କେନ୍ଦୁଝର: ହୁତୁହୁତୁ ହୋଇ ଜଳିଲା ହସ୍ପିଟାଲ । କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭୟାବହ ଅଗ୍ନିକାଣ୍ଡ । ନିଆଁ ଏତେ ଭୀଷଣ ଭାବେ ଲାଗିଛି ଯେ, ଦମକଳ ବାହିନୀର ଦୁଇ ଗାଡ଼ି ନିଆଁ ଲିଭା କାର୍ଯ୍ୟରେ ଲାଗିଥିଲେ । ନିଆଁ ନିୟନ୍ତ୍ରଣ କରିବାକୁ ପ୍ରାୟ ଦୁଇ ଘଣ୍ଟାରୁ ଅଧିକ ସମୟ ଲାଗିଥିବା କୁହାଯାଉଛି ।
ସୂଚନା ଅନୁଯାୟୀ, କେନ୍ଦୁଝର ଜିଲ୍ଲାର ମୁଖ୍ୟ ଚିକିତ୍ସାଳୟରେ ଅଗ୍ନିକାଣ୍ଡ ଘଟିଛି । ହସ୍ପିଟାଲର ଏକ୍ସରେ ବିଭାଗ ନିକଟରେ ଥିବା ପୁରୁଣା ଘର ଓ ପୁରୁଣା ଓଟି ରୁମରେ ନିଆଁ ଲାଗିଥିଲା । ତେବେ ଏହି ଅଗ୍ନିକାଣ୍ଡରେ ପୁରୁଣା ଘର ସମ୍ପୂର୍ଣ୍ଣ ଭାବେ ଜଳିପୋଡ଼ି ପାଉଁଶ ହୋଇଯାଇଛି । ଏହାସହିତ ଜଣେ କର୍ମଚାରୀଙ୍କ ବାଇକ୍ ମଧ୍ୟ ପୋଡ଼ି ନଷ୍ଟ ହୋଇଛି । ତେବେ କେହି ଦୁର୍ବୃତ୍ତ ନିଆଁ ଲଗାଇଦେଇଛନ୍ତି ବୋଲି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ କହିଛନ୍ତି ।
