ଆଠଗଡ଼ ୦୪।୦୧ : ଫିଲ୍ମ ଷ୍ଟାଇଲରେ ନିଶା ମାଫିଆକୁ କାବୁ କଲା ପୋଲିସ। କୁଖ୍ୟାତ ନିଶା ମାଫିଆ ସଫିକ୍ ଖାଁ ଗିରଫ । ତା ନାମରେ ବିଭିନ୍ନ ଥାନାରେ ରହିଛି ଏକାଧିକ ମାମଲା। ଫିଲ୍ମ ଷ୍ଟାଇଲରେ ବିଲରେ ଗୋଡେଇ ଗୋଡେଇ ସଫିକକୁ ଧରିଛି ପୋଲିସ୍।
ଖବର ଅନୁଯାୟୀ, ଚୋରା ଗଞ୍ଜେଇ କାରବାରର ସୂଚନା ପାଇ ଚଢାଉ ପାଇଁ ଭୁବନେଶ୍ୱରରୁ ଆସିଥିବା ସ୍ବତନ୍ତ୍ର ସ୍କ୍ୱାର୍ଡକୁ ଦୁର୍ବ୍ୟବହାର ଏବଂ ଆକ୍ରମଣ ଘଟଣାରେ ଥିଲା ମୁଖ୍ୟ ଅଭିଯୁକ୍ତ। କଟକ ଗ୍ରାମାଞ୍ଚଳ ଏସ୍ ପି ପ୍ରତୀକ ସିଂଙ୍କ ନିର୍ଦେଶ କ୍ରମେ ତିଗିରିଆ ଥାନା ଏବଂ ସ୍ବତନ୍ତ୍ର ଭାବେ ଗଠନ ହୋଇଥିବା ଏକ ସ୍ଵତନ୍ତ୍ର ଟିମ୍ ତିଗିରିଆ କୋର୍ଟ ସାମ୍ନା କ୍ଷେତରେ ଲୁଚିଥିବା ସମୟରେ ଚଢାଉ କରି ସଫିକ୍ କୁ ଗିରଫ କରିଛି। କିଛି ସମୟ ଧରି ଧସ୍ତାଧସ୍ତି ପରେ ସଫିକକୁ ଗିରଫ କରିବାରେ ସଫଳ ହୋଇଥିଲା ପୋଲିସ। ଗିରଫ ସଫିକର ଘର ତିଗିରିଆ ଥାନା କରଡ଼ାପଲ୍ଲୀ ଗାଁରେ ବୋଲି ଜଣାପଡିଛି। ଗୋ-ଚାଲାଣ ସହ ଗଞ୍ଜେଇ କାରବାର ନେଇ ବିଭିନ୍ନ ଥାନାରେ ସଫିକ୍ ନାଁରେ ସଙ୍ଗୀନ ମାମଲା ରହିଛି।
