ରାଉରକେଲା ୧୦।୪: ପୂର୍ବତନ କେନ୍ଦ୍ରମନ୍ତ୍ରୀ ତଥା ରାଉରକେଲାର ପୂର୍ବତନ ବିଧାୟକ ଦିଲୀପ ରାୟ ରାଉରକେଲାରେ ପହଞ୍ଚିଛନ୍ତି । ରାଉରକେଲାଲେ ପହଞ୍ଚିବା ପରେ ଶୁଭେଚ୍ଛୁ, ସମର୍ଥକ କର୍ମୀ ଦିଲୀପଙ୍କୁ ଦେଇଥିଲେ ଭବ୍ୟ ସ୍ୱାଗତ । ଦିଲୀପଙ୍କ ସାଙ୍ଗରେ ଥିଲେ ପୂର୍ବତନ କେନ୍ଦ୍ରମନ୍ତ୍ରୀ ତଥା ସୁନ୍ଦରଗଡ଼ ସାଂସଦ ପ୍ରାର୍ଥୀ ଜୁଏଲ ଓରାମ । ଦିଲୀପଙ୍କୁ ଭବ୍ୟ ସ୍ୱାଗତ କରି ପାଛୋଟି ନେଇଥିଲେ କର୍ମୀ ଓ ସମର୍ଥକ । ଦିଲୀପ ରାୟଙ୍କୁ ଦିଲ୍ଲୀ ହାଇକୋର୍ଟ ଆସ୍ବସ୍ତ କରିବା ପରେ ଦିଲ୍ଲୀପ ନିର୍ବାଚନ ଲଢ଼ିପାରିବେ । ଦିଲ୍ଲୀପ କହିଛନ୍ତି, ମୁଁ ବିଜେପିରେ ଅଛି । ରାଉରକେଲା ବାସୀଙ୍କ ନିଷ୍ପତ୍ତି ମୋ ନିଷ୍ପତ୍ତି । ଲକ୍ଷ୍ୟ ରାଉରକେଲାର ପ୍ରଗତି । ଦଳ ମୋତେ ପ୍ରାର୍ଥୀ କଲେ ମୋର ଲଢ଼ିବାରେ କୌଣସି ଆପତ୍ତି ନାହିଁ ।

କୋଇଲା ଦୁର୍ନୀତି ମାମଲାରେ ଦିଲ୍ଲୀ ହାଇକୋର୍ଟରୁ ଆଶ୍ୱସ୍ତି ମିଳିବା ପରେ ପୂର୍ବତନ କେନ୍ଦ୍ରମନ୍ତ୍ରୀ ଦୀଲିପ ରାୟଙ୍କ ନିର୍ବାଚନ ଲଢିବା ବାଟ ଫିଟିସାରିଛି । ରାଉରକେଲାରୁ ବିଜେପିର ପ୍ରାର୍ଥୀ ହୋଇପାରନ୍ତି ଦିଲୀପ ରାୟ । ଦିଲୀପଙ୍କ ପ୍ରାର୍ଥୀତ୍ୱକୁ ନେଇ ବିଜେପିର ବରିଷ୍ଠ ନେତା ତଥା ବର୍ତ୍ତମାନର ସୁନ୍ଦରଗଡ଼ ସାଂସଦ ଜୁଏଲ୍ ଓରାମ ସୂଚନା ଦେଇଥିଲେ । ଦିଲୀପ ରାୟଙ୍କ ପ୍ରାର୍ଥୀତ୍ୱ ଚୂଡାନ୍ତ ହୋଇଥିବା ନେଇ ସବଡ଼େଗା ବିଜେପି କର୍ମୀ ସମ୍ମିଳନୀରେ ସାଂସଦ ଜୁଏଲ ଓରାମ ସୂଚନା ଦେଇଥିଲେ ।

ରାଉରକେଲା ଆସନ ପାଇଁ ବିଜେପି ପ୍ରାର୍ଥୀ ହେବେ ଦିଲୀପ ରାୟ । ଦିଲୀପଙ୍କ ପ୍ରାର୍ଥୀତ୍ୱ ଚୂଡ଼ାନ୍ତ ହୋଇଥିବା ସୂଚନା ଦେଇଥିଲେ ବରିଷ୍ଠ ନେତା ଜୁଏଲ ଓରାମ । ସେ କହିଥିଲେ, 'ଦିଲୀପଙ୍କ କୋର୍ଟ ମାମଲାକୁ ଅପେକ୍ଷା କରାଯାଇଥିଲା । ମାମଲା କ୍ଲିୟର ହେବା ପରେ ତାଙ୍କ ଟିକେଟ୍ ଘୋଷଣା ହେବ । କାଲି ଭିତରେ ଦିଲୀପଙ୍କ ଟିକେଟ ଘୋଷଣା ହେବ ।' 

ବିଧାନସଭା ପାଇଁ ସୁନ୍ଦରଗଡ ଜିଲ୍ଲାର ୬ଟି ଆସନ ପାଇଁ ବିଜେପି ପ୍ରାର୍ଥୀ ଘୋଷଣା କରିସାରିଥିବା ବେଳେ ରାଉରକେଲା ପାଇଁ ନାଁ ଘୋଷଣା କରିନାହିଁ । ରାଉରକେଲାରୁ ଦିଲୀପ ରାୟ ପ୍ରାର୍ଥୀ ହେବେ ବୋଲି ଜୁଏଲ କହିବା ସହ ବୁଧବାର ଦିଲୀପ ରାୟ ରାଉରକେଲାରେ ପହଞ୍ଚିବେ ଏବଂ ୧୧ ତାରିଖରୁ ରାଉରକେଲାରେ ପ୍ରଚାର ଆରମ୍ଭ ହେବ ବୋଲି କହିଥିଲେ । 

