ନୂଆଦିଲ୍ଲୀ ୨୪।୭: ସଂସଦ ମୌସୁମୀ ଅଧିବେଶନର ବୁଧବାର ଥିଲା ତୃତୀୟ ଦିନ। ଗତକାଲି ଅର୍ଥମନ୍ତ୍ରୀ ଉପସ୍ଥାପନ କରିଥିବା ବଜେଟ୍ କୁ ନେଇ ସଂସଦର ଉଭୟ ସଦନ ସରଗରମ ଥିବା ବେଳେ ଲୋକସଭାରେ ତୃଣମୂଳ କଂଗ୍ରେସ (ଟିଏମସି) ସାଂସଦ କଲ୍ୟାଣ ବାନାର୍ଜୀ ଓ ବାଚସ୍ପତି ଓମ ବିରଳାଙ୍କ ମଧ୍ୟରେ ତୁତୁ ମେଁ ମେଁ ଦେଖିବାକୁ ମିଳିଛି। ଟିଏମସି ସାଂସଦ ଅଭିଷେକ ବାନାର୍ଜୀ ସଂସଦରେ କହୁଥିବା ବେଳେ ବିଜେପି ସାଂସଦମାନେ ହଟ୍ଟଗୋଳ କରିଥିଲେ। ଏଥିରେ ଟିଏମସି ସାଂସଦ କଲ୍ୟାଣ ବାନାର୍ଜୀ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ।
କଲ୍ୟାଣ ବାନାର୍ଜୀ ସିଧାଶଳଖ ହାଚସ୍ପତିଙ୍କୁ ଟ୍ରେଜରି ବେଞ୍ଚକୁ କିଛି କହୁନଥିବାର ଅଭିଯୋଗ କରିଥିଲେ। ସେ କହିଥିଲେ ଯେ ଯେତେବେଳେ ସଂସଦରେ କ୍ଷମତାସୀନ ଦଳର ସାଂସଦମାନେ ହଟ୍ଟଗୋଳ କରୁଛନ୍ତି ଆପଣ ଚୁପ ବସୁଛନ୍ତି, ଆମେ ଯଦି କିଛି କହୁଛୁ ଆମକୁ କଥା କୁହାଇ ଦେଉ ନାହାନ୍ତି। ଏହାର ଜବାବରେ ବାଚସ୍ପତି ଓମ ବିରଳା ଆପଣ ମୋତେ ନିର୍ଦ୍ଦେଶ ଦେଇ ପାରିବେନି ବୋଲି କହିଥିଲେ। ଅପରପଟେ ମମତା ବାନାର୍ଜୀଙ୍କ ପୁତୁରା ତଥା ଟିଏମସି ସାଂସଦ ଅଭିଷକ ବାନାର୍ଜୀ ବିଜେପି ସରକାରଙ୍କ ଉପରେ ଭଲ କି ବର୍ଷିଛନ୍ତି।
ଅଭିଷେକ ବାନାର୍ଜୀ କହିଛନ୍ତି ଯେ ବିଜେପି ସରକାରକୁ ଆସିବା ପୂର୍ବରୁ ଦେଶବାସୀଙ୍କୁ ଆଛା ଦିନର ପ୍ରତିଶ୍ରୁତିଦେଇଥିଲା, ହେଲେ ଦେଖନ୍ତୁ ଦେଶରେ ମୁଦ୍ରାସ୍ପିତି ଏବେବି ବଢିକି ରହିଛି। ଏହି ସରକାର ଦେଶର ଚାଷୀଙ୍କ ପ୍ରତି ଧୋକା କରିଛନ୍ତି। ଏହା ପରେ ଅଭିଷେକ କହିଥିଲେ ଯେ ବିଜେପି ଧର୍ମର ରାଜନୀତି କରୁଛି। ଲୋକସଭା ଓ ରାଜ୍ୟସଭାରେ ବିଜେପିର ଜଣେ ବି ମୁସ୍ଲିମ କି ଇସାୟୀ ସାଂସଦ ନାହାନ୍ତି। ଏଥିରୁ ସ୍ପଷ୍ଟ ବୁଝା ପଡୁଛି ଏହି ସରକାର ସଂଖ୍ୟାଲଘୁଙ୍କୁ ଉତ୍ପିଡ଼ିତ କରୁଛନ୍ତି। ସେ କହିଛନ୍ତି ଯେ ଧର୍ମ କୌଣସି ବ୍ୟକ୍ତିର ବ୍ୟକ୍ତିଗତ ବ୍ୟାପାର ହୋଇପାରେ। ହେଲେ ମୋଦି ସରକାର ଏହା ଉପରେ ବି ରାଜନୀତି କରୁଛନ୍ତି।
