ନୂଆଦିଲ୍ଲୀ: ପ୍ରଥମେ ପ୍ରେମ ପରେ ପ୍ରତାରଣା ପୁଣି ହତ୍ୟା । ସାମ୍ନାକୁ ଆସିଲା ଲିଭ୍-ଇନ୍ ରିଲେସନସିପ୍ର ଭୟଙ୍କର ଚିତ୍ର । ଫ୍ରିଜ୍ ଭିତରେ ଅନ୍ତ ହୋଇଗଲା ସମ୍ପର୍କ । ପ୍ରତିଶ୍ରୁତି ପାଣି ଫଟକା ପରି ମିଳେଇ ଗଲା । ଯାହାକୁ ସାଥି କରିବାକୁ କଥା ଦେଇଥିଲା, ତା’କୁ ସବୁ ଦିନ ପାଇଁ ରାସ୍ତାରୁ ହଟାଇ ଦେଲା । ଜହ୍ଲାଦ ପ୍ରେମିକର ନୃଶଂସ କାଣ୍ଡରେ ସମସ୍ତ ସ୍ତବ୍ଧ । ପ୍ରେମିକାକୁ ମାରିବା ପରେ ଖଣ୍ଡ ଖଣ୍ଡ କରି ଫ୍ରିଜ୍ ରଖିଥିଲା । ଗଳିତ ଶବରୁ ଦୁର୍ଗନ୍ଧ ବାହାରିବା ପରେ ସାମ୍ନାକୁ ଆସିଲା ଲିଭ୍-ଇନ୍ ସମ୍ପର୍କର ଲୋମଟାଙ୍କୁରା ମର୍ଡର କାହାଣୀ । ଏଭଳି ଘଟଣା ଘଟିଛି ମଧ୍ୟପ୍ରଦେଶର ଦେବାସ ଅଞ୍ଚଳରେ । ଛ’ ମାସ ପରେ ଫ୍ରିଜ୍ ଭିତରରୁ ପ୍ରେମିକାର ଖଣ୍ଡ ବିଖଣ୍ଡିତ ଗଳିତ ଅଂଶକୁ ବାହାର କରାଯାଇଛି । ଏହି ଘଟଣାରେ ପୋଲିସ ଅଭିଯୁକ୍ତ ନୃଶଂସ ପ୍ରେମିକକୁ ଗିରଫ କରିଛି । ଜହ୍ଲାଦ ପ୍ରେମିକ ସଞ୍ଜୟ ପାଟିଦାର ପ୍ରେମିକାର ହତ୍ୟାକୁ ମଧ୍ୟ ସ୍ବୀକାର କରିଛି ।
ପୀଡିତା ପ୍ରେମିକା ହେଲେ ପିଙ୍କି ଓର୍ଫ ପ୍ରତିଭା ପ୍ରଜାପତି । ପ୍ରେମିକ ସଞ୍ଜୟ ପାଟିଦାରଙ୍କ ସହିତ ସେ ପାଞ୍ଚ ବର୍ଷ ହେଲା ଲିଭ୍-ଇନ ସମ୍ପର୍କରେ ଥିଲେ । ଏହା ପୂର୍ବରୁ ଦୁଇ ପ୍ରେମୀ ଯୁଗଳ ତିନି ବର୍ଷ ଉଜ୍ଜୈନ ରହିଥିଲେ । ଏବେ ଦୁଇ ବର୍ଷ ହେଲା ଦୁହେଁ ଦେବାସରେ ଏକ ଫ୍ଲାଟ୍ ରହୁଥିଲେ । ଅନ୍ୟପଟେ ଅଭିଯୁକ୍ତ ସଞ୍ଜୟ ପାଟିଦାର ପୂର୍ବରୁ ଅନ୍ୟ ଜଣଙ୍କ ସହିତ ବିବାହ କରିଥିବା କହିଛି । ତା’ର ଦୁଇଟି ଛୋଟ ପିଲା ମଧ୍ୟ ଅଛନ୍ତି । ପୀଡ଼ିତା ପ୍ରେମିକା ପିଙ୍କି ବିବାହ ପାଇଁ ବାରମ୍ବାର ସଞ୍ଜୟଙ୍କୁ ଚାପ ପକାଉଥିଲେ । ଘଟଣା ଦିନ ପ୍ରେମିକା ବିବାହ ଜିଦରେ ଅଟଳ ରହିଥିଲେ । ବହୁ ବୁଝାଇବା ପରେ ନମାନିବାକୁ ଅଭିଯୁକ୍ତ ପ୍ରେମିକ ପିଙ୍କିର ତଣ୍ଟି ଚିପି ନୃଶଂସ ଭାବେ ହତ୍ୟା କରିଥିଲା । ଅନ୍ୟ ଏକ ସାଥି ବିନୋଦ ଦେବଙ୍କ ସହିତ ମିଶି ମୃତଦେହକୁ ଫ୍ରିଜରେ ବନ୍ଦ କରିଦେଇଥିଲେ । ବିନୋଦ ଏବେ ରାଜସ୍ଥାନର ଏକ ଜେଲରେ ବନ୍ଦ ଅଛି । ମଧ୍ୟ ପ୍ରଦେଶ ପୋଲିସ ତାକୁ ପଚରା ଉଚରା କରୁଛି ।
ଗତ ବର୍ଷ ଜୁଲାଇ ମାସରେ ବଲବୀର ରାଜପୁତ୍ ନାମକ ଜଣେ ବ୍ୟକ୍ତି ଫ୍ଲାଟର ଗ୍ରାଉଣ୍ଡ ଫ୍ଲୋରକୁ ଭଡ଼ାରେ ନେଇଥିଲା । ଯେଉଁଥିରେ ପୂର୍ବରୁ ଅଭିଯୁକ୍ତ ସଞ୍ଜୟ ରହୁଥିଲା । ଅଭିଯୁକ୍ତ ଦୁଇଟି ରୁମ୍ ବନ୍ଦ କରି ରଖିଥିବାରୁ ନୂଆ ଭଡ଼ାଦାର ଏହାକୁ ବ୍ୟବହାର କରିପାରୁନଥିଲେ । ଏନେଇ ସେ ଘର ମାଲିକଙ୍କୁ ଜଣାଇଥିଲେ । ତାଲା ଭାଙ୍ଗି ଘର ବ୍ୟବହାର କରିବାକୁ ଘର ମାଲିକ କହିଥିଲେ । ଭଡ଼ାଦାର ବଲବୀର ଘର ଖାଲି କରିବା ବେଳେ ଛ’ ମାସ ହେଲା ମୃତଦେହ ଭର୍ତ୍ତି ଫ୍ରିଜରୁ ଦୁର୍ଗନ୍ଧ ଆସିଥିଲା । ଏନେଇ ସେ ସ୍ଥାନୀୟ ପୋଲିସକୁ ଜଣାଇବା ପରେ ଛାନଭିନ୍ ଆରମ୍ଭ କରି ଅଭିଯୁକ୍ତ ଜହ୍ଲାଦ ପ୍ରେମିକ ସଞ୍ଜୟ ପାଟିଦାରକୁ ଗିରଫ କରିଛି ।...
