ଶୁଭମିତ୍ରା ସାହୁଙ୍କ ହତ୍ୟା ମାମଲା : କୋର୍ଟରେ ୭ ଶହ ପୃଷ୍ଠାର ଚାର୍ଜସିଟ୍ ଦାଖଲ, ଦୀପକ ରାଉତ ମୁଖ୍ୟ ଅଭିଯୁକ୍ତ !

ଭୁବନେଶ୍ୱର ୦୨।୧୨ : ବହୁଚର୍ଚ୍ଚିତ ମହିଳା କନଷ୍ଟେବଳ ଶୁଭମିତ୍ରା ସାହୁଙ୍କ ହତ୍ୟା ମାମଲା । କ୍ୟାପିଟାଲ ଥାନା ପୋଲିସ ତଦନ୍ତ ପ୍ରକ୍ରିୟା ପ୍ରାୟତଃ ସରିଛି। ଅଦାଲତରେ ପ୍ରାୟ ୭ଶହ ପୃଷ୍ଠା ସମ୍ବଳିତ ଚାର୍ଜସିଟ୍ ଦାଖଲ କରିଛି ପୋଲିସ। ଏଥିରେ ଅଭିଯୁକ୍ତ ସ୍ଵାମୀ ଦୀପକ ରାଉତଙ୍କୁ ମୁଖ୍ୟ ଅଭିଯୁକ୍ତ ଦର୍ଶାଇଛି। ଦୀପକର ୨ ଜଣ ସହଯୋଗୀଙ୍କୁ ମଧ୍ୟ ଅଭିଯୁକ୍ତ ବୋଲି ଚାର୍ଜସିଟରେ ଉଲ୍ଲେଖ କରାଯାଇଛି। ପୋଲିସ ହତ୍ୟାସ୍ଥଳ ଓ ମୃତଦେହ ପୋଡିବା ସ୍ଥଳଠାରୁ ସଂଗୃହିତ ଏକାଧିକ ପ୍ରମାଣପତ୍ର ସମ୍ପର୍କରେ ଚାର୍ଜସିଟରେ ଉଲ୍ଲେଖ କରିଛି। ସେମାନଙ୍କ କୋର୍ଟ ମ୍ୟାରେଜ ସାର୍ଟିଫିକେଟ୍ ସହ ଏକାଠି ରହିବାର ପ୍ରମାଣ ସୂରୁପ କିଛି ଫଟୋଚିତ୍ର ଓ ଶୁଭମିତ୍ରାଙ୍କ ବୀମା ସମ୍ପର୍କିତ କାଗଜପତ୍ର ମଧ୍ୟ ଏଥିରେ ଯୋଡ଼ାଯାଇଛି।

ସେହିପରି ଶବ ବ୍ୟବଚ୍ଛେଦ କରିଥିବା ଡାକ୍ତର ରିପୋର୍ଟ, ମାଟିତଳୁ ଶବ ଖୋଳାଯିବା ବେଳେ ପ୍ରତ୍ୟକ୍ଷଦର୍ଶୀଙ୍କ ବୟାନ, ଶୁଭମିତ୍ରାଙ୍କ ପରିବାର ଲୋକଙ୍କ ବୟାନକୁ ମଧ୍ୟ ଚାର୍ଜସିଟରେ ରଖାଯାଇଛି। ୩ ଅଭିଯୁକ୍ତଙ୍କ ବିରୋଧରେ ସାକ୍ଷ୍ୟ ଦେଇଛନ୍ତି ୪୨ ଜଣ ସାକ୍ଷୀ। ଜଣେ ବରିଷ୍ଠ ପୋଲିସ ଅଧିକାରୀଙ୍କ କହିବା ମୁତାବକ, ଶୁଭମିତ୍ରାଙ୍କୁ ଯୋଜନାବଦ୍ଧ ହତ୍ୟା କରିଥିବାରୁ ଦୀପକ ବିଭିନ୍ନ ପ୍ରମାଣ ନଷ୍ଟ ପାଇଁ ଚେଷ୍ଟା କରିଥିଲା । ଶୁଭମିତ୍ରାଙ୍କ ମୃତଦେହରୁ ପୋତିବାଠୁ ପ୍ରମାଣ ନ ନଷ୍ଟ କରିବା ଯାଏ ସବୁଥିରେ ଦୀପକର ସମ୍ପର୍କୀୟ ଭାଇ ବିନୋଦର ପ୍ରତ୍ୟକ୍ଷ ସମ୍ପୃକ୍ତି ଥିଲା। ବିନୋଦର ସାଙ୍ଗ ଜଟିଆ ଓ ଜେସିବି ଡ୍ରାଇଭର ମଧ୍ୟ ଶବ ପୋତିବାରେ ସାହାଯ୍ୟ କରିଥିଲେ। ପୋଲିସ ଏକାଧିକ ବ୍ୟକ୍ତିକୁ ସାକ୍ଷୀ ଭାବେ ଅଦାଲତରେ ହାଜର କରିବାକୁ ଯୋଜନା ରଖିଛି। ଯାହାକି, ଶୁଣାଣି ବେଳେ ଅଭିଯୁକ୍ତମାନଙ୍କୁ ଦୋଷୀ ସାବ୍ୟସ୍ତ କରିବାରେ ବଳିଷ୍ଠ ପ୍ରମାଣ ସାଜିବ। କମିଶନରେଟ୍ ପୋଲିସର ଟ୍ରାଫିକ୍ ଡିସିପିଙ୍କ କାର୍ଯ୍ୟାଳୟରେ ଶୁଭମିତ୍ରା କାର୍ଯ୍ୟ କରୁଥିଲେ । ସେପ୍ଟେମ୍ବର ୬ ତାରିଖରେ ସେ ଅଫିସ ଆସି ଘରକୁ ଫେରିନଥିଲେ । ପରିବାର ଲୋକ ତାଙ୍କୁ ଅନେକ ଖୋଜାଖୋଜି କରିବା ପରେ କ୍ୟାପିଟାଲ ଥାନାରେ ଏତଲା ଦେଇଥିଲେ। କିଛି ଦିନ ପରେ କେନ୍ଦୁଝର ଜଙ୍ଗଲରୁ ତାଙ୍କ ଗଳିତ ମୃତଦେହ ପୋଲିସ ଉଦ୍ଧାର କରିଥିଲା।