ମାଲକାନଗିରି ୧୭/୨: ପୁଣି ସୁରକ୍ଷାକର୍ମୀଙ୍କୁ ବଡ ସଫଳତା । ବିଏସ୍ଏଫ୍ ଯବାନଙ୍କ କମ୍ବିଂ ଅପରେସନ ବେଳେ ଜଙ୍ଗଲ ଭିତରେ ମାଓ ଡମ୍ପ ଠାବ । ପଡିଆ ଥାନା ଅନ୍ତର୍ଗତ ସିଲାକୋଟା ଜଙ୍ଗଲ ଭିତରେ ବିଏସ୍ଏଫ୍ ଦ୍ବିତୀୟ ବାଟାଲିଅନ ଯବାନଙ୍କ କମ୍ବିଂ ବେଳେ ହାତରେ ଲାଗିଛି ମାଓ ଡମ୍ପ । ସେଥିରେ ପ୍ରେସର କୁକର ଆଇଇଡି, ଇଲେକ୍ଟ୍ରୋନିକ ଡିଟୋନେଟର,ମୋବାଇଲ ଫୋନ ଓ ୩ଟି SBML ବନ୍ଧୁକ ଜବତ ହୋଇଛି ।
ବନ୍ଧୁକ ସହ ସମସ୍ତ ବିସ୍ଫୋରଣ ସାମଗ୍ରୀ କ୍ୟାମ୍ପକୁ ଅଣାଯାଇଥିବାବେଳେ ଆଇଇଡିକୁ ଜଙ୍ଗଲ ଭିତରେ ନିଷ୍କ୍ରିୟ କରିଦେଇଛନ୍ତି ସୁରକ୍ଷା କର୍ମୀ । ତେବେ ଏହି ବିସ୍ଫୋରଣର ଦୃଶ୍ୟ ବେଶ ଭୟଙ୍କର ଥିଲା । ମାଓବାଦୀ ମାନେ ଯଦି ଯବାନଙ୍କୁ ଟାର୍ଗେଟ କରି ବିସ୍ଫୋରଣ କରିଥାନ୍ତେ ତେବେ ଭୀଷଣ କ୍ଷତି ହୋଇଥାନ୍ତା । ତେବେ ଆଶ୍ବସ୍ତିର କଥା ହେଉଛି ଯବାନମାନେ ସୁରକ୍ଷିତ ଭାବରେ ବୋମା ଠାବ କରି ନିଷ୍କ୍ରିୟ କରିଦେଇଛନ୍ତି । ଏ ଘଟଣା ନୁହେଁ ପୂର୍ବକୁ ମଧ୍ୟ ଅନେକ ଜାଗାରେ ଯବାନ ମାନେ ମାଓବାଦୀଙ୍କ ବିସ୍ଫୋରଣ ପ୍ଲାନକୁ ଭଣ୍ଡୁର କରି ମାଓ ଡମ୍ପ ଠାବ କରିଛନ୍ତି ।
