ନୂଆଦିଲ୍ଲୀ: ଭାରତର ବୁଲେଟ ଟ୍ରେନ୍ ପ୍ରକଳ୍ପକୁ ନେଇ ଏକ ବଡ଼ ଅପଡେଟ୍ ସାମ୍ନାକୁ ଆସିଛି। ଭାରତ ଆଉ ଜାପାନ ଠାରୁ ବୁଲେଟନ ଟ୍ରେନ କିଣିବ ନାହିଁ ବରଂ ନିଜେ ନିର୍ମାଣ କରିବ। ଜାପାନର ଶିଙ୍କାସେନ ଠାରୁ ବୁଲେଟ ଟ୍ରେନ କିଣିବା ନେଇ ଭାରତ ସରକାର ଯୋଜନା କରିଥିଲେ। ହେଲେ ଏବେ ଆମ ଦେଶର ବୁଲେଟନ୍ ଟ୍ରେନ୍ ଉତ୍ପାଦନ ହେବ। ଯାହାର ଘଣ୍ଟା ପ୍ରତି ବେଗ ୨୮୦ କିମି ରହିବ।
ବୁଧବାର ସଂସଦରେ ଏହି ସୂଚନା ଦେଇଛନ୍ତି କେନ୍ଦ୍ର ରେଳମନ୍ତ୍ରୀ ଆଶ୍ୱିନୀ ବୈଷ୍ଣବ। ବିଜେପି ସାଂସଦ ସୁଧୀର ଗୁପ୍ତା ଓ ଅନନ୍ତ ନାୟକଙ୍କ ପ୍ରଶ୍ନରେ ଉତ୍ତର ଦେଇ ରେଳମନ୍ତ୍ରୀ ମେଡ୍ ଇନ୍ ଇଣ୍ଡିଆ ବୁଲେଟ୍ ଟ୍ରେନ୍ ସମ୍ପର୍କରେ ଲିଖିତ ସୂଚନା ଦେଇଥିଲେ।
ଏନେଇ ଚେନ୍ନାଇର ଭାରତୀୟ ରେଳବାଇ ଇଣ୍ଟିଗ୍ରାଲ୍ କୋଚ୍ କାରଖାନା (ଆଇସିଏଫ୍) ଦୁଇଟି ଟ୍ରେନ୍ ସେଟ୍ ତିଆରି କରିବା ପାଇଁ ସରକାରୀ କମ୍ପାନୀ ବିଏମ୍ଏଲ୍କୁ ୮୬୭ କୋଟି ଟଙ୍କାର କଣ୍ଟ୍ରାକ୍ଟ ଦେଇଛି। ପ୍ରତ୍ୟେକ ଟ୍ରେନ ସେଟ୍ରେ ୮ଟି କୋଚ୍ ରହିବ ଏବଂ ଘଣ୍ଟା ପ୍ରତି ବେଗ ୨୮୦ କିମି ରହିବ ବୋଲି ଅର୍ଡର ହୋଇଛି। ଏହି ଟ୍ରେନଗୁଡିକ ବେଙ୍ଗାଲୁରୁରେ ଥିବା BEML ଫ୍ୟାକ୍ଟ୍ରିରେ ତିଆରି ହେବ। ୨୦୨୬ ଶେଷ ସୁଦ୍ଧା ଇଣ୍ଡିଆ ମେଡ୍ ବୁଲେଟ୍ ଟ୍ରେନ୍ ରେଳବାଇକୁ ହସ୍ତାନ୍ତର ହେବ।
ଜାପାନାରୁ ବୁଲେଟ ଟ୍ରେନ୍ ଆଣିବା ଭାରତକୁ ମହଙ୍ଗା ପଡ଼ିବା ସହିତ ଉଚିତ ସମୟରେ ଡେଲିଭରି ଦେବାରେ ସମସ୍ୟା ଉପୁଜିଛି। ଏଥିପାଇଁ ଭାରତ ହିଁ ବୁଲେଟ୍ ଟ୍ରେନ୍କୁ ଡିଜାଇନ୍ କରିବା ସମ୍ପୂର୍ଣ୍ଣ ନିର୍ମାଣ କରିବାକୁ ନିଷ୍ପତ୍ତି ନେଇଛି ବୋଲି ରେଳମନ୍ତ୍ରୀ କହିଛନ୍ତି।
ଖାସ୍ ଫିଚର୍ସ
ମେଡ୍ ଇନ୍ ଇଣ୍ଡିଆ ବୁଲେଟ ଟ୍ରେନ୍ ୨୦୨୬ ସୁଦ୍ଧା ପ୍ରଥମେ ଗୁଜରାଟର ସୁରତରୁ ବିଲିମୋରା ପର୍ଯ୍ୟନ୍ତ ଚାଲିବ। ଟ୍ରେନ୍ ନିର୍ମାଣ ପାଇଁ ମୋଟ ୮୬୬.୮୭ କୋଟି ଟଙ୍କା କଣ୍ଟ୍ରାକ୍ଟ ଦିଆଯାଇଥିବା ବେଳେ ଏଥିରେ ଡିଜାଇନ, ଗୋଟିଏ ଥର ବିକାଶ ଖର୍ଚ୍ଚ (ୱାନ ଟାଇମ ଡେଭଲପମେଣ୍ଟ କଷ୍ଟ), ପୁନରାବୃତ୍ତି ନଥିବା ଦେୟ(ନନ ରିକ୍ୟୁରିଂ ଚାର୍ଜେସ୍),ପାର୍ଟ ଗୁଡ଼ିକରେ ନିବେଶ ଆଦିରେ ଖର୍ଚ୍ଚ କରାଯିବ। ପ୍ରତ୍ୟେକ କୋଚର ମୂଲ୍ୟ ୨୭.୮୬ କୋଟି ଟଙ୍କା ରହିଥିବା ବେଳେ ସମ୍ପୂର୍ଣ୍ଣ ଟ୍ରେନ୍ ଏୟାରକଣ୍ଡିସନ ବ୍ୟବସ୍ଥା ରହିବ। ସିଟ୍ଗୁଡ଼ିକ ବୁଲିବ ଓ ଅପ୍ ଡାଉନ କରିହେବ, ଓ ଅନ୍ୟାନ୍ୟ ସମସ୍ତ ସୁବିଧା ରହିବ ବୋଲି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି।
