ମୁମ୍ବାଇ ୨୩।୧୧: ମହାରାଷ୍ଟ୍ର ବିଧାନସଭା ନିର୍ବାଚନର ଫଳାଫଳ ଆସି ସାରିଲାଣି। ରାଜ୍ୟରେ ମହାୟୁତୀ ମେଣ୍ଟ ସରକାର ଗଢିବାକୁ ପ୍ରଚଣ୍ଡ ବହୁମତ ପାଇଛି। ଏହି ନିର୍ବାଚନ ମହାସମରରେ ବଲିଉଡ ସେଲିବ୍ରିଟି ତଥା ବିଗବସ୍-୭ର କଣ୍ଟେଷ୍ଟାଣ୍ଟ ଏଜାଜ ଖାନ ମଧ୍ୟ ତାଙ୍କ ଭାଗ୍ୟ ପରୀକ୍ଷା କରିଥିଲେ। ମୁମ୍ବାଇ ବର୍ସୋବା ଆସନରୁ ସ୍ୱାଧୀନ ପ୍ରାର୍ଥୀ ଭାବେ ଭାଗ୍ୟ ପରୀକ୍ଷା କରିଥିବା ଏଜାଜ ଖାନଙ୍କୁ ଭୋଟର ଜଣେ ନେତା ଭାବେ ପ୍ରତ୍ୟାକ୍ଷାନ କରିଦେଇଛନ୍ତି।
ଚନ୍ଦ୍ରଶେଖର ଆଜାଦଙ୍କ ଆଜାଦ ସମାଜ ପାର୍ଟି ଟିକେଟରେ ଏଜାଜ ନିର୍ବାଚନରେ ପ୍ରତିଦ୍ୱନ୍ଦ୍ୱୀତା କରିଥିଲେ। ତେବେ ଅଭିନେତାଙ୍କୁ ନୋଟାରୁ ବି କମ୍ ଭୋଟ ମିଳିଛି। ମହାରାଷ୍ଟ୍ର ବିଧାନସଭା ନିର୍ବାଚନରେ ଏଜାଜଙ୍କୁ ମାତ୍ର ୧୫୫ଟି ଭୋଟ ମିଳିଛି। ୧୦ ରାଉଣ୍ଡ ଗଣତି ଶେଷ ହେବା ପର୍ଯ୍ୟନ୍ତ ତାଙ୍କର ମୋଟ ଭୋଟ ୭୦ ଥିଲା। ତେବେ ଏଜାଜ ଦାବି କରିଥିଲେ ଯେ ତାଙ୍କ ପରିବାରର ସଦସ୍ୟ ସଂଖ୍ୟା ମଧ୍ୟ ଭୋଟ ଠାରୁ ଅଧିକ। ହେଲେ ୨୨ ରାଉଣ୍ଡ ଗଣତି ଶେଷ ହେବା ବେଳକୁ ଏଜାଜଙ୍କୁ ମାତ୍ର ୧୫୫ଟି ଭୋଟ ମିଳିଛି। ଏହା ପରେ ସୋସିଆଲ ମିଡିଆରେ ଲୋକେ ତାଙ୍କୁ ଟ୍ରୋଲ କରିବା ଆରମ୍ଭ କରିଦେଇଛନ୍ତି।
ଏଜାଜଙ୍କ ଏପରି ପରାଜୟରେ ସୋସିଆଲ ମିଡିଆରେ ଲୋକେ ଅନେକ ମିମସ୍ ବନେଇଛନ୍ତି। କିଛି ଲୋକେ ଲେଖିଛନ୍ତି ଏଜାଜଙ୍କୁ ତାଙ୍କ ପରିବାରର ଭୋଟ ବି ମିଳିନି। ଏଜାଜଙ୍କର ଇଂଷ୍ଟାରେ ଫଲୋଅରଙ୍କ ସଂଖ୍ୟା ୫୬ଲକ୍ଷ ଥିବା ବେଳେ ତାଙ୍କୁ ମାତ୍ର ୧୫୫ଟି ଭୋଟ ମିଳିଛି। ଯାହା ୟୁଜରଙ୍କ ନିକଟରେ ତାଙ୍କୁ ହାସ୍ୟସ୍ପଦ କରିଛି। ଏଥିରେ ଜଣେ ୟୁଜର ଏଜାଜଙ୍କ ସ୍ଥାନରେ ଆଉ କାହାକୁ ଟିକେଟ ଦିଆଯାଇଥିଲେ ଫଳାଫଳ କିଛି ଓଲଟା ହୋଇଥାନ୍ତା ବୋଲି ଉଲ୍ଲେଖ କରିଛନ୍ତି।
