଗ୍ରସ୍ତ ହୋଇଛି । ଏହି ହମଲା ପରେ ବିଏଲଏ ଫତହେ ସ୍କ୍ବାକର୍ଡ ଅନ୍ୟ ଏକ ବସକୁ ଘେରି ନେଇଯାଇଥିଲେ ଏବଂ ଅତର୍କିତ ଭାବେ ଗୁଳିମାଡ଼ କରିଥିଲେ । ଏହି ଆକ୍ରମଣରେ ୯୦ରୁ ଅଧିକ ପାକ୍ ଯବାନ ପ୍ରାଣ ହରାଇଛନ୍ତି ବୋଲି ଦାବି କରିଛି ବିଏଲଏ ।
