ବେଙ୍ଗାଲୁରୁ ୨୧/୦୪: କର୍ଣ୍ଣାଟକର ପୂର୍ବତନ ଡିଜିପିଙ୍କ ମୃତ୍ୟୁ ଘଟଣାରେ ଟ୍ୱିଷ୍ଟ। ଘଟଣା ପରେ ତାଙ୍କ ପତ୍ନୀ ପଲ୍ଲବୀ ପୋଲିସ କଣ୍ଟ୍ରୋଲ ରୁମ ୧୧୨କୁ ଫୋନ୍ କରି ହତ୍ୟା କରିଥିବା ସ୍ୱୀକାର କରିଥିବା ଜଣାପଡ଼ିଛି। ପୋଲିସ ସୂଚନା ଅନୁଯାୟୀ ପଲ୍ଲବୀ ଫୋନରେ ସ୍ୱୀକାର କରିଥିଲେ ଯେ, ମୁଁ ହିଁ ମାରିଛି ମୋ ସ୍ୱାମୀଙ୍କୁ । ଆତ୍ମରକ୍ଷା କରିବାକୁ ଯାଇ ମୁଁ ମୋ ସ୍ୱାମୀଙ୍କ ହତ୍ୟା କରିଛି । ପୂର୍ବରୁ ସନ୍ଦେହ କରାଯାଇ ପତ୍ନୀ ଓ ଝିଅ କୃତିଙ୍କୁ ପୋଲିସ ହେପାଜତକୁ ନେଇଥିଲା । କିନ୍ତୁ ଘଟଣା ସମୟରେ ପୁଅ କାର୍ତ୍ତିକେଶ ଘରେ ନଥିଲେ । 

FIR ଅନୁଯାୟୀ, କାର୍ତ୍ତିକେଶ ଘରକୁ ଫେରି ଘରର ତଳ ମହଲାରେ ରକ୍ତ ଜୁଡୁବୁଡୁ ଅବସ୍ଥାରେ ବାପାଙ୍କ ମୃତଦେହ ପଡିଥିବା ଦେଖିବାକୁ ପାଇଥିଲେ । HSR ଲେଆଉଟ୍ ପୋଲିସ ଷ୍ଟେସନରେ ଦାୟର ମାମଲା ଅନୁଯାୟୀ, କାର୍ତ୍ତିକେଶ ଅଭିଯୋଗ କରିଥିଲେ ଯେ ତାଙ୍କ ମାଆ ଗତ ସପ୍ତାହ ଧରି ତାଙ୍କ ବାପାଙ୍କୁ ହତ୍ୟା କରିବାକୁ ଧମକ ଦେଉଥିଲେ। ଏହି ଧମକ ଯୋଗୁଁ, ଓମ ପ୍ରକାଶ ତାଙ୍କ ଆଉ ଗୋଟିଏ ଭଉଣୀ ସରିତା କୁମାରୀଙ୍କ ଘରକୁ ଚାଲି ଆସିଥିଲେ । ଘଟଣାର ଦୁଇ ଦିନ ପୂର୍ବରୁ, କୃତି ସରିତାଙ୍କ ବାସଭବନକୁ ଯାଇଥିଲେ । 

ଓମ ପ୍ରକାଶଙ୍କୁ ଘରକୁ ଫେରିବାକୁ ଚାପ ପକାଇଥିଲେ । ଏମିତିକି ତାଙ୍କ ଇଚ୍ଛା ବିରୋଧରେ ତାଙ୍କୁ ଘରକୁ ଡାକି ଆଣିଥିଲେ । ରବିବାର ସନ୍ଧ୍ୟାରେ ବେଙ୍ଗାଲୁରୁର ଏଚ୍ଏସ୍ଆର ଲେଆଉଟରେ ଥିବା ତାଙ୍କ ବାସଭବନରେ ଓମ ପ୍ରକାଶଙ୍କ ମୃତଦେହ ସହ ଧାରୁଆ ଅସ୍ତ୍ର ମିଳିଥିଲା । ଘଟଣା ଦିନ କାର୍ତ୍ତିକେଶ କହିଥିଲେ ଯେ ସେ ଡୋମଲୁରର କର୍ଣ୍ଣାଟକ ଗଲ୍ଫ ଆସୋସିଏସନରେ ଥିଲେ । ତାଙ୍କ ପଡୋଶୀ ଜୟଶ୍ରୀ ଶ୍ରୀଧରନ ସନ୍ଧ୍ୟା ପ୍ରାୟ ୫ଟାରେ ତାଙ୍କୁ ଫୋନ୍ କରି ଜଣାଇଥିଲେ ଯେ ତାଙ୍କ ବାପାଙ୍କ ମୃତଦେହ ଉଦ୍ଧାର ହୋଇଛି । ସନ୍ଧ୍ୟା ୫.୪୫ରେ ସେ ଘରେ ପହଞ୍ଚିବା ବେଳକୁ ପୋଲିସ ଓ ସାଧାରଣ ଲୋକେ ସେଠାରେ ରୁଣ୍ଡ ହୋଇସାରିଥିଲେ।

