ନୂଆଦିଲ୍ଲୀ ୧୭।୦୩: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ନିକଟରେ ମୋଦୀଙ୍କ ସାକ୍ଷାତକାର ନେଇଥିଲେ ୪୧ ବର୍ଷୀୟ ଲେକ୍ସ ଫ୍ରିଡ୍ମ୍ୟାନ୍ । କିନ୍ତୁ ସେ ଏଥିପାଇଁ କରିଥିଲେ ୪୫ ଘଣ୍ଟା ଉପବାସ । ଏହା ଶୁଣି ଚକିତ ହୋଇଯାଇଥିଲେ ମୋଦି । ସମ୍ମାନ ସ୍ୱରୂପ ଉପବାସ କରିଥିବା ଜାଣି ମୋଦି ତାଙ୍କୁ ଧନ୍ୟବାଦ ଜଣାଇଥିଲେ । ତେବେ ସାକ୍ଷାତକାରକୁ ସମ୍ମାନ ଦେବା ଏବଂ ଆଧ୍ୟାତ୍ମିକ ସ୍ତରକୁ ଯାଇ ଠିକ୍ ଢଙ୍ଗରେ ପୋଡକାଷ୍ଟ ପରିଚାଳନା ପାଇଁ ସେ ଏପରି କରିଥିଲେ ବୋଲି ସେ କହିଥିଲେ ।
ସୋସିଆଲ ମିଡିଆ ଇନ୍ଫ୍ଲୁଏନ୍ସର ଫ୍ରିଡ୍ମ୍ୟାନ୍ଙ୍କ ଜନ୍ମ ସୋଭିଏତ୍ ରୁଷ୍ର ଚକାଲୋଭ୍ସ୍କ ବା ବର୍ତ୍ତମାନର ତାଜିକିସ୍ତାନରେ । ସୋଭିଏତ ସଂଘ ବିଭାଜନ ପରେ ତାଙ୍କ ପରିବାର ଆମେରିକାର ଶିକାଗୋ ଚାଲି ଆସିଥିଲେ । ସେଠାରେ ହିଁ ଫ୍ରିଡ୍ମ୍ୟାନ୍ ଇଲେକ୍ଟ୍ରିକାଲ ଏବଂ କମ୍ପ୍ୟୁଟର ଇଞ୍ଜିନିୟରିଂରେ ପିଏଚ୍ଡି କରିଥିଲେ । ସେ ଜଣେ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ରିସର୍ଚ୍ଚର ମଧ୍ୟ । ଡିଜିଟାଲ ଦୁନିଆରେ ତାଙ୍କ ଦୃଢ଼ ଉପସ୍ଥିତି ରହିଛି । ଜଣେ ପ୍ରଭାବଶାଳୀ ପୋଡକାଷ୍ଟର ଭାବେ ସେ ଜଣା । ଏକ୍ସରେ ତାଙ୍କର ୪୨ ଲକ୍ଷ ଏବଂ ଇନ୍ଷ୍ଟାଗ୍ରାମରେ ୧୪ ଲକ୍ଷ ଫଲୋଅର୍ସ ରହିଛନ୍ତି ।
ପୂର୍ବରୁ ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍, ଟେସ୍ଲା ସିଇଓ ଏଲନ୍ ମସ୍କ, ମେଟା ସିଇଓ ମାର୍କ ଜୁକରବର୍ଗ, ଆମାଜନ୍ ସିଇଓ ଜେଫ୍ ବେଜୋସ୍, ଓପନ ଏଆଇ ସିଇଓ ସାମ୍ ଅଲ୍ଟମ୍ୟାନ, ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି, ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁଙ୍କ ସମେତ ବହୁ ପ୍ରମୁଖ ବ୍ୟକ୍ତିଙ୍କ ସାକ୍ଷାତକାର ନେଇଛନ୍ତି ।
