ପାକିସ୍ତାନକୁ ପାନେ ଦେଲା ଆଫଗାନିସ୍ତାନ, ଟମାଟୋ ଦର ଶୁଣିଲେ ଲାଗୁଛି ଡର

ପେଶାଓ୍ୱାର ୨୨/୧୦: ଦେବାଳିଆ ପାକିସ୍ତାନ । ଗମ୍ଭୀର ଆର୍ଥିକ ସଙ୍କଟ ଦେଇ ଗତି କରୁଛି ଦେଶ । ଏବେ, ଏହାର ପଡ଼ୋଶୀ ଦେଶ ପାଇଁ ଆଉ ଏକ ସମସ୍ୟା ଦେଖାଦେଇଛି। ପ୍ରକୃତରେ, ପାକିସ୍ତାନରେ ଟମାଟୋ ମୂଲ୍ୟ ଏବେ ସବୁ ରେକର୍ଡ ଭାଙ୍ଗିଛି । ରିପୋର୍ଟ ଅନୁଯାୟୀ, ଲାହୋର ଓ କରାଚୀ ସମେତ ଅଧିକାଂଶ ପ୍ରମୁଖ ସହରରେ ଟମାଟୋ ଏବେ କିଲୋଗ୍ରାମ ପିଛା ୭୦୦ ଟଙ୍କାରେ ବିକ୍ରି ହେଉଛି ।

ମାର୍କେଟର ସର୍ବାଧିକ ଦର ଶୁଣି ଛାନିଆ ଲୋକେ । କିଛି ସପ୍ତାହ ପୂର୍ବରୁ, ଟମାଟୋ କିଲୋଗ୍ରାମ ପିଛା ୧୦୦ ଟଙ୍କାରେ ବିକ୍ରି ହେଉଥିଲା । ଟମାଟୋ ମୂଲ୍ୟରେ ଏହି ଅହେତୁକ ବୃଦ୍ଧି ସାଧାରଣ ଲୋକଙ୍କ ଜୀବନକୁ କଷ୍ଟକର କରିଦେଇଛି । ସ୍ଥାନୀୟ କାରଣ ବ୍ୟତୀତ, ଆଫଗାନିସ୍ତାନ ସହିତ ବାଣିଜ୍ୟ କାରବାର ବାଧା ପ୍ରାପ୍ତ ଯୋଗୁଁ ମଧ୍ୟ ଟମାଟୋ ମୂଲ୍ୟ ବୃଦ୍ଧି ପାଇଛି। 

ସାମା ଟିଭି ଅନୁଯାୟୀ, ଦେଶର ବିଭିନ୍ନ ସ୍ଥାନରେ ବନ୍ୟା ଯୋଗୁଁ ଫସଲ ନଷ୍ଟ ହୋଇଛି । ବାଣିଜ୍ୟିକ ଉତ୍ପାଦନ ବାଧାପ୍ରାପ୍ତ ହୋଇଛି । ଏମିତିକି ଯୋଗାଣ ଅଭାବ ସୃଷ୍ଟି ହୋଇଛି । ଯାହା ଫଳରେ ଟମାଟୋର ମୂଲ୍ୟ ରେକର୍ଡ ଉଚ୍ଚତାକୁ ଠେଲି ଦେଇଛି । ଆଫଗାନିସ୍ତାନରୁ ପାକିସ୍ତାନକୁ ଟମାଟୋ ଯୋଗାଣ ମଧ୍ୟ ପ୍ରଭାବିତ ହୋଇଛି । ସୀମା ଉତ୍ତେଜନା ଓ ଆଫଗାନିସ୍ତାନ ରପ୍ତାନି ଉପରେ ପ୍ରତିବନ୍ଧକ ପରେ, ପାକିସ୍ତାନରେ, ବିଶେଷକରି ପ୍ରମୁଖ ସହରଗୁଡ଼ିକରେ ଟମାଟୋ ଏବଂ ଅନ୍ୟାନ୍ୟ ପନିପରିବାର ମୂଲ୍ୟ ବୃଦ୍ଧି ପାଇଛି।  

ସୂଚନା ଅନୁଯାୟୀ, ଝେଲମରେ ଟମାଟୋର ମୂଲ୍ୟ କିଲୋଗ୍ରାମ ପିଛା ୭୦୦ ଟଙ୍କାରେ ପହଞ୍ଚିଛି । ସେହିପରି ଗୁଜରାନୱାଲାରେ ଟମାଟୋ କିଲୋଗ୍ରାମ ପିଛା ୫୭୫ ଟଙ୍କାରେରେ ବିକ୍ରି ହେଉଛି। ଫୈସଲାବାଦରେ ଟମାଟୋର ମୂଲ୍ୟ ପ୍ରତି କିଲୋଗ୍ରାମ ୧୬୦ ଟଙ୍କାରୁ ୫୦୦ ଟଙ୍କାକୁ ବୃଦ୍ଧି ପାଇଛି । ମୁଲତାନରେ, ଟମାଟୋ ପ୍ରତି କିଲୋଗ୍ରାମ ୪୫୦ ଟଙ୍କାରେ ବିକ୍ରି ହେଉଛି । ଯେତେବେଳେ ସରକାରୀ ମୂଲ୍ୟ ତାଲିକା ସର୍ବାଧିକ ମୂଲ୍ୟ ପ୍ରତି କିଲୋଗ୍ରାମ ୧୭୦ ଟଙ୍କାରେ ଧାର୍ଯ୍ୟ କରିଛି। ଲାହୋରରେ, ଟମାଟୋ ପ୍ରତି କିଲୋଗ୍ରାମ ୪୦୦ ଟଙ୍କାରେ ବିକ୍ରି ହେଉଛି, ଯାହା ସରକାରଙ୍କ ଦ୍ୱାରା ଧାର୍ଯ୍ୟ ୧୭୫ ଟଙ୍କାରେ ମୂଲ୍ୟ ଅପେକ୍ଷା ଯଥେଷ୍ଟ ଅଧିକ।