ନୂଆଦିଲ୍ଲୀ ୧୯।୧୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ପରୀକ୍ଷା ପେ ଚର୍ଚ୍ଚା’ର ଅଷ୍ଟମ ସଂସ୍କରଣ ଜାନୁୟାରୀରେ ଆୟୋଜନ କରାଯିବ। କେନ୍ଦ୍ର ଶିକ୍ଷା ମନ୍ତ୍ରାଳୟ ଗୁରୁବାର ଏ ସମ୍ପର୍କରେ ସୂଚନା ଦେଇଛନ୍ତି, କହିଛନ୍ତି ଯେ ଏଥି ପାଇଁ ରେଜିଷ୍ଟ୍ରେସନ ପ୍ରକ୍ରିୟା ଆରମ୍ଭ ହୋଇସାରିଛି। ଉଲ୍ଲେଖଯୋଗ୍ୟ ଯେ ପ୍ରଧାନମନ୍ତ୍ରୀ ମୋଦି ‘ପରୀକ୍ଷା ପେ ଚର୍ଚ୍ଚା’ରେ ବୋର୍ଡ ପରୀକ୍ଷା ଦେବାକୁ ଯାଉଥିବା ଛାତ୍ରଛାତ୍ରୀଙ୍କ ସହ ଆଲୋଚନା କରିଥାନ୍ତି। ୨୦୧୮ ମସିହାରେ ତାଲକଟୋରା ଷ୍ଟାଡିୟମରେ ଏହାର ପ୍ରଥମ ସଂସ୍କରଣ ଅନୁଷ୍ଠିତ ହୋଇଥିଲା।
ମନ୍ତ୍ରାଳୟ ଏକ ବୟାନରେ କହିଛନ୍ତି ଯେ ପରୀକ୍ଷା ପାଇଁ ଉତ୍ତେଜନା ହ୍ରାସ କରିବା, ଛାତ୍ର, ଶିକ୍ଷକ ଓ ଅଭିଭାବକ ପରୀକ୍ଷାକୁ ଏକ ଉତ୍ସବ ରୂପେ ପାଳନ କରିବା ପାଇଁ ଉତ୍ସାହିତ କରିବା ନିମନ୍ତେ ଆରମ୍ଭ ହୋଇଥିବା ‘ପରୀକ୍ଷା ପେ ଚର୍ଚ୍ଚା’ ଗତ ୭ ବର୍ଷ ହେଲା ସଫଳ ଆୟୋଜନରେ ପରିଣତ ହୋଇଛି। କେନ୍ଦ୍ରୀୟ ଶିକ୍ଷାମନ୍ତ୍ରାଳୟ ବୟାନରେ କୁହାଯାଇଛି ଯେ ‘ପରୀକ୍ଷା ପେ ଚର୍ଚ୍ଚା ୨୦୨୫’ ନିମନ୍ତେ ରେଜିଷ୍ଟ୍ରେସନ ଆରମ୍ଭ ହୋଇସାରିଲାଣି ଓ ଏହା ଜାନୁୟାରୀ ୧୪ ତାରିଖ ପର୍ଯ୍ୟନ୍ତ ଖୋଲା ରହିବ।
‘ପରୀକ୍ଷା ପେ ଚର୍ଚ୍ଚା’ ଏକ ବାର୍ଷିକ କାର୍ଯ୍ୟକ୍ରମ, ଯେଉଁଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୋର୍ଡ ପରୀକ୍ଷାରେ ବସିବାକୁ ଯାଉଥିବା ଛାତ୍ରଛାତ୍ରୀଙ୍କ ସହ କଥାବାର୍ତ୍ତା ହୁଅନ୍ତି। ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଛାତ୍ରଙ୍କୁ ପରୀକ୍ଷା ସମ୍ପର୍କିତ ଉତ୍ତେଜନା ଓ ଅନ୍ୟ ପ୍ରସଙ୍ଗରେ ପ୍ରଶ୍ନର ଜବାବ ମଧ୍ୟ ଦିଅନ୍ତି। ସ୍କୁଲ ଓ କଲେଜ ଛାତ୍ରଛାତ୍ରୀଙ୍କ ସହ ପ୍ରଧାନମନ୍ତ୍ରୀ ମୋଦିଙ୍କ ପ୍ରଥମ କାର୍ଯ୍ୟକ୍ରମ ୧୬ ଫେବୃଆରୀ ୨୦୧୮ରେ ଦିଲ୍ଲୀର ତାଲକଟୋରା ଷ୍ଟାଡିୟମରେ ଆୟୋଜନ କରାଯାଇଥିଲା। ଏହାର ଗତ ସଂସ୍କରଣ ପ୍ରଗତି ମୈଦାନର ଭାରତ ମଣ୍ଡପମରେ ଆୟୋଜନ କରାଯାଇଥିଲା, ଯେଉଁଥିରେ ଦେଶର ଛାତ୍ରଛାତ୍ରୀମାନେ ଅଂଶଗ୍ରହଣ କରିଥିଲେ।
ମନ୍ତ୍ରାଳୟ ଏହି ବୟାନରେ କୁହାଯାଇଛି ଯେ ମୁଖ୍ୟ କାର୍ଯ୍ୟକ୍ରମ ଦୃଷ୍ଟିରୁ ୧୨ ଜାନୁୟାରୀ ୨୦୨୫ ଅର୍ଥାତ ଜାତୀୟ ଯୁବ ଦିବସରୁ ୨୩ ଜାନୁୟାରୀ ୨୦୨୫ ନେତାଜୀ ସୁଭାଷ ଚନ୍ଦ୍ର ବୋଷ ଜୟନ୍ତୀ ପର୍ଯ୍ୟନ୍ତ ଅନେକ କାର୍ଯ୍ୟକ୍ରମ ଆୟୋଜନ କରାଯିବ। ଯେଉଁଥିରେ ସ୍ୱଦେଶୀ କ୍ରିଡା, ମାରାଥନ ଦୌଡ, ମିମ୍ ପ୍ରତିଯୋଗୀତା, ପଥପ୍ରାନ୍ତ ନାଟକ ଓ ଯୋଗ ସହ ଧ୍ୟାନ, ସିବିଏସଇ, କେଭିଏସ ଓ ନବୋଦୟ ବିଦ୍ୟାଳୟ ଛାତ୍ରଛାତ୍ରୀଙ୍କ ଦ୍ୱାରା ଗାୟନ ପ୍ରତିଯୋଗୀତା ପୋଷ୍ଟର ପ୍ରସ୍ତୁତି ପ୍ରତିଯୋଗୀତା, ମେଣ୍ଟାଲ ହେଲଥ କାଉନସେଲିଂ ଓ ସ୍ପେଶାଲ ଗେଷ୍ଟଙ୍କ ସହ ୱାର୍କସପ ଅନୁଷ୍ଠିତ ହେବ।
