ମୈସୁର ୧୭।୨: କର୍ଣ୍ଣାଟକ ମୈସୁର ସହରର ବିଶ୍ୱେଶ୍ୱରୈୟା ନଗରରେ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ସୋମବାର ଗୋଟିଏ ଘରୁ ୪ ଜଣଙ୍କ ଶବ ଜବତ ହୋଇଛି। ମୃତକଙ୍କୁ ଚେତନ (୪୫) ତାଙ୍କ ପତ୍ନୀ ରୂପାଲୀ (୪୩) ପୁଅ କୁଶାଲ (୧୫) ଓ ଚେତନଙ୍କ ମା ପ୍ରିୟମ୍ବଦା (୬୨) ଭାବେ ଚିହ୍ନଟ କରାଯାଇଛି। ପୋଲିସର ପ୍ରାରମ୍ଭିକ ଯାଞ୍ଚରୁ ଚେତନ ପ୍ରଥମେ ପରିବାରକୁ ବିଷ ଦେବା ପରେ ନିଜେ ରଶି ଲଗାଇ ଆତ୍ମହତ୍ୟା କରିଛନ୍ତି ବୋଲି ସନ୍ଦେହ କରୁଛି। ତେବେ ୪ଜଣଙ୍କ ମୃତ୍ୟୁର କାରଣ କଣ ତାହା ସ୍ପଷ୍ଟ ହୋଇ ପାରିନାହିଁ।
ଏହି ଘଟଣା ମୈସୁର ସହରରେ ଚାଞ୍ଚଲ୍ୟ ଖେଳାଇ ଦେଇଛି। ସୂଚନା ଅନୁସାରେ ଚେତନ ହାସନ ଜିଲ୍ଲା ଗୋରୁର ଗାଁର ବାସିନ୍ଦା। ସେ ଦୁବାଇରେ ଇଞ୍ଜିନିୟର ଭାବେ କାମ କରୁଥିଲେ। ସେ ୨୦୧୯ ମସିହାରେ ଭାରତ ଫେରିଆସିଥିଲେ ଓ ମୈସୁରରେ ଏକ ଜବ କନସଲଟାନ୍ସୀ ଆରମ୍ଭ କରିଥିଲେ। ସେ ଦୁବାଇର କମ୍ପାନୀମାନଙ୍କରେ ଗ୍ରାଜୁଏଟଙ୍କୁ ଚାକିରୀ ଦିଆଉଥିଲେ। ଚେତନ ରବିବାର ପରିବାରକୁ ଗୋରୁର ମନ୍ଦିର ବୁଲାଇବାକୁ ନେଇଯାଇଥିଲେ। ଫେରିବା ବାଟରେ ସେ ତାଙ୍କ ଶ୍ୱଶୂର ଘରେ ପରିବାର ସହ ଭୋଜନ ମଧ୍ୟ କରିଥିଲେ।
ପୋଲିସ ଅନୁସାରେ ଘରୁ ବିଷର ସମାନ୍ୟତମ ଅଂଶ ବି ମିଳି ନାହିଁ। ତେବେ ଆଶଙ୍କା କରାଯାଉଛି ଚେତନ ପରିବାରକୁ ବିଷ ଦେଇ ହତ୍ୟା କରିବା ପରେ ନିଜେ ଆତ୍ମ ହତ୍ୟା କରିଥାଇ ପାରନ୍ତି। ତେବେ ମାମଲାରେ ଫରେନସିକ୍ ଓ ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା କରାଯାଇଛି। ପଡୋଶୀଙ୍କ ଅନୁସାରେ ପରିବାର ଗତ ୧୦ବର୍ଷ ହେଲା ଏହି ଆପାର୍ଟମେଣ୍ଟରେ ରହି ଆସୁଛି। ପରିବାରର ସମସ୍ତେ ସ୍ୱଭାବିକ ଜୀବନଯାପନ କରୁଥିଲେ ସେମାନେ କୌଣସି ସମସ୍ୟାରେ ଥିଲେ ସେମାନଙ୍କ ଚଳଣୀରୁ ତାହା ଜଣା ପଡୁନଥିଲା। ଏହି ଘଟଣା ଏବେ ନା କେବଳ ପୋଲିସ ପାଇଁ ଏକ ଚ୍ୟାଲେଞ୍ଜ ପାଲଟିଛି, ଘଟଣା ସାରା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।
