ଦଶମ ପାସ୍‌ ଅଫିସ ବୟ, କେମିତି ହେଲେ କମ୍ପାନୀର CEO ? ଜାଣନ୍ତୁ...

ନୂଆଦିଲ୍ଲୀ ୨୨।୧୦: ଇନ୍ଫୋସିସ୍‌ରୁ ଅଫିସ୍ ବୟ । ନିଜ ସ୍ୱପ୍ନର ହୋଇଛନ୍ତି ମାଲିକ । କିନ୍ତୁ ଏ ଯାତ୍ରା ଏତେ ସହଜ ନଥିଲା । ତଥାପି ସେ ସଫଳ ହୋଇଛନ୍ତି । ଆଉ ପ୍ରମାଣ କରିଛନ୍ତି କି ଦୃଢ଼ ନିଷ୍ପତ୍ତି ଯେକୌଣସି ବ୍ୟକ୍ତିଙ୍କ ଜୀବନର ଗତିପଥ ବଦଳାଇପାରେ । ଦାଦାସାହେବ ଭଗତ । ଦିନେ ସେ ଅଫିସ୍‌ ସଫା କରି ପାଉଥିଲେ ମାତ୍ର ୯ହଜାର ଟଙ୍କା । 

ବର୍ତ୍ତମାନ ସେ ଦାଦାସାହେବ ଭଗତ କମ୍ପାନୀର ପ୍ରତିଷ୍ଠାତା । ତାଙ୍କ କମ୍ପାନୀ ଡିଜାଇନ୍ ଟେମ୍ପଲେଟ୍ସ କରିଥାଏ । ଏହି କମ୍ପାନୀକୁ ପ୍ରାୟତଃ ବିଶ୍ୱ ଡିଜାଇନ୍ ଜାଏଣ୍ଟ କାନଭା ସହିତ ତୁଳନା କରାଯାଏ। ତେବେ କିଏ ଏହି ଦାଦାସାହେବ ଭଗତ ? କେମିତି ସେ ମରୁଡ଼ି ପ୍ରଭାବିତ ଗାଁରୁ ଜାତୀୟ ସ୍ତରରେ ପ୍ରସିଦ୍ଧି ଲାଭ କରିଥିଲେ ?  ସେ କିପରି ପିଅନରୁ ହୋଇଥିଲେ ସିଇଓ ? ଆସନ୍ତୁ ଜାଣିବା...

ଦାଦାସାହେବ ଭଗତଙ୍କ ପିଲାଦିନ ମହାରାଷ୍ଟ୍ରର ବୀଡ ଜିଲ୍ଲାରେ କଟିଥିଲା । ଯେଉଁଠାରେ ମରୁଡ଼ି ଭଳି ପରିସ୍ଥିତି ଯୋଗୁଁ ଚାଷ କରିବା ଥିଲା କଷ୍ଟକର । ତାଙ୍କ ପରିବାରରେ ଶିକ୍ଷାକୁ ଦିଆଯାଉନଥିଲା ପ୍ରାଥମିକତା । ସେ ଦଶମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିଥିଲେ । ଆଉ ପରେ ITI କୋର୍ସ ଶେଷ କରିଥିଲେ ।  ଯାହା ସାଧାରଣତଃ କାରଖାନାରେ ବ୍ଲୁ କଲର ଚାକିରି ପାଇଁ ତାଲିମ ଦିଏ। ଏକ ଭଲ ଭବିଷ୍ୟତ ଖୋଜିବା ଲକ୍ଷ୍ୟ ନେଇ ଦାଦାସାହେବ ପୁଣେ ଚାଲିଗଲେ । ଆଉ ସେଠାରେ ମାସିକ ୪ ହଜାର ଟଙ୍କା ଦରମାରେ କାମ କରିବା ଆରମ୍ଭ କଲେ ।

ଏହାର କିଛି ସମୟ ପରେ ସେ ଇନଫୋସିସରେ ଜଣେ ଅଫିସ ବୟ ଚାକିରି କରିଥିଲେ । ଆଉ ଏଥିପାଇଁ ତାଙ୍କୁ ମିଳିଥିଲା ୯  ହଜାର ଟଙ୍କା । ଯାହା ତାଙ୍କ ପୂର୍ବ ଦରମାଠୁ ୨ଗୁଣା ଥିଲା । ସେ ଏଥିରେ ଖୁସି ହୋଇ ଚାକିରିକୁ ଆପଣାଇଥିଲେ ।  ଇନ୍ଫୋସିସରେ ତାଙ୍କର ଦୈନନ୍ଦିନ କାମ ସଫା କରିବା, ଜିନିଷ ନେବା ଆଣିବା ଏବଂ କମ୍ପାନୀର ଗେଷ୍ଟହାଉସରେ କାମ କରିବା ଥିଲା।

