ବାଙ୍କି୧୮/୨: କେତେ ଖୁସିରେ ବାହାଘର ଭୋଜି ଖାଇଲେ । ସେଠୁ ଆସିବା ପରେ ଆରମ୍ଭ ହୋଇଗଲା ଝାଡା ବାନ୍ତି ଜ୍ବର । ଜଣେ କି ଦି ଜଣ ନୁହେଁ ପ୍ରାୟ ୩ଶହରୁ ଅଧିକ ଲୋକ ବାହାଘର ଭୋଜି ଖାଇ ଅସୁସ୍ଥ ହୋଇପଡିଛନ୍ତି । କଟକ ଜିଲ୍ଲା ବାଙ୍କୀ ବୈଦେଶ୍ବର ଥାନା ଅନ୍ତର୍ଗତ ବୈଦେଶ୍ବର ପାଟଣା ଗାଁରୁ ଆସିଛି ଅଭାବନୀୟ ଖବର ।
ଖୋର୍ଦ୍ଧା ବୋଲଗଡ ଅଞ୍ଚଳରୁ ଆସିଥିବା ବରଯାତ୍ରୀ ଓ ବାହାଘର ଭୋଜି ପାଇଁ ନିମନ୍ତ୍ରିତ ଅତିଥିଙ୍କୁ ମିଶାଇ ପ୍ରାୟ ହଜାରେ ଜଣଙ୍କ ପାଇଁ ଭୋଜିର ଆୟୋଜନ କରାଯାଇଥିଲା । ବେଶ ହସଖୁସିରେ ସମସ୍ତେ ସ୍ବାଦିଷ୍ଟ ଭୋଜନ କରିଥିଲେ । ହେଲେ ଏହି ଖାଇବା ଯେ ବିଷ ପାଲଟିଯିବ କେହି ଭାବିନଥିଲେ । ଭୋଜି ଖାଇବାର କିଛି ସମୟ ପରେ ପ୍ରାୟ ସମସ୍ତେ ଅସୁସ୍ଥ ଅନୁଭବ କରିଥିଲେ । ଝାଡା ବାନ୍ତି ହୋଇଥିଲା । ଜ୍ବର ବି ଆସିଥିଲା ।
୮୦ରୁ ଅଧିକ ଗୁରୁତରଙ୍କୁ କଟକ, ଭୁବନେଶ୍ବର ଓ ଖୋର୍ଦ୍ଧାର ଭଳି ବିଭିନ୍ନ ସରକାରୀ ଓ ବେସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି । ସେପଟେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କ ନିର୍ଦ୍ଦେଶରେ ୨ଟି ମେଡିକାଲ ଟିମ୍ ବୈଦେଶ୍ବରପାଟଣା ଗାଁରେ ଆକ୍ରାନ୍ତଙ୍କ ଚିକିତ୍ସା କରୁଛନ୍ତି । ସ୍ଥିତି ଗମ୍ଭୀର ଥିବାରୁ ଦରକାର ହେଲେ କଟକ ସଦରମହକୁମାରୁ ମେଡିକାଲ ଟିମ୍ ଗାଁକୁ ପଠାଯିବାକୁ ଯୋଜନା ହେଉଛି । ଖାଦ୍ୟ ଅପମିଶ୍ରଣ ବା କୌଣସି କାରଣରୁ ସଂକ୍ରମଣ ଜନିତ ଖାଦ୍ୟ ବିଷାକ୍ତ ହେବା ଯୋଗୁ ଫୁଡ ପଏଜନିଂ ହୋଇଥିବା କହିଛନ୍ତି ଡାକ୍ତର ।
