ନୂଆଦିଲ୍ଲୀ 04/02 : ସବୁଠୁ କଠିନ ପରୀକ୍ଷା ହେଉଛି ୟୁପିଏସସି । ଏହି ପରୀକ୍ଷା ପାସ୍ କରିବା କାଠିକର ପାଠ। ପ୍ରତିବର୍ଷ ଲକ୍ଷ ଲକ୍ଷ ଆସପିରାଣ୍ଟ୍ ଏହି ପରୀକ୍ଷା ଦିଅନ୍ତି। କିନ୍ତୁ ସଫଳତା ଗଣି ଗଣି କିଛିଙ୍କୁ ହିଁ ମିଳିଥାଏ। ତେବେ ଏହି ପରୀକ୍ଷାରେ ପାସ୍ କରିବାକୁ ହେଲେ ସେମିତି କଠିନ ପରିଶ୍ରମ, ନିଷ୍ଠା ଓ ହାର୍ ନ ମାନିବାର ମନୋବଳ ଦରକାର। ତାପରେ ଯାଇ ଜଣେ ସଫଳତା ପାଇ ପାରିବ। ତେବେ ପ୍ରଶାସନିକ ସେବାରେ ଏମିତି କିଛି ଅଛନ୍ତି ଯେଉଁମାନେ ପ୍ରକୃତରେ ସେବା ମନୋବୃତ୍ତି ନେଇ ଏହି କ୍ଷେତ୍ରକୁ ଆସନ୍ତି ତାଙ୍କ ପାଇଁ ପାରିଶ୍ରମିକ ଗୁରୁତ୍ୱପୂର୍ଣ୍ଣ ନଥାଏ। ଆମେ ଏମିତି କାହିଁକି କହୁଛୁ ଏମିତି ଜଣେ ଆଇଏଏସ୍ ଅଫିସର ଅଛନ୍ତି, ଯିଏ ସେବା କରନ୍ତି କିନ୍ତୁ ଲକ୍ଷ ଲକ୍ଷ ଟଙ୍କାର ଦରମାକୁ କରିଛନ୍ତି ତୁଚ୍ଛ। ଅର୍ଥାତ୍ ସେ ଦରମା ନ ନେଇ ଲୋକଙ୍କ ସେବା କରନ୍ତି। ସେ ମାସକୁ ନିଅନ୍ତି ମାତ୍ର 1 ଟଙ୍କା। କଥା ଆଶ୍ଚର୍ଯ୍ୟକର ଯେତିକି ସତ ବି ସେତିକି। କିନ୍ତୁ ବଡ଼ କଥା କଣ ଜାଣନ୍ତି ଭାରତର ଧନୀ ଆଇଏଏସ୍ ଅଧିକାରୀଙ୍କ ମଧ୍ୟରେ ସେ ଜଣେ। ଆସନ୍ତୁ ଜାଣିବା ଜଣେ ପ୍ରେରଣାଦାୟୀ ଆଇଏଏସ୍ ଅଫିସରଙ୍କ କଥା।
ସେମିତି ଚର୍ଚ୍ଚିତ ଆଇଏଏସ୍ ହେଉଛନ୍ତି ଅମିତ କଟାରିଆ। ୨୦୦୩ ୟୁପିଏସ୍ସି ପରୀକ୍ଷାରେ ସର୍ବଭାରତୀୟ ସ୍ତରରେ ଅମିତ ୧୮ ରାଙ୍କ ହାସଲ କରି ହୋଇଥିଲେ ଆଇଏଏସ୍। ବର୍ତ୍ତମାନ ଅମିତ ୭ ବର୍ଷ କେନ୍ଦ୍ରୀୟ ଡେପୁଟେସନରେ ରହିବା ପରେ ଏବେ ଛତିଶଗଡ଼ରେ ପୋଷ୍ଟିଂ ହୋଇଛନ୍ତି। ଲୋକଙ୍କ ସେବା ପାଇଁ ସେ ପ୍ରଥମେ କୌଣସି ଟଙ୍କା ନେବାକୁ ଚାହୁଁ ନଥିଲେ। କିନ୍ତୁ ପରବର୍ତ୍ତୀ ଅବସ୍ଥାରେ ସେ ମାସିକ ୧ ଟଙ୍କା ଦରମା ନେଉଛନ୍ତି। ଆଉ ନିରବଚ୍ଛିନ୍ନ ଭାବରେ ନିଜର ସେବା ଯୋଗାଇ ଦେଉଛନ୍ତି। ଆଇଏଏସ୍ ଭାବେ ସେ ପାଉଥିବା ଦରମାକୁ ଆଦୌ ଗୁରୁତ୍ୱ ଦିଅନ୍ତି ନାହିଁ ଅମିତି । କାରଣ ତାଙ୍କ ପରିବାରର ରହିଛି ରିୟଲଇଷ୍ଟେଟ ବ୍ୟବସାୟ। ଯେଉଁଥିରୁ ସେ କରୁଥିବା ଆୟ ହିଁ ତାଙ୍କ ସମ୍ପତ୍ତିକୁ ବୃଦ୍ଧି କରିଛି। ଦିଲ୍ଲୀ ଏନସିଆରର ତମାମ ସ୍ଥାନରେ ଅମିତଙ୍କ ପରିବାରର ବ୍ୟବସାୟ ରହିଛି। ଏଥିରୁ କୋଟି କୋଟି ଟଙ୍କାର ରାଜସ୍ୱ ମିଳୁଛି। ଅମିତଙ୍କ ମୋଟ ସମ୍ପତ୍ତିର ପରିମାଣ ୮.