ଅନିଲ ଅମ୍ବାନୀଙ୍କ ବିରୋଧରେ EDର ବଡ଼ କାର୍ଯ୍ୟାନୁଷ୍ଠାନ, ୩ ହଜାର କୋଟି ଟଙ୍କାର ସମ୍ପତ୍ତି ଜବତ

ନୂଆଦିଲ୍ଲୀ- ଶିଳ୍ପପତି ଅନିଲ ଅମ୍ବାନୀଙ୍କ ରିଲାଏନ୍ସ ଗ୍ରୁପ୍ ସହିତ ଜଡିତ ସମ୍ପତ୍ତି ବିରୁଦ୍ଧରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ (ED)। ୩ ହଜାର କୋଟିରୁ ଅଧିକ ମୂଲ୍ୟର ସମ୍ପତ୍ତିକୁ ଅସ୍ଥାୟୀ ଭାବରେ ଆଟାଚ୍ କରାଯାଇଛି। ମନି ଲଣ୍ଡରିଂ ନିବାରଣ ଆଇନ (PMLA) ଅଧୀନରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି ଇଡି।

ଜବତ ସମ୍ପତ୍ତିର ତାଲିକାରେ ମୁମ୍ବାଇର ବାନ୍ଦ୍ରାରେ ଥିବା ପଶ ପାଲି ହିଲ୍ ବାସଭବନ ଏବଂ ଦିଲ୍ଲୀର ପ୍ରମୁଖ ରିଲାଏନ୍ସ ସେଣ୍ଟର ରହିଛି। ଏହା ସହିତ ଦିଲ୍ଲୀ, ନୋଏଡା, ଗାଜିଆବାଦ, ମୁମ୍ବାଇ, ପୁଣେ, ଥାଣେ, ହାଇଦ୍ରାବାଦ, ଚେନ୍ନାଇ, କାଞ୍ଚିପୁରମ ଏବଂ ପୂର୍ବ ଗୋଦାବରୀ ଭଳି ପ୍ରମୁଖ ସହରଗୁଡ଼ିକରେ ଅବସ୍ଥିତ ଅନେକ ଜମି ପ୍ଲଟ୍, ଅଫିସ ଏବଂ ଫ୍ଲାଟ୍ ମଧ୍ୟ ଆଟାଚ୍ କରାଯାଇଛି। ଅନିଲ ଅମ୍ବାନୀ ଗ୍ରୁପ୍ ସହିତ ଜଡିତ ୪୦ରୁ ଅଧିକ ସମ୍ପତ୍ତି ବିରୁଦ୍ଧରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

EDର ତଦନ୍ତ ରିଲାଏନ୍ସ ଗ୍ରୁପର ଦୁଇଟି ଆର୍ଥିକ କମ୍ପାନି ରିଲାଏନ୍ସ ହୋମ୍ ଫାଇନାନ୍ସ ଲିମିଟେଡ୍ (RHFL) ଏବଂ ରିଲାଏନ୍ସ କମର୍ସିଆଲ୍ ଫାଇନାନ୍ସ ଲିମିଟେଡ୍ (RCFL) ସହ ଜଡିତ। ତଦନ୍ତ ଅନୁଯାୟୀ ଏହି କମ୍ପାନୀଗୁଡ଼ିକ ଜନସାଧାରଣ ଏବଂ ବ୍ୟାଙ୍କଗୁଡ଼ିକରୁ ନିଆଯାଇଥିବା ପାଣ୍ଠିର ଅପବ୍ୟବହାର କରିଥିବା ଅଭିଯୋଗ ହୋଇଛି।

ମାମଲାଟି ୨୦୧୭ ଏବଂ ୨୦୧୯ ମସିହାର। ଏହି ସମୟ ମଧ୍ୟରେ, ୟେସ୍ ବ୍ୟାଙ୍କ RHFL ରେ ପ୍ରାୟ ୨୯୬୫ କୋଟି ଏବଂ RCFLରେ ୨୦୪୫ କୋଟିର ଗୁରୁତ୍ୱପୂର୍ଣ୍ଣ ନିବେଶ କରିଥିଲା। ଏହି ଦୁଇଟି କମ୍ପାନୀ ଉପରେ ହଜାର ହଜାର କୋଟି ଟଙ୍କାର ବକେୟା ବାଲାନ୍ସ ପଡ଼ିଥିଲା।