କେଣ୍ଟୁକୀ ୧୭।୨: ଆମେରିକାରେ ଭୀଷଣ ଥଣ୍ଡା ଯୋଗୁ ଅନୁନ୍ୟ ୯ ଜଣଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରୁ ୮ ଜଣ କେଣ୍ଟୁକୀର ବାସିନ୍ଦା ଓ ସେମାନଙ୍କ ମୃତ୍ୟୁ ବର୍ଷା ଯୋଗୁ ନଦୀ ଉଛୁଳି ରାସ୍ତାରେ ପାଣି ଭରିଯିବା ଯୋଗୁ ହୋଇଛି। କେଣ୍ଟୁକୀ ଗଭର୍ଣ୍ଣର ଏଣ୍ଡି ବେସିୟର କହିଛନ୍ତି ଯେ ପାଣି ଘେରରେ ଥିବା ଲୋକଙ୍କୁ ବାହାର କରିବା ଏବେ ସବୁଠାରୁ ବଡ଼ ଚ୍ୟାଲେଞ୍ଜ। ଏଥିରୁ କେତେକଙ୍କ ମୃତ୍ୟୁ ପାଣିରେ କାର ଫଶିବା କାରଣରୁ ହୋଇଛି। କାରରେ ପାଣି ଭରିଯିବା ଯୋଗୁ ଏକ ୭ ବର୍ଷର ଶିଶୁ ଓ ତା ମା ପ୍ରାଣ ହରାଇଛନ୍ତି।
ଶନିବାର ହୀମଝଡ଼ ସହ ବର୍ଷା ଆରମ୍ଭ ହୋଇଥିଲା। ବର୍ଷା ଜାରି ଥିବା ବେଳେ ପୁରା ରାଜ୍ୟରେ ୧ହଜର ଲୋକଙ୍କୁ ଉଦ୍ଧାର କରାଯାଇଛି। ଝଡତୋଫାନ ଯୋଗୁ ୩୯ ହଜର ଘରକୁ ବିଦ୍ୟୁତ ଯୋଗାଣ ବାଧାପ୍ରାପ୍ତ ହୋଇଛି। ନ୍ୟାସନାଲ ୱେଦର ସର୍ଭିସର ବରିଷ୍ଠ ପୂର୍ବାନୁମାନକାରୀ ବବ ଓରାଭେକ କହିଛନ୍ତି ଯେ କେଣ୍ଟୁକୀ ଓ ଟେନିସୀର କିଛି ଅଞ୍ଚଳରେ ୬ ଇଞ୍ଚ ବର୍ଷା ହୋଇଛି। ଏହି ପାଗ ଆଉ କିଛି ସମୟ ପର୍ଯ୍ୟନ୍ତ ଜାରି ରହିବ ବୋଲି ଓରାଭେକ କହିଛନ୍ତି।
ବର୍ଷା ଯୋଗୁ ଶନିବାର ମଧ୍ୟାହ୍ନରେ ଟେନିସୀରେ ଏକ ଛୋଟ ବନ୍ଧ ଭାଙ୍ଗିଯାଇଥିଲା। ଫଳରେ ଆଖପାଖ ଅଞ୍ଚଳରେ ବନ୍ୟା ଆସିଥିଲା। ପଶ୍ଚିମ ଟେନିସୀରେ ଅଗ୍ନିସମ ବିଭାଗ ପକ୍ଷରୁ ଉଦ୍ଧାର ଓ ରିଲିଫ ଅଭିଯାନ ଚଳାଯାଇଛି। ଓବିୟନ କାଉଣ୍ଟିରେ ଭାଙ୍ଗି ଥିବା ଏହି ବନ୍ଧ କିପରି ଭାଙ୍ଗିଲା ଓ ଏଥି ଯୋଗୁ କେତେ ଲୋକ ପ୍ରଭାବିତ ହୋଇଛନ୍ତି ଏହା ସ୍ପଷ୍ଟ ହୋଇ ନାହିଁ। ତେବେ ଏହି ବନ୍ଧ ଭାଙ୍ଗିବାର କିଛିଘଣ୍ଟା ପୂର୍ବରୁ ନ୍ୟାସନାଲ ୱେଦର ସର୍ଭିସ ଦ୍ୱାରା ଅଚାନକ ବନ୍ୟା ଚେତାବନୀ ଜାରି କରାଯାଇଥିଲା।
ଆଟଲାଣ୍ଟାରେ ରବିବାର ସକାଳେ ଏକ ଘର ଉପରେ ଗଛ ଉପୁଡିପଡିବାରୁ ଜଣଙ୍କର ମୃତ୍ୟୁ ହୋଇଛି। କାନାଡା ସୀମାରେ ତାପମାତ୍ରା ହ୍ରାସ ପାଇବା ଯୋଗୁ ଡକୋଟା ଓ ମିନେସୋଟାରେ ତାପମାତ୍ରା ଯଥାକ୍ରମେ ବିଯୁକ୍ତ ୪୦ ଡିଗ୍ରି ଓ ବିଯୁକ୍ତ ୪୫.୬ ଡିଗ୍ରି ସେଲସିୟସକୁ ହ୍ରାସ ହୋଇଛି। ଏଣୁ ବର୍ଷା ସାଙ୍ଗକୁ ଥଣ୍ଡା ପବନ ବହିବାର ମଧ୍ୟ ଆଶଙ୍କା କରାଯାଉଛି।
