ନୂଆଦିଲ୍ଲୀ: ସିରିଆରେ ବିଦ୍ରୋହୀ ଗୋଷ୍ଠୀ ଅଚାନକ ସେନା ଘାଟି ଉପରେ ଆକ୍ରମଣ କରିଛନ୍ତି । ଏହାର ପାଲଟା ଜବାବ ଦେଇଛି ସେନା । ଏଥିରେ ଅନ୍ୟୁନ ୧୩୯ ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ବିଦ୍ରୋହୀ ଗୋଷ୍ଠୀର ୧୩୨ଜଣ ରହିଛନ୍ତି । ଗତ ୪ ବର୍ଷରେ ଏହା ସବୁଠୁ ବଡ଼ ଆକ୍ରମଣ ବୋଲି କୁହାଯାଉଛି ।
ବିଦ୍ରୋହୀ ଗୋଷ୍ଠୀ ସିରିଆର ଏକ ସେନା ଘାଟିକୁ କବ୍ଜା କରିଛନ୍ତି । ଏହି ଗୋଷ୍ଠୀଗଡ଼ିକ ମଧ୍ୟରୁ ହୟାତ୍ ତହରିର୍ ଅଲ୍-ସମ୍ ନାମକ ଏକ ଗୋଷ୍ଠୀ ଉପରେ ଅଲ୍-କାଏଦାର ସମର୍ଥନ ରହିଛି । ଏହି ଆତଙ୍କବାଦୀ ସଙ୍ଗଠନ ସିରିଆର ଅନ୍ୟତମ ପ୍ରମୁଖ ସହର ଆଲେପ୍ପୋରେ ପ୍ରାୟ ୧୦ କିମି ଭିତରକୁ ପଶିଯାଇଛନ୍ତି । ଆତଙ୍କୀମାନେ ବଶର ଅଲ୍ ଅସଦ୍ଙ୍କ ସରକାରକୁ ସମର୍ଥନ କରୁଥିବା ସେନାର ଅସ୍ତ୍ରଶସ୍ତ୍ର ଏବଂ ବାହନକୁ ମଧ୍ୟ କବ୍ଜା କରିଛନ୍ତି ।
ବିଦ୍ରୋହୀ ଗୋଷ୍ଠୀ ପକ୍ଷରୁ ଟେଲିଗ୍ରାମ ପୋଷ୍ଟରେ ଦାବି କରାଯାଇଛି ଯେ, ସେମାନେ ସିରିଆ ସରକାରଙ୍କ ବେସ୍-୪୬କୁ ନିଜ ଅକ୍ତିଆରକୁ ନେଇଛନ୍ତି । କେବଳ ୧୦ ଘଣ୍ଟା ଭିତରେ ଆଲେପ୍ପା ସହରର ଅନେକ ଗ୍ରାମକୁ ନିଜ ନିୟନ୍ତ୍ରଣକୁ ନେଇଛନ୍ତି । ତେବେ ଏହି ଦାବି ଉପରେ ସିରିଆ ସରକାରଙ୍କ କୌଣସି ପ୍ରତିକ୍ରିୟା ଆସିନାହିଁ । ୨୦୨୦ରେ ତୁର୍କୀର ସହଯୋଗରେ ବିଦ୍ରୋହୀ ଏବଂ ଅସଦ ସରକାରଙ୍କ ଭିତରେ ଏକ ବୁଝାମଣା ହୋଇଥିଲା । ଏଥିଯୋଗୁ ବିଦ୍ରୋହୀଙ୍କ ପକ୍ଷରୁ ଆକ୍ରମଣ କମିଥିଲା । ଜାତିସଂଘ ରିପୋର୍ଟ ଅନୁସାରେ, ପ୍ରାୟ ଏକ ଦଶନ୍ଧି ଧରି ସିରିଆ ଗୃହଯୁଦ୍ଧରେ ୩ ଲକ୍ଷରୁ ଊଦ୍ଧ୍ୱର୍ ଲୋକଙ୍କ ମୃତ୍ୟୁ ଘଟିଥିଲା । ଲକ୍ଷ ଲକ୍ଷ ଲୋକଙ୍କୁ ଘରଦ୍ୱାର ଛାଡ଼ି ବିସ୍ଥାପିତ ହେବାକୁ ପଡ଼ିଥିଲା ।
