ରୋହିତଙ୍କୁ ପିଲାଦିନର କଥା ମନେ ପକାଇଲେ ପନ୍ତ, ଭ୍ରୁଲତାର ଚୁଟି ଆଣି ହିଟମ୍ୟାନ୍ ମାଗିଲେ ସିକ୍ରେଟ୍ ଓ୍ୱିସ୍

ରାୟପୁର, ୦୪ /୧୨: ରାୟପୁରରେ ଖେଳାଯାଇଥିବା ଦ୍ୱିତୀୟ ଦିନିକିଆରେ ପରାସ୍ତ ହୋଇଛି ଟିମ୍ ଇଣ୍ଡିଆ । ଦଳ ବିରାଟ କୋହଲି ଏବଂ ଋତୁରାଜ ଗାଏକଓ୍ୱାଡଙ୍କ ଶତକ ବଳରେ ୩୫୮ ରନ୍ କରିପାରିଥିଲା । କିନ୍ତୁ ଦକ୍ଷିଣ ଆଫ୍ରିକା ରନ୍ ଚେଜ୍ କରିବାରେ ସଫଳ ହୋଇଥିଲା । ବିଜୟ ସହ ସିରିଜକୁ ମଧ୍ୟ ବରାବର ସ୍ଥିତିକୁ ଆଣିଛି ଭ୍ରମଣକାରୀ ଟିମ୍ ।

ତେବେ ମୁକାବିଲାରେ ଏକ ରୋଚକ ଘଟଣା ଦେଖିବାକୁ ମିଳିଥିଲା । ଭାଇରାଲ ହେଉଥିବା ବିଭିନ୍ନ ଭିଡିଓରେ ଦେଖିବାକୁ ମିଳିଥିଲା ଯେ, ଦକ୍ଷିଣ ଆଫ୍ରିକା ରନ୍ ଚେଜ୍ ଆରମ୍ଭ କରିବା ପୂର୍ବରୁ ରୋହିତଙ୍କ ମୁହଁରେ ଆଖି ପତାର ଏକ ଚୁଟି(ପକ୍ଷ୍ମ) ବା ଆଇଲ୍ୟାସ୍ ଲାଗିଥିଲା । ଯାହାକୁ ଦେଖିଥିଲେ ଋଷଭ ପନ୍ତ । ଚୂଡାନ୍ତ ଏକାଦଶରେ ସାମିଲ ନଥିଲେ ବି ପନ୍ତ ବାଉଣ୍ଡରୀ ଲାଇନ୍ ପାଖରେ ଠିଆ ହୋଇଥିଲେ । ସେ ରୋହିତଙ୍କ ଆଇଲ୍ୟାସ୍ ଦେଖି ହିଟମ୍ୟାନଙ୍କୁ କହିଥିଲେ ।

ତେବେ ପନ୍ତ ଏହାକୁ ହାତରେ ଆଣି ରୋହିତଙ୍କୁ ଦେଇଥିଲେ । ହିଟମ୍ୟାନ୍ ଆଖି ବନ୍ଦ କରି କିଛି ଓ୍ୱିସ୍ କରିଥିଲେ । ଯାହା ଭାରତରେ ଅନେକ ବ୍ୟକ୍ତି କରିଥାନ୍ତି । ରୋହିତ ଅଳ୍ପ ହସି ଆଖି ବନ୍ଦ କରି ଓ୍ୱିସ୍ ମାଗିଥିଲେ ଏବଂ ପରେ ଏହାକୁ ଫୁଙ୍କିଥିଲେ । ଏସମସ୍ତ ଘଟଣା କ୍ୟାମେରାରେ କଏଦ ହୋଇଛି । ଯାହାକୁ ନେଇ ସୋସିଆଲ ମିଡିଆରେ ଅନେକ ୟୁଜର ନାନା କମେଣ୍ଟ ଦେଉଛନ୍ତି ।

ସୂଚନାଯୋଗ୍ୟ, ମୁକାବିଲାରେ ରୋହିତଙ୍କ ବ୍ୟାଟରୁ ବଡ ସ୍କୋର ସମସ୍ତେ ଆଶା କରିଥିଲେ । କିନ୍ତୁ ସେ ମାତ୍ର ୧୪ ରନ୍ କରି ଆଉଟ୍ ହୋଇଥିଲେ । କଟ୍ ବିହାଇଣ୍ଡ୍ ହୋଇ ସେ ପ୍ୟାଭିଲିୟନ ଫେରିଥିଲେ । ଅନ୍ୟ ଦିଗରେ ବିରାଟଙ୍କ ବ୍ୟାଟରୁ ଲଗାତାର ଦ୍ୱିତୀୟ ଶତକ ବାହାରିଥିଲା । ରାଞ୍ଚି ପରେ ରାୟପୁରରେ ମଧ୍ୟ ଦମଦାର୍ ପାଳି ସେ ଖେଳିଥିଲେ । କିନ୍ତୁ ବୋଲରଙ୍କ ନିରାଶଜନକ ପ୍ରଦର୍ଶନ ପାଇଁ ଦଳ ମୁକାବିଲା ହାରିଯାଇଥିଲା ।