ନୂଆଦିଲ୍ଲୀ, ୧୪/୬: ଲୋକସଭା ନିର୍ବାଚନ ପରେ ହେବ ରାଜ୍ୟସଭା ଉପ-ନିର୍ବାଚନ । ୭ ରାଜ୍ୟରେ ୧୦ ରାଜ୍ୟସଭା ଆସନ ଖାଲିପଡ଼ିଛି । ରାଜ୍ୟସଭା ସାଂସଦ ଲୋକସଭା ନିର୍ବାଚନ ଲଢ଼ି ବିଜୟୀ ହେବା ପରେ ଏବେ ଖାଲିପଡ଼ିଥିବା ଏହି ରାଜ୍ୟସଭା ଆସନଗୁଡ଼ିକରେ ଉପ-ନିର୍ବାଚନ ଲାଗି ବିଜ୍ଞପ୍ତି ପ୍ରକାଶ କରିଛନ୍ତି ନିର୍ବାଚନ ଆୟୋଗ । ରାଜ୍ୟସଭାରେ ବିଜେପି ନେତୃତ୍ୱାଧୀନ ଏନ୍ଡିଏ ଅଧିକ ଶକ୍ତିଶାଳୀ ହେବା ସମ୍ଭାବନା ରହିଛି । ୭ ଆସନ ଥିବା ରାଜ୍ୟରେ ଏବେ ବିଜେପି ସରକାର ଥିବାବେଳେ ଦୁଇଟିରେ କଂଗ୍ରେସ ଏବଂ ଗୋଟିଏରେ ରାଷ୍ଟ୍ରୀୟ ଜନତା ଦଳ(ଆର୍ଏଲ୍ଡି) ରହିଛି । ଆସାମ, ବିହାର ଏବଂ ମହାରାଷ୍ଟ୍ରରେ ଦୁଇଟି ଲେଖାଏଁ ଏବଂ ହରିୟାଣା, ମଧ୍ୟପ୍ରଦେଶ, ରାଜସ୍ଥାନ ଓ ତ୍ରିପୁରାରେ ଗୋଟିଏ ଲେଖାଏଁ ରାଜ୍ୟସଭା ଆସନ ଖାଲି ରହିଛି ।
ବିଜେପିର ରାଜ୍ୟସଭା ସାଂସଦ ତଥା କେନ୍ଦ୍ରମନ୍ତ୍ରୀ ଥିବା ସର୍ବାନନ୍ଦ ସୋନୋୱାଲ(ଆସାମ), ଜ୍ୟୋତିରାଦିତ୍ୟ ସିନ୍ଧିଆ(ମଧ୍ୟପ୍ରଦେଶ) ଏବଂ ପିୟୂଷ ଗୋୟଲ(ମହାରାଷ୍ଟ୍ର) ଏବେ ନିମ୍ନସଦନ ବା ଲୋକସଭାକୁ ନିର୍ବାଚିତ ହୋଇଛନ୍ତି । ହରିୟାଣା, ମହାରାଷ୍ଟ୍ରରେ ଏନ୍ଡିଏ ଏବଂ ବିରୋଧୀଙ୍କ ଇଣ୍ଡିଆ ମେଣ୍ଟ ଭିତରେ ଲଢ଼େଇ ଦେଖିବାକୁ ମିଳିପାରେ । କିନ୍ତୁ ବାକି ୫ ରାଜ୍ୟରେ ବିଜେପି ସହଜରେ ରାଜ୍ୟସଭା ଆସନଗୁଡ଼ିକରେ ଜିତିଯିବାର ଯଥେଷ୍ଟ ସମ୍ଭାବନା ରହିଛି । ଆସାମ ସମେତ ତ୍ରିପୁରା, ମଧ୍ୟପ୍ରଦେଶ ଏବଂ ରାଜସ୍ଥାନରେ ବିଜେପି ବିଧାୟକଙ୍କ ସଂଖ୍ୟା ଅଧିକ ରହିଛି ।
