ପାଟନା ୯।୨: ରାଷ୍ଟ୍ରୀୟ ଜନତା ଦଳ (ଆରଜେଡି) ନେତା ତେଜସ୍ୱୀ ଯାଦବ ରବିବାର କହିଛନ୍ତି ଯେ ଦିଲ୍ଲୀ ବିଧାନସଭା ନିର୍ବାଚନରେ ବିଜେପି ବିଜୟର ପ୍ରଭାବ ବିହାର ବିଧାନସଭା ନିର୍ବାଚନ ଉପରେ ପଡିବ ନାହିଁ, ଯେଉଁଠି ଚଳିତବର୍ଷ ଶେଷରେ ବିଧାନସଭା ନିର୍ବାଚନ ହେବାକୁ ଯାଉଛି। ବିହାରର ପୂର୍ବତନ ଉପମୁଖ୍ୟମନ୍ତ୍ରୀ କହିଛନ୍ତି ଯେ ଗଣତନ୍ତ୍ରରେ ଜନତା ମାଲିକ ହୋଇଥାନ୍ତି। ବିଜେପିକୁ ଦିଲ୍ଲୀରେ ପାଖାପାଖି ୨୭ ବର୍ଷ ପରେ ଜନାଦେଶ ମିଳିଛି। ଆଶା କରୁଛି ଲୋକଙ୍କୁ ପାର୍ଟି ଦେଇଥିବା ପ୍ରତିଶ୍ରୁତି ପୁରଣ କରିବ ଓ ଜୁମଲାବାଜୀ କରିବନି।
ବିଜେପି ଓ ସହଯୋଗୀ ଦାବି କରୁଛନ୍ତି ଦିଲ୍ଲୀରେ ମିଳିଥିବା ସଫଳତାର ପ୍ରଭାବ ବିହାର ବିଧାନସଭା ନିର୍ବାଚନରେ ମିଳିବ ବୋଲି ତେଜସ୍ୱୀଙ୍କୁ ପଚରା ଯିବାରେ ସେ କହିଛନ୍ତି ବିହାର ଦିଲ୍ଲୀ ନୁହେଁ ବିହାର ଅଟେ ଆମକୁ ଏହା ବୁଝିବାକୁ ପଡିବ। ବିହାରରେ ଅନୁଷ୍ଠିତ ଗତ ୨ଟି ବିଧାନସଭା ନିର୍ବାଚନରେ ଆରଜେଡି ସବୁଠୁ ବଡ଼ ପାର୍ଟି ଭାବେ ଉଭା ହେଉଛି। ବିହାରରେ ଏନଡିଏର ନେତୃତ୍ୱ ମୁଖ୍ୟମନ୍ତ୍ରୀ ନିତିଶ କୁମାର ନେଇଛନ୍ତି। ନିତିଶ ୨୦୦୫ ମସିହାକୁ ଛାଡି ଦେଲେ ଲାଗାତାର ବିହାରର ମୁଖ୍ୟମନ୍ତ୍ରୀ ଅଛନ୍ତି।
ନିତିଶ କୁମାର ଏକ ସଂକ୍ଷିପ୍ତ ଅବଧି ନିମନ୍ତେ ଜିତେନରାମ ମାଁଝୀଙ୍କ ହାତରେ ରାଜ୍ୟର ଭାଗ୍ୟଡୋରୀ ଅର୍ପଣ କରିଥିଲେ। ଏହି ଅବଧିରେ ନିତିଶ କୁମାର ବିହାରରେ ଦୁଇଥର ଆରଜେଡି ସହିତ ମେଣ୍ଟ କରି ସରକାର ମଧ୍ୟ କରିଥିଲେ। ତେବେ ପରେ ସେ ଆରଜେଡି ସହ ମେଣ୍ଟରୁ ଓହରି ବିଜେପି ମେଣ୍ଟରେ ତାଙ୍କ ପାର୍ଟିକୁ ସାମିଲ କରିଛନ୍ତି ଓ ଏବେ ରାଜ୍ୟରେ ତାଙ୍କ ସରକାର ବିଜେପି ମେଣ୍ଟ ସହଯୋଗରେ ଚାଲିଛି।
