ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦଙ୍କ ବିରୁଦ୍ଧରେ ଯୌନ ଶୋଷଣ ଅଭିଯୋଗରେ ମାମଲା ରୁଜୁ: ଲାଗିଛି ପୋକ୍ସୋ ଆକ୍ଟ

ନୂଆଦିଲ୍ଲୀ: ଜ୍ୟୋତିଷ ପୀଠ (ଜ୍ୟୋତିର୍ମଠ) ଶଙ୍କରାଚାର୍ଯ୍ୟ ସ୍ୱାମୀ ଅଭିମୁକ୍ତେଶ୍ୱରାନନ୍ଦ ସରସ୍ୱତୀଙ୍କ ବିରୋଧରେ ଯୌନ ଶୋଷଣା ଅଭିଯୋଗରେ ପୋକ୍ସୋ ଆଇନ ଅଧୀନରେ ମାମଲା ରୁଜୁ ହୋଇଛି। ଘଟଣାକୁ ନେଇ ଧର୍ମ ସହ ଜଡ଼ିତ ପ୍ରତିଷ୍ଠିତ ବ୍ୟକ୍ତିମାନଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଅଭିଯୁକ୍ତ ଶଙ୍କରାଚାର୍ଯ୍ୟ ଓ ତାଙ୍କ ଶିଷ୍ୟ ଏହି ଅଭିଯୋଗକୁ ଦୃଢ଼ ଭାବେ ଖଣ୍ଡନ କରିଛନ୍ତି। ଏହା ଏକ ଷଡ଼ଯନ୍ତ୍ର ବୋଲି ସେମାନେ କହିଛନ୍ତି।

ପ୍ରୟାଗରାଜ କୋର୍ଟଙ୍କ ନିର୍ଦ୍ଦେଶ ପରେ ପ୍ରୟାଗରାଜର ଝୁନସି ପୋଲିସ ଷ୍ଟେସନରେ ଅଭିମୁକ୍ତେଶ୍ୱରାନନ୍ଦଙ୍କ ବିରୁଦ୍ଧରେ ମାମଲା ରୁଜୁ ହୋଇଥିଲା। ଏଫଆଇଆରରେ ତାଙ୍କ ଶିଷ୍ୟ ମୁକୁନ୍ଦାନନ୍ଦ ବ୍ରହ୍ମଚାରୀଙ୍କ ସମେତ ଦୁଇରୁ ତିନି ଜଣ ଅଜଣା ବ୍ୟକ୍ତିଙ୍କ ନାଁ ମଧ୍ୟ ରହିଛି।ପୋଲିସ ଭାରତୀୟ ନ୍ୟାୟ ସଂହିତାର ପ୍ରାସଙ୍ଗିକ ଧାରା ଏବଂ ପୋସ୍କୋ ଆଇନର ବହୁବିଧ ଧାରା ଅନୁଯାୟୀ ଏକ ଏଫ୍ଆଇଆର୍ ରୁଜୁ କରିଛି।

ଅଭିଯୋଗ ଅନୁଯାୟୀ,ଜଣେ ନାବାଳକ ସମେତ ଦୁଇ ଶିଷ୍ୟ ୧୩ ଜାନୁଆରୀ ୨୦୨୫ ରୁ ୧୫ ଫେବୃଆରୀ ୨୦୨୬ ମଧ୍ୟରେ ଯୌନ ଶୋଷଣ ଅଭିଯୋଗ କରିଥିଲେ। ଏଫଆଇଆରରେ ଦାବି କରାଯାଇଛି ଯେ କଥିତ ଘଟଣାଗୁଡ଼ିକ ୨୦୨୫ କୁମ୍ଭ ମେଳା ଏବଂ ୨୦୨୬ ପ୍ରୟାଗରାଜରେ ମାଘ ମେଳା ପାଖାପାଖି ଆୟୋଜିତ ଧାର୍ମିକ ଶିବିର ସମୟରେ ଘଟିଥିଲା। ଅଭିଯୋଗରେ ଆହୁରି କୁହାଯାଇଛି ଯେ ମାଘ ମେଳା ସମୟରେ ଶିବିର ପରିସର ଭିତରେ ଏବଂ ଶିବିର ବାହାରେ ପାର୍କିଂ ହୋଇଥିବା ଏକ ଗାଡ଼ି ଭିତରେ ନିର୍ଯାତନା ଘଟିଥିଲା। ସ୍ଥାନୀୟ କୋର୍ଟଙ୍କ ହସ୍ତକ୍ଷେପ ପରେ ମାମଲା ରୁଜୁ କରାଯାଇଛି।

ଅଭିଯୋଗ ସମ୍ପୂର୍ଣ୍ଣ କପଳୋକଳ୍ପିତ ବୋଲି କହିଲେ ଶଙ୍କରାଚାର୍ଯ୍ୟ-

ଘଟଣାରେ ମାମଲା ରୁଜୁ ହୋଇଥିବା ଜାଣିବା ପରେସ୍ୱାମୀ ଅଭିମୁକ୍ତେଶ୍ୱରାନନ୍ଦଙ୍କ ପ୍ରତିକ୍ରିୟା ସାମ୍ନାକୁ ଆସିଛି। ସେ ସମସ୍ତ ଅଭିଯୋଗକୁ ଅସ୍ୱୀକାର କରିଛନ୍ତି,ଏଫଆଇଆରକୁ ତାଙ୍କ ପ୍ରତିଷ୍ଠାକୁ କ୍ଷତି ପହଞ୍ଚାଇବା ପାଇଁ ଏକ ଷଡ଼ଯନ୍ତ୍ର ବୋଲି କହିଛନ୍ତି।ସେ କହିଛନ୍ତି ଯେ ତାଙ୍କର ନିୟମିତ ପୋଲିସ ତଦନ୍ତରେ ବିଶ୍ୱାସ ନାହିଁ ଏବଂ ତଦନ୍ତକାରୀଙ୍କୁ ପୂର୍ଣ୍ଣ ସହଯୋଗର ପ୍ରତିଶ୍ରୁତି ଦେବା ସହିତ ଏକ ଉଚ୍ଚସ୍ତରୀୟ,ନିରପେକ୍ଷ ତଦନ୍ତ ଦାବି କରିଛନ୍ତି। ସେହିପରି ତାଙ୍କ ଶିଷ୍ୟ ମଧ୍ୟ ଏହାକୁ ମିଛଓ ଭିତ୍ତିହୀନ ବୋଲି କହିଛନ୍ତି।