ଉଲ୍ଲେଖଯୋଗ୍ୟ ଯେ, ଏପ୍ରିଲ ୮ ସୋମବାର ପୂର୍ବତନ କେନ୍ଦ୍ରମନ୍ତ୍ରୀ ଦିଲୀପ ରାୟଙ୍କୁ ବଡ଼ ଆଶ୍ୱସ୍ତି ମିଳିଥିଲା । ଦିଲ୍ଲୀ ହାଇକୋର୍ଟ କୋଇଲା ଦୁର୍ନୀତି ମାମଲାରେ ତାଙ୍କ ଦଣ୍ଡାଦେଶ ଉପରେ ରହିତାଦେଶ ଲଗାଇଥିଲେ । ଏହାସହ ଦିଲୀପ ରାୟଙ୍କୁ ଆଗାମୀ ନିର୍ବାଚନରେ ଲଢିବା ପାଇଁ ହାଇକୋର୍ଟ ଅନୁମତି ଦେଇଥିଲେ । ଏପ୍ରିଲ ୫ ଶୁକ୍ରବାର ମାମଲାର ଶୁଣାଣି କରି ରାୟ ସଂରକ୍ଷିତ ରଖିଥିଲେ କୋର୍ଟ ।

ଏହା ପୂର୍ବରୁ ମାର୍ଚ୍ଚ ୨୧ରେ କୋଇଲା ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ ହୋଇଥିବା ପୂର୍ବତନ କେନ୍ଦ୍ରମନ୍ତ୍ରୀ ଦିଲୀପ ରାୟ ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଦିଲ୍ଲୀ ହାଇକୋର୍ଟରେ ଆବେଦନ ଦାଖଲ କରି ଦଣ୍ଡ ଉପରେ ରହିତାଦେଶ ଲଗାଇବାକୁ ଅପିଲ୍ କରିଥିଲେ । ଦିଲୀପ ରାୟ ଲୋକସଭା ଏବଂ ଓଡ଼ିଶା ବିଧାନସଭାରେ ନିର୍ବାଚନ ଲଢିବାକୁ ଚାହୁଁଥିବା କହିଥିଲେ । ଏହି ମାମଲାରେ ନ୍ୟାୟମୂର୍ତ୍ତି ସ୍ୱର୍ଣ୍ଣ କାନ୍ତା ଶର୍ମା ସିବିଆଇଙ୍କୁ ନୋଟିସ୍ ଜାରି କରି ଆବେଦନ ଉପରେ ଷ୍ଟାଟସ୍ ରିପୋର୍ଟ ଦାଖଲ କରିବା ପାଇଁ କୋର୍ଟ ସିବିଆଇକୁ ନିର୍ଦ୍ଦେଶ ଦେଇଥିଲେ । ପୂର୍ବତନ କେନ୍ଦ୍ରମନ୍ତ୍ରୀଙ୍କ ପାଇଁ କୋର୍ଟରେ ପକ୍ଷ ରଖି ବରିଷ୍ଠ ଆଇନଜୀବୀ ମୁକୁଲ ରୋହତଗି କହିଥିଲେ ଯେ ଦିଲୀପ ରାୟ ଆଗାମୀ ନିର୍ବାଚନ ଲଢିବାକୁ ଚାହୁଁଛନ୍ତି । ଏହି କାରଣରୁ ନିଜ ଦଣ୍ଡ ଉପରେ ରୋକ ଲଗାଇବା ପାଇଁ ନିବେଦନ କରୁଛନ୍ତି । ଯାଚିକାରେ କୁହାଯାଇଥିଲା ଯେ ଦିଲୀପ ରାୟଙ୍କ ବିରୋଧରେ ଅନେକ ମାମଲା ଚାଲିଛି । ଏହି ସବୁ ମାମଲା ଉପରେ ଶୀଘ୍ର ରାୟ ଆସିବାର ଆଶା ବହୁତ କମ ଅଛି । ଯାଚିକାରେ ଏହା ବି କୁହାଯାଇଥିଲା ଯେ ଦିଲୀପ ରାୟଙ୍କୁ ୭୧ ବର୍ଷ ହୋଇଛି । ଯଦି ରାୟରେ ବିଳମ୍ୱ ଘଟେ ତେବେ ଅପୂରଣୀୟ କ୍ଷତି ହେବାର ସମ୍ଭବନା ରହିଛି । ଏହାପରେ ମାମଲାର ପରବର୍ତ୍ତୀ ଶୁଣାଣିରେ ସିବିଆଇ ପୂର୍ବତନ କେନ୍ଦ୍ରମନ୍ତ୍ରୀଙ୍କ ଯାଚିକାକୁ ବିରୋଧ କରିଥିଲା ।

You Can Read :

ରାଉରକେଲାରୁ ଦିଲୀପ ରାୟ ବିଜେପି ପ୍ରାର୍ଥୀ, ଜୁଏଲ କହିଲେ-ପ୍ରାର୍ଥୀତ୍ୱ ଚୂଡାନ୍ତ