ମୁମ୍ବାଇରେ ମୋହନ ଭାଗବତଙ୍କ ବଡ଼ ବୟାନ, କହିଲେ-ଭାରତରେ ଅଛନ୍ତି ୪ କିସମର ହିନ୍ଦୁ

ମୁମ୍ବାଇ ୭।୨: ରାଷ୍ଟ୍ରୀୟ ସ୍ୱୟଂ ସେବକ ସଂଘ (ଆରଏସଏସ) ମୁଖ୍ୟ ମୋହନ ଭାଗବତ ଶନିବାର ହିନ୍ଦୁଙ୍କୁ ନେଇ ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ ଆମେ ବିଶ୍ୱଗୁରୁ ହେବା, ହେଲେ ଭାଷଣରେ ନୁହେଁ। ଆମକୁ ଉଦାହରଣ ଉପସ୍ଥାପନ କରିବାକୁ ପଡିବ। ସେ କହିଛନ୍ତି ଯେ ଯଦି ଆପଣ ଭାରତରେ ରହୁଛନ୍ତି ଏହି ସ୍ୱଭାବ ଆପଣଙ୍କଠାରେ ରହିଛି। ସେ କହିଛନ୍ତି ଭାରତର ମୁସଲମାନ ଓ ଇସାୟୀ ସେମାନେ ଭାରତର। ଏହା ଛଡା ଭାରତରେ ୪ କିସମର ହିନ୍ଦୁ ରହୁଛନ୍ତି।

ହିନ୍ଦୁଙ୍କ ଶ୍ରେଣୀ ବିଭାଜନ କରି ସେ କହିଛନ୍ତି ଯେ ପ୍ରଥମ କିସମର ଲୋକେ ହେଉଛନ୍ତି ସେହିମାନେ ଯେଉଁମାନେ କହୁଛନ୍ତି ଗର୍ବରେ କୁହ ଆମେ ହିନ୍ଦୁ। ଦ୍ୱିତୀୟ କିମସର ହିନ୍ଦୁ ହେଉଛନ୍ତି ଆମେ ତ ହିନ୍ଦୁ ଏଥିରେ ଗର୍ବର କଥା କ’ଣ? ତୃତୀୟ କିସମର ହିନ୍ଦୁ ହେଉଛନ୍ତି ଧିରେ କୁହ ଆମେ ହିନ୍ଦୁ, ଘରକୁ ଆସି ପଚାରିଲେ କହିବା। ଚତୁର୍ଥ କିସମର ହିନ୍ଦୁ ହେଉଛନ୍ତି ଯେଉଁମାନେ ଭୁଲି ଯାଇଛନ୍ତି, ସେମାନଙ୍କୁ ଭୁଲେଇ ଦିଆଯାଇଛି। ଆହୁରି ଲୋକେ ବି ଭୁଲି ଯାଆନ୍ତୁ ଏହି ପ୍ରୟାସ ଏବେ ଚାଲିଛି।

ଏହା ଛଡା ସଂଘର କାମ ସମ୍ପର୍କରେ ସେ କହିଛନ୍ତି ଯେ ସଂଘର କାମ ବାସ୍ତବିକ ଅନନ୍ୟ, ସାରା ଦୁନିଆରେ ଏପରି କାମ କେଉଁଠି ହେଉନି। ଏବେ ପ୍ରତ୍ୟକ୍ଷ ରୂପେ ଏହାର ଅନୁଭବ ହେଉଛି। ହିନ୍ଦୁ କେବଳ ଏକ ସାଙ୍ଗିଆ ନୁହେଁ ଏହା ବିଶେଷଣ। ଭାରତରେ ରହୁଥିବା ସବୁ ଲୋକେ ହିନ୍ଦୁ ହିଁ ଅଟନ୍ତି। ଏହି ସବୁ କଥା ମୋହନ ଭାଗବତ ଆରଏସଏସର ୧୦୦ ତମ ବାର୍ଷିକ ଅବସରରେ ମୁମ୍ବାଇରେ ଅନୁଷ୍ଠିତ ଏକ କାର୍ଯ୍ୟକ୍ରମରେ କହିଛନ୍ତି।

ସେ କହିଛନ୍ତି ଯେ ସଂଘ ପୂର୍ବରୁ ନିର୍ଦ୍ଧାରଣ କରିଛି ଯେ ସମ୍ପୂର୍ଣ୍ଣ ସମାଜକୁ ସଙ୍ଗଠିତ କରିବା ଛଡା ସଂଘର ଅନ୍ୟ କୌଣସି କାମ ନାହିଁ, ଅନ୍ୟ କାମ କରାଯିବନି। ଯାହାକୁ ଆପଣ ଆରଏସଏସ କହୁଛନ୍ତି ତାହା କିପରି କହୁଛନ୍ତି ଜାଣେନା। ଅନେକ ଲୋକ କହନ୍ତି ନରେନ୍ଦ୍ର ଭାଇ ପ୍ରଧାନମନ୍ତ୍ରୀ, ସେ ଆରଏସଏସର ପ୍ରଧାନମନ୍ତ୍ରୀ। ତାଙ୍କର ଏକ ରାଜନୈତିକ ପାର୍ଟି ଅଛି, ତାହା ବିଜେପି ଓ ଅଲଗା ଅଛି। ଏଥିରେ ଅନେକ ସ୍ୱୟଂସେବକ ଅଛନ୍ତି ଯେଉଁମାନେ ବେଶ୍ ପ୍ରଭାବୀ।ଆରଏସଏସର କାମ ନୁହେଁ କାହାକୁ ବିରୋଧ କରିବା।

ସଂଘକୁ ଲୋକପ୍ରିୟତା ଦରକାର ନାହିଁ, ସେହିପରି ସଂଘକୁ କ୍ଷମତାର ମଧ୍ୟ ଆବଶ୍ୟକତା ନାହିଁ। ସଂଘର କେବଳ ଗୋଟିଏ ଉଦ୍ଦେଶ୍ୟ, ଦେଶରେ ଯାହା ଭଲ କାମ ହେଉଛି ତାହା ନିର୍ବିଘ୍ନରେ ହୋଇ ଯାଉ। ସେ କହିଛନ୍ତି ଯେ ଡ. ହେଡଗୱାରଙ୍କ ଦୁଇଟି କଥାକୁ କେବେ ଭୁଲିଯିବନି।ଗୋଟିଏ ହେଉଛି ପାଠପଢାରେ ପ୍ରଥମ ହେବା ଓ ଦ୍ୱିତୀୟ କାମ ହେଉଛି ଦେଶ ପାଇଁ ଯାହା ବି କାମ ହେଉଛି ସେଥିରେ ସକ୍ରିୟ ଭାଗନେବା। ଏହା ତାଙ୍କ ଜୀବନର ସ୍ଥାୟୀ କାର୍ଯ୍ୟ ଥିଲା।