ମାତିଲା ମଦ୍ୟପ ଡ୍ରାଇଭର, ନିଶାସକ୍ତ ଅବସ୍ଥାରେ ଘଟାଇଲା ସିରିଜ ଦୁର୍ଘଟଣା

କଟକ: ମାତିଲା ମଦ୍ୟପ ଡ୍ରାଇଭର।ନିଶାସକ୍ତ ଅବସ୍ଥାରେ ଘଟାଇଲା ସିରିଜ ଦୁର୍ଘଟଣା। ଏଥିରେ ଜଣେ ନାବାଳକ ସମେତ ୪ ଜଣ ଆହତ ହୋଇଥିବାବେଳେ, ସେମାନଙ୍କୁ ମେଡିକାଲରେ ଭର୍ତ୍ତି କରାଯାଇଛି। ସେପଟେ ଦୁର୍ଘଟଣା ଘଟାଇଥିବା ଡ୍ରାଇଭରକୁ କାବୁ କରି ପୋଲିସର ଜିମା ଦେଲେ ଲୋକେ। ଘଟଣା ଘଟିଛି କଟକ ଡଗରପଡ଼ା ହନୁମାନ ମନ୍ଦିର ଛକ ନିକଟରେ।

ସୂଚନା ଅନୁସାରେ, ସୋମବାର ସନ୍ଧ୍ୟାରେ ଏକ ଚିପ୍ସ ବୋଝେଇ ମିନି ଟ୍ରକ କଟକ ଜୁଡିସିଆଲ ଏକାଡେମୀ ଛକରେ ପ୍ରଥମେ ଏକ ପାସେଞ୍ଜର ଅଟୋକୁ ଧକ୍କା ଦେଇଥିଲା । ଏହା ପରେ ଡଗରପଡ଼ା ହନୁମାନ ମନ୍ଦିର ଛକରେ ବାଇକରେ ଯାଉଥିବା ମହିଳା ଓ ଜଣେ ବ୍ୟକ୍ତିଙ୍କୁ ସିରିଜ ଦୁର୍ଘଟଣା ଘଟାଇ ଫେରାର ହେବାକୁ ଚେଷ୍ଟା କରିଥିଲା। ହେଲେ ଏଠାରୁ କିନ୍ତୁ ଲୋକଙ୍କ କବଳରୁ ଖସିପାରିନଥିଲା ଡ୍ରାଇଭର। ଲୋକେ ତାଙ୍କୁ କାବୁ କରିଥିଲେ।

ଜଣାପଡ଼ିଛି ଡ୍ରାଇଭର ଜଣକ ମଦ ପିଇ ଗାଡ଼ି ଚଳାଉଥିଲେ। ତେବେ ଏହି ଦୁର୍ଘଟଣାରେ ଜଣେ ଅଟୋ ଡ୍ରାଇଭର, ଜଣେ ନାବାଳକ ସମେତ ମୋଟ ୪ ଜଣ ଆହତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି। ମଦ୍ୟପ ଡ୍ରାଇଭରକୁ ପୋଲିସ୍ ଅଟକ ରଖିବା ସହ ମିନିଟ୍ରକକୁ ଜବତ କରିଛି।