ନୂଆଦିଲ୍ଲୀ: ଦିଲ୍ଲୀରେ ମେଣ୍ଟ ପଲିଟିକ୍ସକୁ ନା । ଦିଲ୍ଲୀ ବିଧାନସଭା ନିର୍ବାଚନକୁ ଏକାକୀ ଲଢ଼ିବ ଆମ୍ ଆଦମୀ ପାର୍ଟି । କଂଗ୍ରେସ ସହିତ ମେଣ୍ଟ ନେଇ ଲାଗି ରହିଥିବା ଚର୍ଚ୍ଚା ଉପରେ ପୂର୍ଣ୍ଣଚ୍ଛେଦ ପକାଇଛନ୍ତି ଆପ୍ ସଂଯୋଜକ ଅରବିନ୍ଦ କେଜ୍ରିଓ୍ବାଲ । ଦିଲ୍ଲୀ କେନ୍ଦ୍ର ଶାସିତ ଅଞ୍ଚଳରେ ହେବାକୁଥିବା ବିଧାନସଭା ନିର୍ବାଚନ ପାଇଁ ଆପ୍ କୌଣସି ପ୍ରକାର ବୁଝାମଣା କରିବ ନାହିଁ କି କୌଣସି ରାଜନୈତକ ଦଳ ସହିତ ମେଣ୍ଟ କରିବ ନାହିଁ । 

ଅରବିନ୍ଦ କେଜ୍ରିଓ୍ବାଲ ସୋସିଆଲ୍ ମଡିଆ ଏକ୍ସରେ ଏକ ପୋଷ୍ଟ କରି କହିଛନ୍ତି, ଆମ୍ ଆଦମୀ ପାର୍ଟି ଦିଲ୍ଲୀରେ ଏକକୀ ନିର୍ବାଚନ ଲଢ଼ିବ । କଂଗ୍ରେସ ସହିତ ଗଠବନ୍ଧନର କୌଣସି ସମ୍ଭାବନା ନାହିଁ । ନ୍ୟୁଜ୍ ଏଜେନ୍ସି ଏଏନଆଇ ଅନୁଯାୟୀ, ଦିଲ୍ଲୀ ବିଧାନସଭା ନିର୍ବାଚନ ପାଇଁ କଂଗ୍ରେସ ଏବଂ ଆପ୍ ସହିତ ମେଣ୍ଟ ନେଇ ଫାଇନାଲ ଆଲୋଚନା ହେବାର ଥିଲା । କଂଗ୍ରେସ ୧୫ ଆସନ ଏବଂ ଇଣ୍ଡିଆ ବ୍ଲକ୍‌ର ଅନ୍ୟ ପାର୍ଟିମାନଙ୍କୁ ୧ରୁ ୨ ସିଟ୍ ଏବଂ ବାକି ଆସନରେ ଆମ୍ ଆଦମୀ ପାର୍ଟି ନିର୍ବାଚନ ନେଇ ଆଲୋଚନା ଜାରି ରହିଥିଲା । ମାତ୍ର ଆପ୍ ସଂଯୋଜକ ଏହା ଉପରେ ଫୁଲ୍-ଷ୍ଟପ୍ ଲଗାଇଛନ୍ତି । ଅରବିନ୍ଦ କେଜ୍ରିଓ୍ବାଲ ସୋସିଆଲ୍ ମିଡିଆରେ ପୋଷ୍ଟ କରି ଗଠବନ୍ଧନ ଖବର ଖାରଜ୍ କରିଛନ୍ତି ।

ଦିଲ୍ଲୀ ବିଧାନସଭା ନିର୍ବାଚନ ପାଇଁ ଆମ୍ ଆଦମୀ ପାର୍ଟି ଜୋରଦାର ପ୍ରସ୍ତୁତି ଚଳାଇଛି । ନିର୍ବାଚନ ତାରିଖ ଘୋଷଣା ହେବା ପୂର୍ବରୁ ଦଳ ଦ୍ବିତୀୟ ପର୍ଯ୍ୟାୟରେ ଆଶାୟୀ ପ୍ରାର୍ଥୀଙ୍କ ତାଲିକା ଜାରି କରିଛି । ପ୍ରଥମ ପର୍ଯ୍ୟାୟରେ ୧୧ଜଣ ପ୍ରାର୍ଥୀ ଏବଂ ଦ୍ବିତୀୟ ପର୍ଯ୍ୟାୟରେ ୨୦ଜଣ ଆଶାୟୀଙ୍କ ସୂଚୀ ଜାରି କରିଛି ଦଳ । ଦ୍ବିତୀୟ ତାଲିକାରେ ଦିଲ୍ଲୀ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ସିଟ୍ ବଦଳିଛି । ତାଙ୍କ ସ୍ଥାନରେ ନୂଆ କରି ଆପ୍ ସାମିଲ୍ ହୋଇଥିବା UPSC ଶିକ୍ଷକ ଅବଦ୍ଧ ଓଝାଙ୍କୁ ଟିକେଟ୍ ଦେବା ପାଇଁ ଦଳ ଚୟନ କରିଛି ।