ଦକ୍ଷିଣ ଆଫ୍ରିକା ବିପକ୍ଷ ଦିନିକିଆରେ ରେକର୍ଡର ପାହାଡ : ସଚିନଙ୍କୁ ଟପିଲେ ବିରାଟ କୋହଲି

ନୂଆଦିଲ୍ଲୀ, ୦୭ /୧୨: ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିବା ତିନି ଟିକିଆ ଓଡିଆଇ ସିରିଜରେ ବାଜିମାତ କରିଛି ଟିମ୍ ଇଣ୍ଡିଆ । ଦଳ ୨-୧ରେ ସିରିଜ୍ ଜିତିନେଇଛି । ଏହାସହ ଟେଷ୍ଟ୍ ସିରିଜର ପ୍ରତିଶୋଧ ନେଇଛି । ତେବେ ଟୁର୍ଣ୍ଣାମେଣ୍ଟରେ ସବୁଠୁ ଦମଦାର ବ୍ୟାଟିଂ କରିଥିଲେ ବିରାଟ କୋହଲି । ତାଙ୍କୁ ମ୍ୟାନ୍ ଅଫି ଦି ସିରିଜ୍ ଟ୍ରଫି ମିଳିଛି । ସେ ତିନୋଟି ମ୍ୟାଚରେ ୩୦୦ରୁ ଅଧିକ ରନ୍ ସ୍କୋର କରିଛନ୍ତି । ଖାଲି ଏତିକି ନୁହେଁ ସିରିଜରେ ସେ ଅନେକ ରେକର୍ଡ ମଧ୍ୟ ପ୍ରତିଷ୍ଠା କରିଛନ୍ତି ।

କୋହଲି ସିରିଜରେ ୧୫୧ ଆଭରେଜରେ ୩୦୨ ରନ୍ କରିଥିଲେ । ଏଥିରେ ଦୁଇଟି ଶତକ ଏବଂ ଗୋଟିଏ ଅର୍ଦ୍ଧଶତକ ସାମିଲ ରହିଛି । ଏହାସହ ସେ ଅନ୍ତର୍ଜାତୀୟ କ୍ରିକେଟରେ ସବୁଠାରୁ ଅଧିକ ଥର ପ୍ଲେୟାର ଅଫ୍ ଦି ସିରିଜ ପୁରସ୍କାର ପାଇଥିବା ଖେଳାଳି ହୋଇପାରିଛନ୍ତି । କୋହଲି ୨୦ ଥର ଏହି ଟ୍ରଫି ହାତେଇଛନ୍ତି । ତାଙ୍କ ପଛରେ ସଚିନ ତେନ୍ଦୁଲକର ଅଛନ୍ତି । ଯିଏକି ୧୯ ଥର ମ୍ୟାନ୍ ଅଫ୍ ଦି ସିରିଜ୍ ହୋଇଥିଲେ ।

ସେହିପରି କେବଳ ଦିନିକିଆରେ ଅଧିକ ଥର ମ୍ୟାନ୍ ଅଫି ଦି ସିରିଜ୍ ପୁରସ୍କାର ପାଇବାରେ କୋହଲି ୩ ନମ୍ବରରେ ଅଛନ୍ତି । ତାଙ୍କ ଆଗରେ ,ଶ୍ରୀଲଙ୍କାର ସନତ ଜୟସୂର୍ଯ୍ୟା ଏବଂ ଭାରତର ମହାନ କ୍ରିକେଟର ସଚିନ ତେନ୍ଦୁଲକର ରହିଛନ୍ତି ।

ଏତତ୍ ବ୍ୟତୀତ ବିଶାଖାପାଟଣା ଦିନିକିଆରେ ପ୍ରଥମ ଦୁଇଟି ଓ୍ୱିକେଟରେ ଶତକୀୟ ପାର୍ଟନରସିପ୍ ହୋଇଥିଲା । ପ୍ରଥମେ ରୋହିତ ଶର୍ମା ଏବଂ ଯଶସ୍ୱୀ ଜୟସ୍ୱାଲ ୧୫୫ ରନ୍ ସଂଗ୍ରହ କରିଥିଲେ । ପରେ ବିରାଟ ଏବଂ ଜୟସ୍ୱାଲଙ୍କ ମଧ୍ୟରେ ୧୧୬ ରନର ପାର୍ଟନରସିପ୍ ହୋଇଥିଲା ।ଅନ୍ତର୍ଜାତୀୟ କ୍ରିକେଟରେ ଏପରି ତୃତୀୟ ଥର ପାଇଁ ହୋଇଛି ଯେତେବେଳେ ଭାରତର ପ୍ରଥମ ଦୁଇଟି ଯୋଡି ଶତକୀୟ ପାର୍ଟନରସିପ୍ କରିଛନ୍ତି ।

ବିଶାଖାପାଟଣାରେ କୋହଲି ୮ଟି ମୁକାବିଲାରେ ୬୫୨ ରନ୍ ସଂଗ୍ରହ କରିଛନ୍ତି । କୋହଲିଙ୍କ ବ୍ୟତୀତ ଦିନିକିଆ କ୍ରିକେଟରେ କୌଣସି ସମାନ ଷ୍ଟାଡିୟମରେ କେହି ବ୍ୟାଟର ଏତେ ଭଲ ଆଭରେଜରେ ରନ୍ କରିନାହାଁନ୍ତି । ଏବେସୁଦ୍ଧା ବିରାଟ ବିଶାଖପାଟଣାରେ ତିନୋଟି ଶତକ ସହ ତିନୋଟି ଅର୍ଧଶତକ ହାସଲ କରିଛନ୍ତି ।

ଏହାଛଡା ଦିନିକିଆ କ୍ରିକେଟରେ ନବମ ଥର ପାଇଁ ବିରାଟ ୪ ବା ୪ରୁ ଅଧିକ ମୁକାବିଲାରେ ଲଗାତାର ୫୦ କିମ୍ବା ୫୦ରୁ ଅଧିକ ରନ୍ କରିଛନ୍ତି । ତାଙ୍କ ପଛକୁ କୁମାର ସାଙ୍ଗକରା ଏବଂ କେନ୍ ଓ୍ୱିଲମସନ୍ ଅଛନ୍ତି । ସେହିପରି ୨୦୧୯ ବିଶ୍ୱକପ୍ ପରେ ଭାରତ ଘରୋଇ ମାଟିରେ ୧୧ରୁ ୧୦ଟି ଦିନିକିଆ ସିରିଜ୍ ନିଜ ନାଁରେ କରିଛି ।

ଖାଲି ଏତିକି ନୁହେଁ ତିନିଟିକିଆ ଦିନିକିଆ ସିରିଜରେ ସର୍ବାଧିକ ଛକା ମାରିବ ରେକର୍ଡ ମଧ୍ୟ ଭାରତ କରିଛି । ଦଳ ଗତ ସିରିଜରେ ୬୩ ଟି ଛକା ମାରିଛି । ସେହିପରି ସର୍ବାଧିକ ଛକାର ରେକର୍ଡ ମଧ୍ୟ ଭାରତ ନାଁରେ ରହିଛି ।