ନୂଆଦିଲ୍ଲୀ ୧୪।୧୦: ହରିୟାଣାରେ ହୋଇଥିବା ପରାଜୟରୁ କଂଗ୍ରେସ ଏପର୍ଯ୍ୟନ୍ତ ନିଜକୁ ମୁକ୍ତ କରିପାରି ନାହିଁ। ଏଣୁ ମାହାରାଷ୍ଟ୍ର ନିର୍ବାଚନ ଘୋଷଣା ପୂର୍ବରୁ ପାର୍ଟି ରଣନୀତି ସ୍ଥିର କରିବା ଆରମ୍ଭ କରିଛି। ଏହି କ୍ରମରେ ମହାରାଷ୍ଟ୍ର କଂଗ୍ରେସର ନେତାମାନଙ୍କ ସହିତ ସୋମବାର କେନ୍ଦ୍ରୀୟ ନେତାମାନେ ଦିଲ୍ଲୀରେ ଉଚ୍ଚସ୍ତରୀୟ ବୈଠକ କରିଛନ୍ତି। ଏଥିରେ ମହାରାଷ୍ଟ୍ର କଂଗ୍ରେସର ନେତାମାନଙ୍କୁ ଅତି ଆତ୍ମବିଶ୍ୱାସରେ ବେପରୁଆ ନ ହେବାକୁ ପରାମର୍ଶ ଦିଆଯାଇଛି।
ହରିୟାଣାରେ ପରାଜୟ ପରେ ମହାରାଷ୍ଟ୍ରର ନେତାମାନେ ଦିଲ୍ଲୀରେ ପାର୍ଟି ହାଇକମାଣ୍ଡଙ୍କ ସହିତ ବିଚାରବିମର୍ଶ କରିଛନ୍ତି। ବୈଠକରେ ଆଗକୁ ରାସ୍ତା ଓ ନିର୍ବାଚନ ରଣନୀତି ଉପରେ ଚର୍ଚ୍ଚା ହୋଇଛି। ତେବେ ହରିୟାଣା ପରାଜୟ ଏହି ବୈଠକ ଉପରେ ଛାଇ ରହିଥିଲା, ହେଲେ ଏହାର କେହି ଉଲ୍ଲେଖ କରିନଥିଲେ। ଦିଲ୍ଲୀରେ ଏହି ବୈଠକ ଖଡଗେଙ୍କ ବାସଭବନରେ ଅନୁଷ୍ଠିତ ହୋଇଛି। ଏହି ଅବସରରେ ପାର୍ଟି ନେତୃତ୍ୱ ମହାରାଷ୍ଟ୍ରରେ ଏମଭିଏର ସ୍ଥିତିକୁ ଦେଖି ନେତା ଓଭର କନଫିଡେନ୍ସରେ ନ ରହନ୍ତୁ ବୋଲି ପରାମର୍ଶ ଦେଇଛନ୍ତି, ଏକଜୁଟ ରହିବାକୁ ଓ ରାଜ୍ୟରେ କ୍ଷମତାସୀନ ମେଣ୍ଟକୁ ହରାଇବାକୁ ନେତା କଠିନ ପରିଶ୍ରମ କରନ୍ତୁ ବୋଲି କୁହାଯାଇଛି।
ଏହି ବୈଠକ ପରେ ମୁମ୍ବାଇରେ ବି ମହାରାଷ୍ଟ୍ର କଂଗ୍ରେସର ଏକ ବଡ଼ ବୈଠକ ଅନୁଷ୍ଠିତ ହୋଇଛି। ଏଥିରେ କେନ୍ଦ୍ରୀୟ ନେତୃତ୍ୱ ଦେଇଥିବା ବାର୍ତ୍ତାକୁ ନେଇ ଚର୍ଚ୍ଚା ହୋଇଛି। ପାର୍ଟିର ନିର୍ବାଚନ ରଣନୀତିକାର ସୁନୀଲ କୋଣୁଗୋଲୁ ମଧ୍ୟଏହି ବୈଠକରେ ଉପସ୍ଥିତ ଥିଲେ। ଏହି ଅବସରରେ ସେ ରାଜ୍ୟରେ ଜାତି ଓ ସମୂଦାୟ ବିଭାଜନ ସମ୍ପର୍କରେ ସୂଚନା ଦେଇଥିଲେ। ନିର୍ବାଚନ ଘୋଷଣା ପତ୍ରରେ କଣ ସାମିଲ କରାଯିବ ସେ ନେଇ ମଧ୍ୟ ବୈଠକରେ ପରାମର୍ଶ ଦିଆଯାଇଛି। ଏହା ଛଡା ଘୋଷଣାପତ୍ର ପାଇଁ ସହଯୋଗୀଙ୍କ ସହ ବୈଠକ ମୁମ୍ବାଇରେ ଅନୁଷ୍ଠିତ ହୋଇଛି।
କଂଗ୍ରେସ ମହାରାଷ୍ଟ୍ର ନିର୍ବାଚନ ଏମଭିଏ ମେଣ୍ଟରେ ଲଢୁଛି। ଏଣୁ ମେଣ୍ଟର ଭାବନା ସବୁ ନେତାଙ୍କ ମଧ୍ୟରେ ରହିବା ଦରକାର ବୋଲି କୁହାଯାଇଛି। ସେହିପରି ମୁଖ୍ୟମନ୍ତ୍ରୀ ଚେହେରାକୁ ନେଇ ହେଉଥିବା ପ୍ରଶ୍ନରେ ଏମଭିଏ ହିଁ ଆମର ମୁଖ୍ୟମନ୍ତ୍ରୀ ଚେହେରା କହିବାକୁ ବୈଠକରେ କୁହାଯାଇଛି। ହରିୟାଣାର ପରାଜୟକୁ ଦେଖି ବଡ଼ ନେତାଙ୍କୁ ବିବାଦୀୟ ବୟାନରୁ ବର୍ତ୍ତିବା ଲାଗି ପରାମର୍ଶ ଦିଆଯାଇଛି। ଏହା ଛଡା ଆଶନ ବଣ୍ଟନ ଦୀର୍ଘ ନକରିବା, ବିଜୟୀ ପ୍ରାର୍ଥୀଙ୍କୁ ବାଛି ଟିକେଟ ଦେବା, ନିର୍ବାଚନ ଇସ୍ତାହାର ଉପରେ ଖାସ ଧ୍ୟାନ ଦେବାକୁ ମଧ୍ୟ ପରାମର୍ଶ ଦିଆଯାଇଛି। ସେହିପରି ସରକାରଙ୍କ ଦୁର୍ନୀତି, ଆଇନ ଶୃଙ୍ଖଳା ଓ ମହିଳା ସୁରକ୍ଷାକୁ ପ୍ରଚାରର ମୁଖ୍ୟବିନ୍ଦୁ କରିବାକୁ କୁହାଯାଇଛି।
