ଭଦ୍ରକ ୨୬।୯: ନୀରବି ଗଲେ ଭଦ୍ରକର ବିଶିଷ୍ଟ ଜନନେତା ତଥା ସମାଜସେବୀ ଲକ୍ଷ୍ମୀନାରାୟଣ ମହାପାତ୍ର । କିଛି ଦିନ ତଳେ ସ୍ତ୍ରୀଙ୍କର ଦେହାନ୍ତ ହୋଇଥିଲା । ଶାରୀରିକ ଅସୁସ୍ଥତା କାରଣରୁ ଏକ ଘରୋଇ ମେଡିକାଲରେ ଚିକିତ୍ସିତ ହେଉଥିଲେ । ବୁଧବାର ବିଳମ୍ବିତ ରାତିରେ ତାଙ୍କର ଦେହାନ୍ତ ହୋଇଛି । ଲକ୍ଷ୍ମୀନାରାୟଣ ମହାପାତ୍ରଙ୍କ ଦେହାନ୍ତ ଖବର ପରେ ବିଭିନ୍ନ ମହଲରେ ଶୋକ ପ୍ରକାଶ ପାଇଛି । ଅଖିଳ ଭାରତୀୟ ବିଦ୍ୟାର୍ଥୀ ପରିଷଦର ଅନ୍ୟତମ ପ୍ରତିଷ୍ଠାତା ମଧ୍ୟ ତାଙ୍କୁ କୁହାଯାଉଥିଲା । ଛାତ୍ର ନେତା ସହ ସ୍ବର୍ଗତ ବିଜୁ ପଟ୍ଟନାୟକଙ୍କର ବେଶ ଘନିଷ୍ଠ ଥିଲେ ଲକ୍ଷ୍ମୀନାରାୟଣ ମହାପାତ୍ର ।
ଲକ୍ଷ୍ମୀନାରାୟଣ ମହାପାତ୍ରଙ୍କ ବିୟୋଗରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗଭୀର ଶୋକ ପ୍ରକାଶ କରିଛନ୍ତି । ମୁଖ୍ୟମନ୍ତ୍ରୀ ଲେଖିଛନ୍ତି, ବରିଷ୍ଠ ରାଜନେତା, ବିଶିଷ୍ଟ ସମାଜସେବୀ ତଥା ବିଦ୍ୟାର୍ଥୀ ପରିଷଦର ପୁରାତନ କାର୍ଯ୍ୟକର୍ତ୍ତା ଲକ୍ଷ୍ମୀନାରାୟଣ ମହାପାତ୍ରଙ୍କ ଅକାଳ ବିୟୋଗର ଖବର ଶୁଣି ମୁଁ ଗଭୀର ମର୍ମାହତ। ସେ ଏକ ସରଳ ଓ ନିର୍ଭୀକ ନେତା ଥିଲେ। ତାଙ୍କ ବିୟୋଗ ରାଜନୈତିକ ଓ ସାମାଜିକ କ୍ଷେତ୍ରରେ ଏକ ବଡ଼ ଅଭାବ ସୃଷ୍ଟି କରିଛି। ମୁଁ ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାରବର୍ଗକୁ ଶକ୍ତି ଦେବା ପାଇଁ ମହାପ୍ରଭୁଙ୍କ ନିକଟରେ ପ୍ରାର୍ଥନା କରୁଛି।
ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ମଧ୍ୟ ଗଭୀର ଶୋକ ପ୍ରକାଶ କରିଛନ୍ତି । କନକ ବର୍ଦ୍ଧନ ସିଂହଦେଓ କହିଛନ୍ତି ଯେ, ଜଣେ ସାଲିସବିହୀନ ଛାତ୍ରନେତା ଭାବେ ଲକ୍ଷ୍ମୀନାରାୟଣ ପରିଚିତି ଲାଭ କରିଥିଲେ । ଭଦ୍ରକର ହକ୍ ପାଇଁ ସର୍ବଦା ନିଜ ଲଢେଇ ଜାରି ରଖିଥିଲେ । ତାଙ୍କ ବିୟୋଗରେ ଭଦ୍ରକ ମାଟି ଜଣେ ନିର୍ଭୀକ ତଥା ଦାମ୍ଭିକ ନେତାଙ୍କୁ ହରାଇଲା । ଏହି ଦୁଃଖଦ ସମୟକୁ ସାମନା କରିବାକୁ ପ୍ରଭୁ ତାଙ୍କ ପରିବାରକୁ ଶକ୍ତି ପ୍ରଦାନ କରନ୍ତୁ । ଅମର ଆତ୍ମାର ସଦଗତି କାମନା କରିଛନ୍ତି ।
You Can Read:
ଜିଲ୍ଲାପାଳଙ୍କ ବଡ଼ ଘୋଷଣା, ଜିଲ୍ଲାର ସମସ୍ତ ସରକାରୀ ଏବଂ ବେସରକାରୀ ସ୍କୁଲ ଛୁଟି
