ନୂଆଦିଲ୍ଲୀ ୧୯।୯: ଫାଇନାନସିଆଲ ଆକ୍ସନ ଟାସ୍କଫୋର୍ସ (ଏଫଏଟିଏଫ)ର ନିକଟରେ ପ୍ରକାଶିତ ଏକ ରିପୋର୍ଟରେ ଭାରତରେ ଆତଙ୍କବାଦ ସଙ୍ଗଠନ ଆଇଏସଆଇଏସ୍ ଓ ଅଲକାଏଦା ସହିତ ଜଡିତ ଗୋଷ୍ଠୀଙ୍କ ଟେରର ଫଣ୍ଡିଂକୁ ନେଇ ଗଭୀର ଚିନ୍ତା ପ୍ରକଟ କରାଯାଇଛି। ରିପୋର୍ଟ ଅନୁସାରେ ବିଶେଷ କରି ଜମ୍ମୁ ଓ କାଶ୍ମୀରରେ ଏହି ଆତଙ୍କୀ ଗୋଷ୍ଠୀ ସକ୍ରିୟ ଥିବା ଓ କିଛି ବଡ଼ ଧରଣର କରିବାକୁ ଯୋଜନା କରୁଥିବା ଆକଳନ କରାଯାଇଛି।
ଆଇଏସଆଇଏସ ଓ ଅଲକାଏଦା ସମ୍ପର୍କିତ ସମୂହ ଜମ୍ମୁ-କାଶ୍ମୀର ଓ ଏହାର ଆଖପାଖ ଅଞ୍ଚଳରେ ଆତଙ୍କବାଦ ଗତିବିଧି ଲାଗି ଫଣ୍ଡ ଉପଯୋଗ କରୁଥିବା ରିପୋର୍ଟରେ କୁହାଯାଇଛି। ଏଫଏଟିଏଫ ଏହା ବି ଉଲ୍ଲେଖ କରିଛନ୍ତି ଯେ ଭାରତକୁ ଅଲଗା ଅଲଗା ପ୍ରକାରର ଆତଙ୍କବାଦ ବିପଦର ସାମ୍ନା କରିବାକୁ ପଡୁଛି, ଯାହା ସ୍ଥାନୀୟ ଓ ଅନ୍ତର୍ଜାତୀୟ ଆତଙ୍କବାଦ ସଙ୍ଗଠନ ସହ ସମ୍ପର୍କିତ। ଭାରତରେ ମନି ଲଣ୍ଡ୍ରିଂର ମୁଖ୍ୟସ୍ରୋତ ଦେଶ ଭିତରେ ଅବୈଧ ଗତିବିଧିରୁ ସୃଷ୍ଟି ହେଉଛି।
ଭାରତରେ ମନିଲଣ୍ଡ୍ରିଂ ଓ ଟେରର ଫଣ୍ଡିଂ ମାମଲାରେ ବିଚାର ପ୍ରକ୍ରିୟାର ଜଟିଳତା ଏବଂ ବିଚାରାଧୀନ ମାମଲାର ସଂଖ୍ୟାରୁ ଦୋଷ ସାବ୍ୟସ୍ତ ହାର ଅପେକ୍ଷାକୃତ କମ୍। ଏଫଏଟିଏଫ ରିପୋର୍ଟରେ ଏହା ମଧ୍ୟ ମାନିଛନ୍ତି ଯେ ଭାରତରେ ମନିଲଣ୍ଡ୍ରିଂ ଓ ଟେରର ଫଣ୍ଡିଂର ମୁକାବିଲା ନିମନ୍ତେ ପ୍ରଭାବୀ ପ୍ରଣାଳୀ ରହିଛି, କିନ୍ତୁ ପ୍ରସିକ୍ୟୁସନ ଓ ନ୍ୟାୟିକ ପ୍ରକ୍ରିୟାରେ ସୁଧାରର ଆବଶ୍ୟକତା ରହିଛି। ଏନଜିଓଙ୍କୁ ଆତଙ୍କବାଦୀ ଗତିବିଧି ଦୂରୁପଯୋଗରୁ ଉନ୍ନତ ସୁରକ୍ଷା ପ୍ରଦାନ କରିବାର ଆବଶ୍ୟକତା ଥିବା ରିପୋର୍ଟରେ କୁହାଯାଇଛି। ଖାସ କରି ଜମ୍ମୁ-କାଶ୍ମୀରରେ ସକ୍ରିୟ ଆତଙ୍କବାଦ ସମୂହ ଜେପରି ଆଇଏସଆଇଏସ ଓ ଅଲକାଏଦାର ବିପଦକୁ କମ କରିବା ଲାଗି ଭାରତକୁ ଟେରର ଫଣ୍ଡିଂ ସମ୍ପର୍କିତ ଆହ୍ୱାନର ମୁକାବିଲା ନିମନ୍ତେ ଆଇନ ପ୍ରକ୍ରିୟାକୁ ଆହୁରି ପ୍ରଭାବୀ କରିବାର ଆବଶ୍ୟକତା ଥିବା ଏହି ରିପୋର୍ଟରେ କୁହାଯାଇଛି।