କିନ୍ତୁ ତାଙ୍କର ନଜର ଅଫିସରେ କମ୍ପୁଟରରେ କାମ କରୁଥିବା କର୍ମଚାରୀଙ୍କ ଉପରେ ରହୁଥିଲା । ଦାଦାସାହେବ ଭଗତ ଅଫିସର କିଛି କର୍ମଚାରୀଙ୍କ ସହିତ ପରାମର୍ଶ ନେଇ ଗ୍ରାଫିକ୍‌ ଡିଜାଇନର କାମ ଶିଖିଥିଲେ । ଦାଦାସାହେବ ଭଗତ ଦିନରେ ଗ୍ରାଫିକ୍ ଡିଜାଇନ୍ ଶିଖୁଥିଲେ ଏବଂ ରାତିରେ ଜଣେ ଅଫିସ୍ ବୟ ଭାବରେ ନାଇଟ୍‌ ଡିଟ୍ୟୁ କରୁଥିଲେ । ମାତ୍ର ବର୍ଷକ ମଧ୍ୟରେ ସେ ବୃତ୍ତିଗତ ଡିଜାଇନର ହୋଇଥିଲେ ।

ଭଗତ ଚାକିରୀ କରିବା ପରିବର୍ତ୍ତେ ନିଜର ଏକ ଭିନ୍ନ ରାସ୍ତା ତିଆରି କରିଥିଲେ । ସେ ଜଣେ ଡିଜାଇନର୍ ଭାବରେ ଫ୍ରିଲାନ୍ସିଂ ଆରମ୍ଭ କରିଥିଲେ ଏବଂ ପରେ ନିଜର ଡିଜାଇନ୍ କମ୍ପାନୀ ଆରମ୍ଭ କରିଥିଲେ। କିନ୍ତୁ ଏହି ସଫଳତା ରାତାରାତି ଆସି ନଥିଲା। ଆର୍ଥିକ ଚ୍ୟାଲେଞ୍ଜ, ସୀମିତ ସମ୍ବଳ ଏବଂ ଅନ୍ୟମାନଙ୍କ ସନ୍ଦେହ ପ୍ରାରମ୍ଭିକ ବର୍ଷଗୁଡ଼ିକୁ କଷ୍ଟକର କରିଦେଇଥିଲା। ତା’ପରେ କୋଭିଡ୍-୧୯ ମହାମାରୀ ଆସିଲା ।  ତାଙ୍କୁ ତାଙ୍କର ପୁଣେ ଅଫିସ୍ ବନ୍ଦ କରି ଗାଁକୁ ଫେରିବାକୁ ପଡିଥିଲା ।

କିନ୍ତୁ ସେ ହାର ମାନିବା ପରିବର୍ତ୍ତେ ସୁଯୋଗ ଦେଖିଥିଲେ । ଗାଁରେ ଜୀବନ ସରଳ ଏବଂ ଶସ୍ତା ଥିଲା ।  ଯାହା ତାଙ୍କୁ ତାଙ୍କର ଉତ୍ପାଦ ଧାରଣା ବିକାଶ କରିବା ଉପରେ ସମ୍ପୂର୍ଣ୍ଣ ଧ୍ୟାନ ଦେବାକୁ ସୁଯୋଗ ଦେଇଥିଲା। ଗାଁ ବାରମ୍ବାର ବିଦ୍ୟୁତ୍ କାଟ ଏବଂ ଇଣ୍ଟରନେଟ୍ ସମସ୍ୟା ହୋଇଥିଲା । ଏଥିପାଇଁ ସେ ନିକଟସ୍ଥ ପାହାଡ ଉପରେ ଏକ ଅଫିସ୍‌ ଖୋଲିଥିଲେ । ଯେଉଁଠାରେ ମୋବାଇଲ୍ ସିଗନାଲ ଅଧିକ ଶକ୍ତିଶାଳୀ ଥିଲା। ଏହି ସରଳ ବ୍ୟବସ୍ଥାରୁ ଡିଜାଇନ୍ ଟେମ୍ପଲେଟ୍ସ ଜନ୍ମ ହୋଇଥିଲା।  ଏହି ଗ୍ରାମୀଣ ପରିବେଶରୁ କାମ କରି ଭଗତ ସ୍ଥାନୀୟ ଯୁବକମାନଙ୍କୁ ଗ୍ରାଫିକ୍ ଡିଜାଇନରେ ତାଲିମ ଦେବା ଆରମ୍ଭ କଲେ । ତାଙ୍କର ଅଭିନବ ମନୋଭାବ ଖୁବଶୀଘ୍ର ଗଣମାଧ୍ୟମର ଧ୍ୟାନ ଆକର୍ଷଣ କରିଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ କାର୍ଯ୍ୟକୁ ପ୍ରଶଂସା କରିଥିଲେ।