ଭୁବନେଶ୍ୱର: ରାଜ୍ୟ ବଜେଟ୍ ୨୦୨୪-୨୫ ଗୁରୁବାର ବିଧାନସଭାରେ ଉପସ୍ଥାପନ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ରାଜ୍ୟରେ ଗୁଣାତ୍ମକ ଶିକ୍ଷା ମାଧ୍ୟମରେ ଯୁବ ଶକ୍ତିର ବ୍ୟାପକ ବିକାଶ ସୁନିଶ୍ଚିତ ପାଇଁ ଶିକ୍ଷା କ୍ଷେତ୍ର ଲାଗି ଚଳିତ ବଜେଟରେ ୩୫ ହଜାର ୫ ଶହ ୩୬ କୋଟି ଟଙ୍କା ବ୍ୟୟବରାଦ କରାଯାଇଛି । ଏହାସହ ବଜେଟରେ ଏକ ବଡ଼ ଘୋଷଣା କରି ସରକାର ଜାତୀୟ ଶିକ୍ଷା ନୀତି ଅନୁଯାୟୀ ଏକ ରାଜ୍ୟସ୍ତରୀୟ ଶିକ୍ଷା ନୀତିର ବିକାଶ ଏବଂ ପ୍ରଣୟନ କରିବେ ।

ଶିକ୍ଷା କ୍ଷେତ୍ର ପାଇଁ ଘୋଷଣା

୧.ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ ଯୋଜନା ଶୁଭାରମ୍ଭ କରିଛନ୍ତି ସରକାର । ଏଥିପାଇଁ ବଜେଟରେ 50 କୋଟି ଟଙ୍କା ବ୍ୟୟବରାଦ କରାଯାଇଛି ।

୨. ‘ପଞ୍ଚସଖା ଶିକ୍ଷା ସେତୁ ଅଭିଯାନ’ ୩ ଶହ ୩୨ କୋଟି ଟଙ୍କା ବ୍ୟୟବରାଦ ହୋଇଛି ।

୩. ‘ଗଙ୍ଗାଧର ମେହର ଶିକ୍ଷା ମାନକ ବୃଦ୍ଧି’ ଯୋଜନା ଲାଗି ୪ ଶହ ୯ କୋଟି ଟଙ୍କା ଆବଣ୍ଟିତ ।

୪. ସମଗ୍ର ଶିକ୍ଷା ପାଇଁ ୩ ହଜାର ୭ ଶହ ୯୧ କୋଟି ଟଙ୍କା ଆବଣ୍ଟିତ

୫.ପିଏମ ପୋଷଣ ଲାଗି ୯ ଶହ ୯୭ କୋଟି ବ୍ୟୟବରାଦ କରିଛନ୍ତି ସରକାର ।

୬. ‘ମାଧୋ ସିଂହ ହାତ ଖର୍ଚ୍ଚ’ ନାମକ ନୂଆ ଯୋଜନା ଲଞ୍ଚ ହୋଇଛି । ନବମ ଓ ଏକାଦଶ ଶ୍ରେଣୀରେ ନାମ ଲେଖିଥିବା ପ୍ରତି ଅନୁସୂଚିତ ଜନଜାତି ଛାତ୍ରଛାତ୍ରୀଙ୍କୁ ବାର୍ଷିକ ୫ ହଜାର ଟଙ୍କା ପ୍ରୋତ୍ସାହନ ମିଳିବ ।  

୭.ପ୍ରଧାନମନ୍ତ୍ରୀ ଉଚ୍ଚତର ଶିକ୍ଷା ଅଭିଯାନ ଯୋଜନା (PM USHA) ପ୍ରଚଳନ କରିବେ ।

୮. ସରକାରୀ ଓ  ବେସରକାରୀ   ମହବିଦ୍ୟାଳ ଓ ବିଶ୍ବବିଦ୍ୟାଳୟରେ ପାଠାଗାର ଏବଂ ହଷ୍ଟେଲ ଆଦି ନିର୍ମାଣ ଲାଗି  ୩ ଶହ ୨୫ କୋଟି ବ୍ୟୟବରାଦ ହୋଇଛି ।  ସରକାରୀ ବିଶ୍ବବିଦ୍ୟାଳୟଗୁଡ଼ିକରେ ସରକାର ୨୬ଟି ଭାଷା ଗବେଷଣାଗାର ପ୍ରତିଷ୍ଠା ହେବ । 

୯. ମୁଖ୍ୟମନ୍ତ୍ରୀ ମେଧାବୀ ଛାତ୍ର ପ୍ରୋତ୍ସାହନ ଯୋଜନା ମାଧ୍ୟମରେ ସ୍ନାତକ ଓ ସ୍ନାତ୍ତୋକତର ଛାତ୍ରଛାତ୍ରୀଙ୍କୁ ଛାତ୍ରବୃତ୍ତି ବାବଦକୁ  ୭ ଶହ ୧ କୋଟି ବ୍ୟୟବରାଦ କରାଯାଇଛି ।  ଛାତ୍ରଛାତ୍ରୀଙ୍କୁ ଲାପଟପ ବିତରଣ ପାଇଁ ‘ଗୋଦାବରୀଶ ବିଦ୍ୟାର୍ଥୀ ପ୍ରୋତ୍ସାହନ’ ଯୋଜନାରେ ୫୪ କୋଟି ଟଙ୍କା ବ୍ୟୟବରାଦ ହୋଇଛି ।

୧୦. ଦକ୍ଷତା ବିକାଶ ଏବଂ ବୈଷୟିକ ଶିକ୍ଷା ପାଇଁ ବ୍ୟୟବରାଦ ୬୦ ପ୍ରତିଶତ ବୃଦ୍ଧି କରି ୧ ହଜାର ୫ ଶହ ୮୩ କୋଟି କରିଦିଆଯାଇଛି । 

୧୧.କ୍ରୀଡା ବିକାଶ ପାଇଁ ସରକାର ୧ ହଜାର ୩ ଶହ ୧୫ କୋଟି ଟଙ୍କା ଖର୍ଚ୍ଚ କରିବେ ସରକାର ।

୧୨. ଯୁବବର୍ଗର ସମନ୍ବିତ ବିକାଶ ଲାଗି ନୂଆ ଯୋଜନା ‘ଯୁବ ଶକ୍ତି’ ଲାଗି ଶହେ କୋଟି ଆବଣ୍ଟିତ ହୋଇଛି । 

୧୩. ମେଧାବୀ କ୍ରୀଡାବିତଙ୍କ ଲାଗି ସରକାର ‘ମେଧାବୀ ଖେଳ ରତ୍ନ ଖୋଜା ଅଭିଯାନ’ ଆରମ୍ଭ କରିବେ ।