ଶାନ୍ତି ବୁଝାମଣା ମଝିରେ ଗାଜା ଉପରେ ଇସ୍ରାଏଲର ଏୟାର ଷ୍ଟ୍ରାଇକ, ଆତଙ୍କୀ ଆଡ୍ଡା ଉପରେ କଡ଼ା କାର୍ଯ୍ୟାନୁଷ୍ଠାନ

ନୂଆଦିଲ୍ଲୀ: ଇସ୍ରାଏଲ ଓ ହମାସ ଆତଙ୍କୀଙ୍କ ମଧ୍ୟରେ ସଂଘର୍ଷ ଥମିବାର ନାଁ ନେଉନି। ଅସ୍ତ୍ରବିରତି ବି ଏଠି କାମ କରୁନି। ଏହି କ୍ରମରେ ଇସ୍ରାଏଲ ସେନା ରାଫାରେ ଏୟାର ଷ୍ଟ୍ରାଇକ କରିଥିବା ସ୍ଵୀକାର କରିଛି। ହମାସ ଆତଙ୍କବାଦୀ ଅସ୍ତ୍ରବିରତି ଉଲ୍ଲଂଘନ କରି ଇସ୍ରାଏଲ ସେନା ଉପରେ ଗୁଳିମାଡ଼ କରିଥିଲେ। ଏହାର ମୁହଁତୋଡ଼ ଜବାବ ଦେବା ପାଇଁ ଏମିତି କାର୍ଯ୍ୟାନୁଷ୍ଠାନ ନିଆଯାଇଥିବା କହିଛି ଇସ୍ରାଏଲ।

ପ୍ରଧାନମନ୍ତ୍ରୀ ନେତାନ୍ୟାହୁ  ଏହି କାର୍ଯ୍ୟାନୁଷ୍ଠାନ ଆଦେଶ ଦେଇଥିଲେ। ଇସ୍ରାଏଲ ସେନା ପକ୍ଷରୁ ଜାରି ବୟାନରେ କୁହାଯାଇଛି ଯେ, ଆଜି ଦିନ ବେଳେ ଆତଙ୍କବାଦୀ ଆଇଡିଏଫ ଉପରେ ଆଣ୍ଟି ଟ୍ୟାଙ୍କ ମିସାଇଲ ମାଡ଼ କରିଥିଲେ। ଏହା ବ୍ୟତୀତ ହମାସ ପକ୍ଷରୁ ଫାୟରିଂ କରାଯାଇଥିଲା। ଇସ୍ରାଏଲ ସେନା ଅନୁଯାୟୀ, ହମାସ ସହିତ ବୁଝାମଣା ସର୍ତ୍ତା ମୁତାବକ ରାଫା ଅଞ୍ଚଳରେ ଆତଙ୍କବାଦୀଙ୍କ  ଆଡ୍ଡା ନଷ୍ଟ କରିବାକୁ ଯାଇଥିଲୁ।

ଇସ୍ରାଏଲ ପ୍ରଧାନମନ୍ତ୍ରୀ  ବେଞ୍ଜାମିନ ନେତନ୍ୟାହୁ ଗାଜାପଟ୍ଟିରେ ଆତଙ୍କୀ ଶିବିର ଉପରେ ଦୃଢ କାର୍ଯ୍ୟାନୁଷ୍ଠାନର ଆଦେଶ ଦେଇଥିଲେ। ଏହା ସହ ହମାସ ଉପରେ ଅସ୍ତ୍ରବିରତି ଉଲ୍ଲଂଘନର ଅଭିଯୋଗ କରିଥିଲେ ନେତନ୍ୟାହୁ।  ଇସ୍ରାଏଲ ସେନା ଦ୍ଵାରା ଜାରି ବୟାନରେ କୁହାଯାଇଛି ଯେ, ଆଇଡିଏଫ ଆତଙ୍କବାଦୀଙ୍କ ଗୁଳିମାଡ଼ର ଜବାବ ଏୟାରଷ୍ଟ୍ରାଇକ କରି ଦିଆଯାଇଛି। ରାଫା ଏରିଆକୁ  ଟାର୍ଗେଟ୍ କରାଯାଇ ଲଢୁଆ ବିମାନରୁ ହମଲା କରାଯାଇଥିଲା। ଏଥିରେ ଅନେକ ଆତଙ୍କୀ ସୁଡ଼ଙ୍ଗ ଓ ସାମରିକ ଭିତ୍ତିଭୂମି ଧ୍ଵଂସ ହୋଇଥିବା ଇସ୍ରାଏଲ ପକ୍ଷରୁ କୁହାଯାଇଛି।