ମିଶିଲା ମନ : ଏକାଠି ହେଲେ ଆମେରିକା-ଚାଇନା, ଜିନପିଙ୍ଗଙ୍କୁ ଫୋନ୍ କଲେ ଟ୍ରମ୍ପ୍

ନୂଆଦିଲ୍ଲୀ, ୨୫|୧୧: ଆମେରିକା ଏବଂ ଚାଇନାର ସମ୍ପର୍କରେ ଆସିବ ସୁଧାର । ଏକାଠି ହୋଇ କାମ କରିବେ ଦୁଇ ଦେଶ । ଉଭୟ ଦେଶର ରାଷ୍ଟ୍ରମୁଖ୍ୟ ପରସ୍ପର ସହ ଆଲୋଚନା କରିବା ପରେ କିଛି ଏମିତି ସମ୍ଭାବନା ସୃଷ୍ଟି ହୋଇଛି । ଉଭୟ ନେତାଙ୍କ ମଧ୍ୟରେ ହୋଇଥିବା ଆଲୋଚନା ସକରାତ୍ମକ ରହିଥିବା ପ୍ରକାଶ କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ । ଦୁଇ ନେତା ଅନେକ ପ୍ରସଙ୍ଗ ଉପରେ ଆଲୋଚନା କରିଥିବା କୁହାଯାଉଛି ।

ଟ୍ରମ୍ପ କହିଛନ୍ତି ଯେ, ଆମେରିକା ପାଇଁ ସମ୍ପର୍କ ପ୍ରତିଷ୍ଠା ଖୁବ ଗୁରୁତ୍ୱପୂର୍ଣ୍ଣ । ସୋୟାବିନ ସମେତ ଅନ୍ୟ ଫଳ ପାଇଁ ଆମେରିକା ଏବଂ ଚୀନ ମଧ୍ୟରେ ବୁଝାମଣା ହୋଇଛି । ଏହାର ଲାଭ ସିଧାସଳଖ ଆମେରିକା କୃଷକଙ୍କୁ ମିଳିବ । ତିନି ସପ୍ତାହ ତଳେ ଦକ୍ଷିଣ କୋରିଆରେ ସେ ଜିନପିଙ୍ଗଙ୍କ ସହ କଥା ହୋଇଥିଲେ । ଏବେ ଆଲୋଚନାକୁ ଆଗକୁ ବଢାଯାଇଛି । ଉଭୟ ନେତା ଲଗାତାର ଭାବେ ଆଲୋଚନା କରିବା ଜରୁରୀ ବୋଲି ଟ୍ରମ୍ପ କହିଛନ୍ତି ।

ଟେଲିଫୋନ ଯୋଗେ ହୋଇଥିବା କଥାବାର୍ତ୍ତାରେ ସି ଜିନପିଙ୍ଗ୍ ୨୦୨୬ରେ ଟ୍ରମ୍ପଙ୍କୁ ବେଜିଂ ଆସିବାକୁ ନିମନ୍ତ୍ରଣ ଦେଇଛନ୍ତି । ଯାହାକୁ ୟୁଏସ ରାଷ୍ଟ୍ରପତି ସ୍ୱୀକାର କରିଛନ୍ତି । ସେ ମଧ୍ୟ ଜିନପିଙ୍ଗଙ୍କୁ ଆମେରିକା ଆସିବା ପାଇଁ ନିମନ୍ତ୍ରଣ ଦେଇଛନ୍ତି । ବର୍ତ୍ତମାନ ଆମେରିକା ଏବଂ ଚାଇନାର ସମ୍ପର୍କ ମଜବୁତ ରହିଛି । ଆଗକୁ ଆହୁରି ମଜବୁତ ହେବ ବୋଲି ଟ୍ରମ୍ପ କହିଛନ୍ତି ।

ଉଭୟ ଦେଶର ଆଲୋଚନା ,ସେହି ସମୟରେ ହୋଇଛି ଯେତେବେଳେ ତାଇଓ୍ୱାନକୁ ନେଇ ଉଭୟ ଦେଶ ମଧ୍ୟରେ ବିବାଦ ବଢିଥିଲା । ଜିନପିଙ୍ଗ୍ ତାଇଓ୍ୱାନକୁ ଚୀନର ଅଂଶ କହିଥାନ୍ତି । କିନ୍ତୁ ଆମେରିକା ଚୀନର ଏହି ଦାବିକୁ ଖଣ୍ଡନ କରିବା ସହ ତାଇଓ୍ୱାନର ସୁରକ୍ଷାକୁ ନିଜ ହାତରେ ରଖିଛି ।