ପୁରୀ ୧୯।୪: ଅପରାଧ ଘଟାଇବା ପାଇଁ ହୋଟେଲ ରୁମ୍ରେ ଚାଲିଥିଲା ଯୋଜନା । ଅପରାଧରେ ବ୍ୟବହାର ପାଇଁ ଗୋଟିଏ ବନ୍ଧୁକ ସହିତ ଜୀବନ୍ତ ଗୁଳି ମଧ୍ୟ ପ୍ରସ୍ତୁତ ଥିଲା । ତେବେ ପୋଲିସ ପାଖରେ ଏନେଇ ଖବର ପହଞ୍ଚିବା ପରେ ସବୁ ଯୋଜନା ପଣ୍ଡ ହୋଇଯାଇଥିଲା । ହୋଟେଲରେ ଚଢ଼ଉ କରି ଅପରାଧି ମାନଙ୍କୁ ପୋଲିସ ଗିରଫ କରିବା ସହ ସେମାନଙ୍କୁ କୋର୍ଟ ଚାଲାଣ କଲା ।
ପୁରୀ ସମୁଦ୍ର କୂଳ ଥାନା ଅଞ୍ଚଳରେ ଏଭଳି ଘଟଣା ଘଟିଥିବା ବେଳେ ଚାରିଜଣ ଦୁର୍ଦ୍ଦାନ୍ତ ଅପରାଧୀଙ୍କୁ ଗିରଫ କରିଛି ସମୁଦ୍ରକୂଳ ଥାନା ପୋଲିସ । ଗିରଫ ଅଭିଯୁକ୍ତ ହେଉଛନ୍ତି ଦୋଳମଣ୍ଡପ ସାହିର ରାଜକିଶୋର ନାୟକ, ମାର୍କଣ୍ଡେଶ୍ଵର ସାହିର କାହ୍ନା ସାହୁ, ଖୁଣ୍ଟିଆ କଲୋନୀର ସାଇ ଜଗତଜ୍ୟୋତି ଆଇଚ ଏବଂ ଡେଲାଙ୍ଗ ହରିରାଜପୁର ଅଞ୍ଚଳର ପାର୍ଥ ପ୍ରସାଦ ପାତ୍ର । ଅଭିଯୁକ୍ତଙ୍କ ଠାରୁ ଗୋଟିଏ ବନ୍ଧୁକ, ୧୦ଟି ଜୀବନ୍ତ ଗୁଳି, ୨ଟି ମାଗାଜିନ୍, ଚାରୋଟି ମୋବାଇଲ୍ ଫୋନ୍, ନଗଦ ୭୨ ହଜାର ଟଙ୍କା ସହିତ ଗୋଟିଏ ବୁଲେଟ ଓ ସ୍କର୍ପିଓ ଗାଡ଼ି ଜବତ କରିଛି ପୋଲିସ । ପୁରୀ ସମୁଦ୍ର କୂଳ ଥାନାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଅତିରିକ୍ତ ଏସପି ସୁଶୀଲ ମିଶ୍ର ଏହି ସୂଚନା ଦେଇଛନ୍ତି ।
ଅଭିଯୁକ୍ତ ରାଜକିଶୋର ଓ କାହ୍ନା ଡେଲାଙ୍ଗ ଅଞ୍ଚଳରୁ ଗତ ୧୭ ତାରିଖରେ ପାର୍ଥ ସାରଥୀ ପାତ୍ର ଠାରୁ ଏକ ବନ୍ଧୁକ କିଣିଥିଲେ । ଏହି ବନ୍ଧୁକ ସାହାଯ୍ୟରେ ପୁରୀ ସହରର ବିଭିନ୍ନ ସ୍ଥାନରେ ଲୋକମାନଙ୍କୁ ଭୟଭୀତ କରାଇ ଡ଼କାୟତି, ଛିନତାଇ, ଚୋରି, ରାହାଜାନୀ ଭଳି ବିଭିନ୍ନ ପ୍ରକାରର ଅପରାଧ ଘଟାଇବା ପାଇଁ ଯୋଜନା ପ୍ରସ୍ତୁତ କରୁଥିଲେ ବୋଲି ପୋଲିସ କହିଛି । ଗତ ୧୮ ତାରିଖ ରାତିରେ ଅର୍ବାନ ହାଟ ନିକଟରେ ଥିବା ଏକ ହୋଟେଲରେ ଏହି ଅଭିଯୁକ୍ତ ମାନେ ବିଭିନ୍ନ ଅପରାଧ ଘଟାଇବା ପାଇଁ ଯୋଜନା ପ୍ରସ୍ତୁତ କରୁଥିଲେ । ହୋଟେଲ ମାଲିକ ଏନେଇ ସୁରାକ ପାଇବା ପରେ ସମୁଦ୍ର କୂଳ ଥାନା ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ଅପରାଧି ମାନଙ୍କୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ଏମାନଙ୍କ ନାଁରେ ବିଭିନ୍ନ ଥାନାରେ ଏକାଧିକ ମାମଲା ଥିବା ଅତିରିକ୍ତ ଏସପି କହିଛନ୍ତି ।
You Can Read:
ବରିଷ୍ଠ ସାମ୍ବାଦିକ ରତିକାନ୍ତ ମହାନ୍ତିଙ୍କ ଦେହାନ୍ତ, ବିଭିନ୍ନ ମହଲରେ ଶୋକର ଛାୟା
