ଭୁବନେଶ୍ୱର ୧୬।୦୯ : ଗାଙ୍ଗେୟ ପଶ୍ଚିମବଙ୍ଗ ଉପରେ ସୃଷ୍ଟି ହୋଇଥିବା ତୀବ୍ର ଅବପାତ ପଶ୍ଚିମ-ଉତ୍ତର ପଶ୍ଚିମ ଦିଗରେ ମୁହାଁଇଛି। ମଙ୍ଗଳବାର ଯାଏଁ ଏହାର ତୀବ୍ରତା ବଜାୟ ରହିବ । ତେବେ ଏହାର ପ୍ରଭାବରେ ରାଜ୍ୟର କିଛି ସ୍ଥାନରେ ପ୍ରବଳ ବର୍ଷା ହୋଇପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି ।
ସୋମବାର ସୁନ୍ଦରଗଡ଼ ଓ ଝାରସୁଗୁଡ଼ାରେ ପ୍ରବଳ ବର୍ଷା ହୋଇପାରେ। ବର୍ଷା ଆଶଙ୍କା ଥିବାରୁ ସବୁ ଜିଲ୍ଲାପାଳଙ୍କୁ ସତର୍କ କରାଇଛନ୍ତି ସ୍ୱତନ୍ତ୍ର ରିଲିଫ କମିଶନର(ଏସ୍ଆର୍ସି) । ସୋମବାର କେନ୍ଦୁଝର, ଦେବଗଡ଼, ସମ୍ବଲପୁର, ବରଗଡ଼, ସୋନପୁର, ବୌଦ୍ଧ ଓ ଅନୁଗୁଳରେ ପ୍ରବଳ ବର୍ଷା ହୋଇପାରେ । ଏ ସବୁ ଜିଲ୍ଲାର କିଛି ସ୍ଥାନରେ ୭୦ରୁ ୧୧୦ ମିମି ପର୍ଯ୍ୟନ୍ତ ବର୍ଷା ହୋଇପାରେ ବୋଲି ପାଣିପାଗ ବିଭାଗ ଆକଳନ କରିଛି । ପ୍ରବଳ ବର୍ଷା ପାଇଁ କଚ୍ଚା ଘର ଓ ରାସ୍ତା କ୍ଷତିଗ୍ରସ୍ତ ହୋଇପାରେ। ତଳିଆ ଅଞ୍ଚଳରେ ପାଣି ବି ଜମିବାର ଆଶଙ୍କା ଅଛି । ଏଥିପାଇଁ ସତର୍କ କରାଇଛି ପାଣିପାଗ ବିଭାଗ ।
ଗତ ୨୪ ଘଣ୍ଟାରେ ବାଲେଶ୍ୱରର ଭୋଗରାଇରେ ୧୩୦ ମିମି, ରାଜଘାଟରେ ୧୨୦, ଉଦଳାରେ ୧୧୦, ଜଳେଶ୍ୱରରେ ୧୦୦, ଟେନ୍ସାରେ ୧୦୦, ମୟୂରଭଞ୍ଜର ରାସଗୋବିନ୍ଦପୁରରେ ୯୦, ସୁଲିଆପଦାରେ ୧୧୦, ବେତନଟୀରେ ୮୦, କପ୍ତିପଦାରେ ୮୦ ମିମି ବର୍ଷା ହୋଇଛି । ବାଲେଶ୍ୱରରେ ଅଧିକ ବର୍ଷା ଯୋଗୁ ମଥାନି ରୋଡ୍ଠାରେ ଜଳକା ନଦୀ ବିପଦ ସଙ୍କେତ ପାର୍ କରିଛି । ତେବେ ରାଜ୍ୟର ଅନ୍ୟ ପ୍ରମୁଖ ନଦୀରେ ଜଳସ୍ତର ବିପଦ ସଙ୍କେତ ସ୍ତରଠାରୁ ବହୁ ତଳେ ରହିଛି ।
ଦୁର୍ବଳ ହେଉଛି ଗଭୀର ଅବପାତ, ଉତ୍ତର ଓଡ଼ିଶାରେ ପ୍ରବଳ ବର୍ଷା ସମ୍ଭାବନା
