ପଟ୍ଟାମୁଣ୍ଡାଇ୨୧/୧: ମାତିଛନ୍ତି ମାଙ୍କଡ । ଗଛରେ ଲୁଚିଛପି ରହୁଛନ୍ତି । ଯାହାକୁ ଦେଖୁଛନ୍ତି ଗୋଡାଇ ଗୋଡାଇ ଆକ୍ରମଣ କରୁଛନ୍ତି । ସପ୍ତାହକରେ ୧୫ରୁ ଅଧିକ ଆହତ ହେଲେଣି । ପଟ୍ଟାମୁଣ୍ଡାଇ ଥାନା ସାନମାଣତିଆ ପଞ୍ଚାୟତରେ ବଢିଚାଲିଛି ମାଙ୍କଡ ଉପଦ୍ରବ । ମାଙ୍କଡ ଭୟରେ ଲୋକେ ତାଟି କବାଟ ପକେଇ ରହୁଛନ୍ତି । ଅତି ଦରକାର ନହେଲେ ଲୋକେ ଘରୁ ବାହାରୁନାହାନ୍ତି । ଯିଏ ବାହାରିଲା ମାଙ୍କଡ ହାବୁଡରେ ପଡିଲା ଜାଣ ।
ରବିବାର ଗୋଟିଏ ଦିନରେ ମାଙ୍କଡ ପଲଙ୍କ ଆକ୍ରମଣରେ ବଡମାଣତିଆ ଗାଁର ୫ ଜଣ କାଳନ୍ଦୀ ସାମଲ, ରବୀନ୍ଦ୍ର ସାହୁ, ପୁରସ୍ତମ ମଲ୍ଲିକ, ଧନିଆ ମଲ୍ଲିକ ଓ ଶୁଭଶ୍ରୀ ଦାସ ଆହତ ହୋଇଛନ୍ତି । ସମସ୍ତଙ୍କୁ ପଟ୍ଟାମୁଣ୍ଡାଇ ଉପଖଣ୍ଡ ସ୍ତରୀୟ ସ୍ବାସ୍ଥ୍ୟକେନ୍ଦ୍ର ଓ କେନ୍ଦ୍ରାପଡା ଜିଲ୍ଲା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।
ଗୋଟିଏ ସପ୍ତାହ ମଧ୍ୟରେ ୧୫ରୁ ଅଧିକ ଲୋକଙ୍କୁ ଖଣ୍ଡିଆ ଖାବରା କରି ଘାଇଲା କରିସାରିଲେଣି ମାଙ୍କଡ ପଲ । କି ଦିନ କି ରାତି ଠେଙ୍ଗା ବାଡି ଧରି ଜଗୁଛନ୍ତି ଲୋକ । ନିଆଁ ଲଗାଇ ମାଙ୍କଡ ପଲଙ୍କୁ ଭୟଭୀତ କରିବାକୁ ଚେଷ୍ଟା କରୁଛନ୍ତି । ହେଲେ ମାଙ୍କଡ ପଲ ଗାଁ ଛାଡି ଯିବାର ନାଁ ଧରୁନାହାନ୍ତି । ଗାଁରୁ ମାଙ୍କଡ ପଲଙ୍କୁ ତଡିବାକୁ ଜିଲ୍ଲାପାଳ ଓ ବନବିଭାଗ ନିକଟରେ ଦାବି କରିଛନ୍ତି ଗାଁ ଲୋକ ।
