କଟକ ୩୦/୧୦: ମଙ୍ଗଳବାର ମୁଣ୍ଡଳି ବ୍ରିଜ ଉପରେ ବାଇକ ରଖି ନିଖୋଜ ହୋଇଯାଇଥିଲେ। ବୁଧବାର ମହାନଦୀରୁ ମିଳିଲା ମୃତଦେହ । ନିଖୋଜ ବ୍ୟାଙ୍କ କର୍ମଚାରୀ ତାରିଣୀ ପ୍ରସାଦ ରାଉତଙ୍କ ମୃତଦେହ ମିଳିଛି । ମୃତକ ତାରିଣୀ ଢେଙ୍କାନାଳ ଗନ୍ଦିଆ ବ୍ଲକର । ଅନ୍ଲାଇନ ଟ୍ରେଡିଂ ଓ ଗେମ୍ରେ ତାରିଣୀ ଲକ୍ଷ ଲକ୍ଷ ଟଙ୍କା ଲଗାଇଥିଲେ । ମାନସିକ ଚାପ ଲାଗି ସେ ଆତ୍ମହତ୍ୟା କରିଥିବା କୁହାଯାଉଛି ।
ବୁଧବାର ସକାଳୁ ସ୍ଥାନୀୟ ଲୋକେ ନଦୀକୁ ଗାଧୋଇବାକୁ ଯାଇଥିବାବେଳେ ମୃତଦେହ ଭାସୁଥିବାର ଦେଖି ସ୍ଥାନୀୟ ପୋଲିସକୁ ଖବର ଦେଇଥିଲେ । ସଙ୍ଗେ ସଙ୍ଗେ ବାରଙ୍ଗ ଅଗ୍ନିଶମ ବାହିନୀ ଓ ବାରଙ୍ଗ ଥାନା ପୋଲିସ ପହଞ୍ଚି ମୃତଦେହ ଉଦ୍ଧାର କରିଛନ୍ତି । ମଙ୍ଗଳବାର ସକାଳୁ ବ୍ରିଜ ଉପରେ ବାଇକ ରଖି ନିଖୋଜ ହୋଇଯାଇଥିଲେ ତାରିଣୀ । ସେ ବ୍ରିଜକୁ ଡେଇଁ ପଡିଥିବା ସନ୍ଦେହ କରି ସର୍ଚ୍ଚ ଅପରେସନ ଚାଲିଥିଲା ।