ଏଫଆଇଆରରେ ଆହୁରି ବି କୁହାଯାଇଛି ଯେ, କାର୍ତ୍ତିକେଶ ତାଙ୍କ ମାଆ ଓ ଭଉଣୀ ଉଭୟ ଡିପ୍ରେସନରେ ପୀଡିତ ଥିଲେ । ପ୍ରାୟତଃ ତାଙ୍କ ବାପାଙ୍କ ସହିତ ଝଗଡ଼ା କରୁଥିଲେ। ମୁଁ ଦୃଢ଼ ସନ୍ଦେହ କରୁଛି ଯେ ସେମାନେ ମୋ ବାପାଙ୍କ ହତ୍ୟାରେ ସମ୍ପୃକ୍ତି ରହିଛି । କାର୍ତ୍ତିକେଶ ଏଫଆଇଆରରେ କହିଛନ୍ତି ଯଦି ସେମାନେ ଦୋଷୀ ସେମାନଙ୍କ ବିରୋଧରେ୍ ଦୃଢ ଆଇନଗତ କାର୍ଯ୍ୟାନୁଷ୍ଠାନ ନିଆଯାଉ । 

ମାମଲାର ତଦନ୍ତ କରୁଥିବା ପୋଲିସ କହିଛି ଯେ ପଲ୍ଲବୀ ତାଙ୍କୁ ଛୁରି ଭୁସି ହତ୍ୟା କରିବା ପୂର୍ବରୁ ତାଙ୍କ ମୁହଁରେ ଲଙ୍କା ପାଉଡର ଫିଙ୍ଗି ଦେଇଥିଲେ । ପୂର୍ବତନ ପୋଲିସ ଅଧିକାରୀ ଜଣଙ୍କ ଆଖିରେ ଜଳାପୋଡା ହୋଇଥିଲା । ସେ ନିଜକୁ ରକ୍ଷା କରିବାକୁ ଚେଷ୍ଟା କରୁଥିବାବେଳେ ପଲ୍ଲବୀ ତାଙ୍କୁ ଛୁରିରେ ଅନେକ ଥର ଆକ୍ରମଣ କରିଥିଲେ । ପରେ ସେ ତାଙ୍କ ବନ୍ଧୁଙ୍କୁ ଏକ ଭିଡିଓ କଲ୍ କରି କହିଥିଲେ ଯେ, ମୁଁ ସେହି ରାକ୍ଷସକୁ ମାରିଦେଇଛି । 

ପିଟିଆଇ ରିପୋର୍ଟରେ କୁହାଯାଇଛି ଯେ, କର୍ଣ୍ଣାଟକର ଦାଣ୍ଡେଲିରେ ସମ୍ପତ୍ତିକୁ ନେଇ ଉଭୟଙ୍କ ମଧ୍ୟରେ ବିବାଦ ଲାଗି ରହିଥିଲା । ଆଉ ସେହି ବିବାଦରୁ ହିଁ ହତ୍ୟାକାଣ୍ଡ ଘଟିଥିଲା। କିଛି ମାସ ପୂର୍ବରୁ, ପଲ୍ଲବୀ ଜମି ଜମା କେସ୍ ନେଇ ଅଭିଯୋଗ ଦାୟର କରିବା ପାଇଁ HSR ଲେଆଉଟ୍ ପୋଲିସକୁ ଯୋଗାଯୋଗ କରିଥିବା ଖବର ମିଳିଛି । 

ଜଣେ VIP ସୁରକ୍ଷା ନିରୀକ୍ଷକ ଶ୍ରୀନିବାସ ଏହା ଏକ ନିର୍ମମ ହତ୍ୟାକାଣ୍ଡ ବୋଲି ବର୍ଣ୍ଣନା କରିଛନ୍ତି । ଶ୍ରୀନିବାସ କହିଛନ୍ତି ଯେ ହତ୍ୟା ଦିନ ତାଙ୍କର ଓମ ପ୍ରକାଶଙ୍କ ସହିତ କଥାବାର୍ତ୍ତା ହୋଇଥିଲା । ଯେତେବେଳେ ମୃତକ ତାଙ୍କୁ ଅପରାହ୍ନ ୩.୦୫ ରେ ଫୋନ୍ କରିଥିଲେ । ସେ ବହୁତ ଶାନ୍ତ ଏବଂ ସ୍ପଷ୍ଟ ଭାବରେ କଥା ହୋଇଥିଲେ । ଶ୍ରୀନିବାସ କହିଛନ୍ତି, ଏବଂ ଯେତେବେଳେ ସେ ସେମାନଙ୍କ ଘରକୁ ଯିବାକୁ ପ୍ରସ୍ତାବ ଦେଇଥିଲେ । ଓମ ପ୍ରକାଶ କହିଥିଲେ, "ନା, ଆସନ୍ତୁ ନାହିଁ....ମାଡାମ ଘରେ ଅଛନ୍ତି। 

ଏଯାଏଁ ଆମେ ଜାଣିପାରୁନୁ ହତ୍ୟାକାଣ୍ଡର କାରଣ କଣ । ଏହା ଏକ ଯୋଜନାବଦ୍ଧ କାର୍ଯ୍ୟ ବୋଲି ମନେ ହେଉଛି । ତାଙ୍କ ବେକରେ ଦୁଇଥର ଛୁରିରେ ଭୁସିବାର ଆଘାତର ରହିଛି । ତାଙ୍କ ମୁଣ୍ଡରେ ମଧ୍ୟ ଛୁରିରେ ଆଘାତ ଦେବାର ଚିହ୍ନ ରହିଛି ।