ଭୁବନେଶ୍ବର ୬/୧: ରାଜ୍ୟରେ ବଢିଚାଲିଛି ଅତ୍ୟାବଶ୍ୟକ ସାମଗ୍ରୀର ଦର । ପ୍ରତିବାଦରେ ସରକାରଙ୍କୁ ଘେରିଛି ବିରୋଧୀ ବିଜେଡି । ଗାନ୍ଧିମାର୍ଗରେ ବିଶାଳ ବିକ୍ଷୋଭ କରିଛି ଦଳ । ବିକ୍ଷୋଭରେ ସାମିଲ ହୋଇ ମୋହନ ସରକାରଙ୍କ ଉପରେ ବର୍ଷିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । କହିଛନ୍ତି ବିଜେପି ସରକାରକୁ ଆସିବାକୁ ୭ମାସ ହୋଇଗଲାଣି ,ଆମେ ଖାଲି ଲମ୍ବା ଲମ୍ବା ଭାଷଣ ଶୁଣୁଛୁ । ହେଲେ କାମ ଘର ଶୂନ ।
ଦରଦାମ ବଢିଚାଲିଛି କିନ୍ତୁ କିଛି ଆକ୍ସନ ନାହିଁ । ଲୋକଙ୍କ ସରକାର ବୋଲି ଦାବି କରୁଛନ୍ତି କିନ୍ତୁ ଲୋକଙ୍କ ସୁଖ ଦୁଃଖ ସହ ଏ ସରକାରର ସଂପର୍କ ଅଛି ବୋଲି ଜଣାପଡୁନି । ସାଧାରଣ ଲୋକଙ୍କ ପାଇଁ ବଂଚିବା କଷ୍ଟ ହୋଇଗଲାଣି । ବୋଝ ଉପରେ ନଳିତା ବିଡା ଭଳି ଅଦିନିଆ ବର୍ଷା ହୋଇଛି । କିନ୍ତୁ ସରକାରଙ୍କ ସହାୟତା କିଛି ନାହିଁ । ମାଆମାନେ କାନ୍ଦୁଛନ୍ତି, ଚାଷୀ ମାନେ କାନ୍ଦୁଛନ୍ତି କିନ୍ତୁ ସରକାର କୁମ୍ଭକର୍ଣ୍ଣ ନିଦ୍ରାରେ ଶୋଇଛନ୍ତି । ମିଛ କଥା କହି ବିଜେପି ସରକାରକୁ ଆସିଛି । ଡବଲ ଇଞ୍ଜିନ ସରକାରରେ ଡବଲ ମହଙ୍ଗା ମାଡ଼ । ବିଜେପି ଗୋଲାପି ସରକାରର ଟ୍ରେଲର ଦେଖାଇଲେ । କିନ୍ତୁ ଫିଲ୍ମ ରିଲିଜରେ ଜଣା ପଡିଲା ମୋହନ ମାଝି ସରକାର ମହଙ୍ଗା ମାଡ଼ର ସରକାର ।