୯୦ କୋଟି। ଏହା ସହ ସେ ଭାରତର ସବୁଠାରୁ ଧନୀ ଆଇଏଏସ୍ର ମାନ୍ୟତା ପାଇଛନ୍ତି। ଅମିତଙ୍କ ପତ୍ନୀ ଅସ୍ମିତା ହାଣ୍ଡା ବ୍ୟବସାୟିକ ବିମାନର ପାଇଲଟ ଭାବେ କାର୍ଯ୍ୟ କରନ୍ତି। ସେ ବି ଲକ୍ଷ ଲକ୍ଷ ରୋଜଗାର କରନ୍ତି।
ଅମିତଙ୍କ ପ୍ରକୃତ ଘର ହେଉଛି ଦିଲ୍ଲୀ ଏନସିଆରରେ। ସେ ଆରକେ ପୂରମ ଠାରେ ଦିଲ୍ଲୀ ପବ୍ଲିକ ସ୍କୁଲରେ ପାଠ ଶେଷ କରି ଆଇଆଇଟିରୁ ଗ୍ରାଜ୍ୟୁଏଟ ହୋଇଥିଲେ। ତାପରେ ସେ ୟୁପିଏସସି କ୍ରାକ୍ କରି ହୋଇଥିଲେ ଆଇଏଏସ୍। ସେ ଗ୍ରାମୀଣ ବିକାଶ ମନ୍ତ୍ରଣାଳୟରେ ଯୁଗ୍ମ ସଚିବ ଭାବେ କାମ କରିଛନ୍ତି। ଏହା ପୂର୍ବରୁ ସେ ଛତିଶଗଡ଼ର ବିଭିନ୍ନ ଉଚ୍ଚସ୍ତରୀୟ ବିଭାଗରେ ରହିଥିଲେ ଦାୟିତ୍ୱରେ । ଏପରି କି ଏକାଧିକ ଜିଲ୍ଲାର ଜିଲ୍ଲାପାଳ ଭାବେ ମଧ୍ୟ ସେ କାର୍ଯ୍ୟ କରିଛନ୍ତି। ୭ ବର୍ଷ କେନ୍ଦ୍ରୀୟ ଡେପୁଟେସନରେ ରହିବା ପରେ ଅମିତ ଛତିଶଗଡ଼କୁ ଫେରିଛନ୍ତି।
୨୦୦୪ ଛତିଶଗଡ଼ କ୍ୟାଡରର ଆଇଏଏସ୍ ଅଫିସର ଅମିତ ସବୁବେଳେ ବେଶ ଚର୍ଚ୍ଚାରେ ରହି ଆସନ୍ତି। ଗୋଟିଏ ସମୟରେ ସମାଲୋଚନାର ଶିକାର ବି ହୋଇଥିଲେ। ଯେତେବେଳେ ସେ ବସ୍ତରର ଜିଲ୍ଲାପାଳ ଥିଲେ ସେତେବେଳେ ସେ ସନଗ୍ଲାସ ପିନ୍ଧି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସ୍ୱାଗତ କରିଥିଲେ। ଏଥିପାଇଁ ସେ ଚର୍ଚ୍ଚାକୁ ଆସିଥିଲେ। ପ୍ରଧାନମନ୍ତ୍ରୀ ମୋଦିଙ୍କୁ ସନଗ୍ଲାସ ପିନ୍ଧି ଭେଟିବା ଆଦୌ ଉଚିତ ବ୍ୟବହାର ନୁହେଁ ବୋଲି ଅନେକ ମତ ରଖିଥିଲେ। ୨୦୧୫ର ଏହି ଘଟଣା ପରେ ଅମିତଙ୍କୁ କାରଣ ଦର୍ଶାଅ ନୋଟିସ ମଧ୍ୟ ମିଳିଥିଲା।
Also Read-
ଶାନ୍ତନୁ ନାଇଡୁଙ୍କୁ ଟାଟା ମୋଟର୍ସରେ ମିଳିଲା ବଡ଼ ଦାୟିତ୍ବ, ସେୟାର କଲେ ଭାବବିହ୍ବଳପୂର୍ଣ୍ଣ ପୋଷ୍ଟ