ବିହାରରେ ଉଭୟ ବିଜେପି ଏବଂ ଆର୍ଏଲ୍ଡି ଗୋଟିଏ ଲେଖାଏ ସିଟ୍ ନେଇପାରିବେ । ଏବେ ହରିୟାଣାରେ ମୋଟ ୮୭ ବିଧାୟକ ରହିଛନ୍ତି । ସେମାନଙ୍କ ମଧ୍ୟରେ ବିଜେପିର ୪୧ ବିଧାୟକ ଥିବାବେଳେ କଂଗ୍ରେସର ୨୯ ବିଧାୟକ ରହିଛନ୍ତି । ଏଠାରେ ଦୁଷ୍ୟନ୍ତ ଚୌତାଲାଙ୍କ ଜେଜେପି ପାଖରେ ୧୦ ବିଧାୟକ ଥିବାବେଳେ ୫ ସ୍ୱାଧୀନ ବିଧାୟକ ଏବଂ ଏବଂ ଆଇଏନ୍ଏଲ୍ଡିର ଗୋଟିଏ ଓ ଏଚ୍ଏଲ୍ପିର ଜଣେ ବିଧାୟକ ରହିଛନ୍ତି । ଯଦି ସ୍ୱାଧୀନ ବିଧାୟକ ନୟନ ପାଲ୍ ରାୱତ ଏବଂ ଏଚ୍ଏଲ୍ପି ବିଧାୟକ ଗୋପାଳ କାନ୍ଦାଙ୍କ ସମର୍ଥନକୁ ମିଶାଯାଏ ତେବେ ହରିୟାଣାରେ ବିଜେପିର କ୍ଷମତା ୪୩ ହୋଇଯିବ । ଜେଜେପି ସମେତ ୩ ସ୍ୱାଧୀନ ବିଧାୟକ କଂଗ୍ରେସକୁ ସମର୍ଥନ କରୁଛନ୍ତି । ତେଣୁ କଂଗ୍ରେସ ଓ ବିଜେପି ମଧ୍ୟରେ ହରିୟାଣାରେ ମୁକାବିଲା ଦେଖିବାକୁ ମିଳିବ । ତେବେ ଜେଜେପିର ୬ ବିଧାୟକ କଂଗ୍ରେସ ପ୍ରତି ଅସନ୍ତୁଷ୍ଟ ଥିବାରୁ ଏହା କଂଗ୍ରେସର ଅଡ଼ୁଆ ବଢ଼ାଇପାରେ ।
ଅନ୍ୟପକ୍ଷରେ କେନ୍ଦ୍ର କ୍ୟାବିନେଟ ମନ୍ତ୍ରୀପଦ ନ ମିଳିବାକୁ ନେଇ ମହାରାଷ୍ଟ୍ରରେ ଏକନାଥ ସିନ୍ଦେଙ୍କ ଶିବସେନା ଏବଂ ଅଜିତ ପାୱାରଙ୍କ ଏନ୍ସିପି ଭିତରେ ସବୁକିଛି ଠିକ୍ ଥିବା ଭଳି ମନେ ହେଉନାହିଁ । ଅଜିତଙ୍କ ଏନ୍ସିପିକୁ ଗୋଟିଏ ରାଷ୍ଟ୍ରମନ୍ତ୍ରୀ ପଦ ଯଚା ଯାଇଥିଲେ ହେଁ ଅଜିତ ମନା କରିଥିଲେ । ସେହିପରି ୭ ଲୋକସଭା ଆସନ ଜିତିବା ସତ୍ତେ୍ୱ ଶିବସେନାକୁ କ୍ୟାବିନେଟ ମନ୍ତ୍ରୀ ପଦ ମିଳି ନ ଥିବାରୁ ଅସନ୍ତୋଷ ରହିଛି । ମହାରାଷ୍ଟ୍ରରେ ଇଣ୍ଡିଆ ମେଣ୍ଟରେ କଂଗ୍ରେସ ସମେତ ଶରଦ ପାୱାରଙ୍କ ଏନ୍ସିପି ଏବଂ ଉଦ୍ଧବ ଠାକ୍ରେଙ୍କ ଶିବସେନା ରହିଛି । ତେଣୁ ମହାରାଷ୍ଟ୍ରରେ କଂଗ୍ରେସ ବିଜେପିକୁ ଅସୁବିଧାରେ ପକାଇପାରେ ।
